Hatutan.com (10 Fevereiru 2022) Díli—Tribunál Distritál Díli, iha Kinta 10 Fevereiru kontinua hala’o julgamentu ba krime dezobediénsia ne’ebé deskonfia komete hosi arguida Teresa Jacinta Soares, nu’udár na’in ba restaurante ne’ebé lokaliza iha Vila-Verde tanba kontinua loke restaurante maski Autoridade Inspesaun Fiskalizasaun Atividade Ekonómiku Sanitária no Alimentár (AIFAESA), notifika taka provizóriu tanba la kumpri regra sanitária.

Audiénsia julgamentu kontinuasaun ne’e, sasin Idónia Sanches ne’ebé sai hanesan Funsionáriu AIFAESA deklara, rezultadu inspesaun detekta katak, fatin ne’ebé arguida uza laiha ijiéne, tanba ne’e AIFAESA notifika arguida hodi taka provizóriu atividade restaurante durante loron sanulu.

“Fo prazu loron sanulu ho objetivu fó tempu ba arguida atu hadi’a, maibé arguida la taka no la kumpri. Bainhira ami tun fali ba inspesaun, arguida kontinua loke resturante ne’e no ami kontinua notifika ba dala rua ho prazu loron 90. Maibé, arguida kontinua la kumpri, tanba ne’e ami submete relatóriu ba parte jurídiku  no koordenadór jerál atu foti medida,” sasin deklara iha audiénsia.

Advertisement

Antes ne’e, iha arguida nia deklarasaun katak, nia parte rekoñese aktu ne’ebé nia halo hodi la kumpri notifikasaun AIFAESA hodi kontinua loke restaurante.

Hafoin rona sasin, juiz prezide marka hikas audiénsia ba loron seluk hodi kontinua alegasaun no rona desizaun.

Ministériu Públiku akuza arguida ba prátika krime dezobediénsia ne’ebé previstu iha artigu 244 hosi kódigu penál Timor-Leste, relasiona ho arguida nia hahalok ne’ebé la kumpri notifikasaun hosi AIFAESA.

Audiénsia julgamentu ne’e prezide hosi juis singulár Argentino Luisa Nunes, MP reprezeta hosi Prokuradór Reinato Berenahak no arguida hetan asisténsia legál hosi Defensór Públiku Sérgio Quintas.

Jornalista: Carmelita Isaac

Advertisement