Hatutan.com (19 Fevereiru 2022) Díli—Komisaun Nasionál ba Eleisaun (CNE, sigla portugés) iha Sábadu (19/02/2022), realiza enkontru ho reprezentante kandidatu Prezidente Repúblika  na’in-16 nian, inklui Polisia Nasional Timor Leste (PNTL) hodi ko’alia  no define kona-ba atividade paktu eleisaun pasífiku ka serimónia kulturál (haree manu-aten) to’o debate públiku  no prosedimentu submisaun kalendáriu kampaña nian.

Notísia iha Relasaun: Pré-Kampaña, CNE Sei Aplika Sansaun Administrativa ba Kandidatu PR no Parpól

Edifísiu CNE. Foto/Hatutan.com

Iha enkontru ne’ebé realiza iha salaun CNE  deside no hetan konkordánsia katak iha loron 23 fulan ne’e, sei realiza  atividade paktu eleisaun pasífiku ka serimónia ritual iha  Munisípiu 12 inklui Rejiaun Administrativu Espesiál Oé-Cusse Ambeno (RAEOA) hodi haree manu-aten ne’ebé karik sei fó perigu ba prosesu eleisaun nian ho alvu prinsipál husi atividade ne’e maka reprezentante kada kandidatu iha kada munisípiu, lia-nain iha kada munisípiu, autoridade lokál no PNTL ne’ebé sei tuir tradisaun ka lisan iha kada munisípiu.

Tuir senáriu ne’ebé hetan ona konkordánsia mútua  katak serimónia ritual ne’e sei la asina paktu eleisaun pasífiku tanba iha loron 28 sei realiza iha nivel nasionál hodi informa hikas rezultadu serimónia kulturál ne’ebé halo ona iha kada munisípiu liu-liu kona-bá eleisaun sei lao ho di’ak ka lae hodi asina mós paktu eleisaun pasífiku.

Advertisement

Ba ajenda segundu, debate públiku ka debate ba kandidatu, liu husi enkontru ne’e CNE deside sei hala’o iha loron  8 fulan-Marsu mai ne’e, durante oras-haat nia laran.

Iha debate ne’e rasik sei fó oportunidade ba kandidatu atu hato’o sira-nia programa liu husi televizaun  ne’ebé sei iha mós sesaun pergunta no hatán.

Iha mós regra ba debate ne’e rasik maka kandidatu na’in-16 maka sei partisipa diretamente iha debate ne’e, katak la’ós  kandidatu nia reprezentante, inklui bele iha mós pergunta ne’ebé sei dirije ba kandidatu sira ho lian portugés.

“Tuir lei debate ne’e rasik labele halo antes kampaña, tanba ne’e ita deside loron 8 fulan-Marsu, hodi fó sai sira-nia hanoin, nune’e sidadaun hotu bele rona, Maibé iha debate ne’e tanke utiliza mós lian portugés iha sesaun pergunta ida no hatán mós ho portugés, nune’e, bele fó fiar ba ema hotu,” Prezidente CNE, Jose C. Belo Pereira, hateten liuhusi abertura ba enkontru entre CNE, PNTL no kandidatu PR  sira.

CNE mós husu ba kandidatura sira atu submete kalendáriu kampaña antes loron lima tama ba loron kampaña, nune’e bele fó tempu ba CNE hodi identifika karik kampaña kandidatu balun monu iha loron, fatin no oras hanesan, nune’e bele muda.

Advertisement

Jornalista: Carmelita Isaac