Hatutan.com (10 Janeiru 2022), Díli—Tribunál Distritál Dili (TDD), iha Segunda 10 fulan ne’e, liu hosi leitura sentensa ne’ebé prezide hosi juiz kolektivu Arjentino Luisa Nunes, António Gonçalves, Alvaro Freitas, deside absolve funsionáriu públiku Provedoria Direitus Humanus no Justisa (PDHJ), arguidu Mário Moises Pereira hosi krime kontra bandu, relasiona ho hatama no fa’an farda F-FDTL no PNTL illegál.

Juiz Arjentino Luisa Nunes, esplika razaun absolve arguidu tanba Tribunál la konsege hetan baze legál ba faktus iha akuzasaun ne’ebé bele lori arguidu ba kondenasaun.

Notisia iha Relasaun:Kazu Funsionáriu PDHJ, Sasin Laiha Koñesimentu Kona-bá Taxa ba Farda F-FDTL

Alende ne’e, Tribunál mós absolve arguidu hosi kustu judisiáriu.

Antes ne’e, tuir akuzasaun hosi Ministériu Públiku (MP), katak, iha loron 16 fulan Fevereiru tinan 2018, Polísia ba iha arguidu nia uma hodi halo apreensaun ba farda ne’ebé arguidu hatama hosi Indonézia liu hosi ajénsia RTD.

Maski arguidu rasik la’ós kompañia ne’ebé manán tender sosa farda hosi instituisaun rua ne’e sen lisensa importasaun.

Ho hahalok arguidu, MP akuza ba krime kontra bandu ne’ebé previstu iha artigu 316 hosi kódigu penál Timor Leste (TL).

Audiénsia julgamentu prezide hosi juiz kolektivu Arjentino Luisa Nunes, António Gonçalves, Alvaro Freitas, MP reprezenta hosi Prokuradór Adérito Tilman no arguidu hetan asisténsia legál hosi Defensór Públiku Manuel Exposto.

Jornalista: Carmelita Isaac