Hatutan.com, (21 Fevereiru 2022), Díli- Grupu arte-marsiál (GAM) husi Persaudaraan Setia Hati Terate (PSHT) ho Kmanek Oan Rai Klaran (KORK) hetan ona legalidade ba sira-nia atividade husi  Komisaun Reguladóra Arte-Marsiál (KRAM).

Prezidente KRAM, Octávio da Conceição. Foto/Hatutan.com

Husi sorin seluk, grupu arte-marsiál Ikatan Keluarga Silat  Putra Timor Leste  (IKSP-TL) Kera Sakti seidauk bele hala’o atividade tanba sira seidauk kompleta dokumentu ba rejistu nian iha KRAM.

Prezidente KRAM, Octávio da Conceição informa,  PSHT nia legalidade ba atividade nian publika ona iha Jornal da Republica no daudaun ne’e hein hela KORK nian  sei iha prosesu ba publika mós iha Jornal da Republica.

Prezidente KRAM, Octávio da Conceição ba jornalista sira iha salaun Laline-Larigutu CNE, Dili, Segunda (21/02/2022), epslika bazeia ba lei númeru 5/2017 artigu 9 kona-bá kompeténsia propria KRAM nian, katak KRAM mak bele fó autorizasaun ka lisensiamentu ba atividade arte-marsiál iha territóriu tomak.

Iha tempu badak KRAM sei hasai segunda diretiva ba delegasaun kompeténsia sira ba sub-komisaun reguladóra arte-marsiál nivel munisipál sira para atu kontrola atividade sira ne’ebé maka membru arte-marsiál sira halao no oras ne’e parte KRAM diskute kle’an ona ho estrutura PSHT atu iha fulan-Marsu mai PSHT sei halo kongresu nasionál ba dahuluk hodi reativa sira-nia organizasaun tuir prosesu administrativu ne’ebé KRAM husu kabe mós ba responsabilidade másimu estrutura másimu PSHT nian.

“Sekretáriu Estadu Juventude no Desportu (SEJD), liu husi KRAM dezde fulan-Marsu 2020 depois de VIII governu konstitusionál liu husi konsellu ministru hasai rezolusaun númeru 4/2020 loron 2 fulan-Marsu hodi revoga hikas rezolusaun númeru 6/2013 kona-bá esensaun grupu arte-marsiál,” Octávio da Conceição hateten.

Iha rezolusaun númeru 4/2020 ne’e, orienta nafatin komandu Polísia Nasional Timor Leste (PNTL) para atu halo intefikasaun servisu sira ba pratika ilísita ne’ebé arte-marsiál sira hala’o, iha parte seluk rezolusaun ida ne’e mós fó orientasaun ba KRAM atu hatuur prosedimentu administrativu ba prosesu rejistu, re-atualizasaun no re-organizasaun ba grupu arte-marsiál sira iha territóriu Timor, liuliu sira ne’ebé naran temi iha rezolusaun númeru 4/2020 hanesan PSHT, IKS no KORK.

“Iha tinan kotuk KRAM liu husi orientasaun SEJD komesa hahú prosedimentu administrativa liu husi primeira diretiva KRAM kona-bá rekizitu prosesu rejistu grupu arte-marsiál no lori tinan ida mak arte-marsiál sira prienxe rekizitu no oras ne’e organizasaun sira ne’e rejista ona iha Ministériu Justisa, Diresaun Jerál Servisu Notariadu,” nia haktuir.

Prezidente KRAM ne’e hateten SEJD liu husi KRAM liu husi kooperasaun ho komandu PNTL kontinua disemina lei númeru 5/2017 no halo diálogu ho komunidade no joven sira koopera hamutuk ho Ministériu Interior (MI), diresaun prevensaun konflitu komunitária hamutuk ho organizasaun sosiedade sivíl hotu para kontinua fó informasaun ba sosiedade tomak.

“Sosializasaun ne’e foku liu ba grupu arte-marsiál sira para atu bele kontribui ba pás no estabilidade iha ita nia rain, liuliu iha prosesu kampaña eleisaun prezidensiál no mós eleisaun parlamentár ne’ebé sei mai iha tinan oin,” nia hateten.

Jornalista: Vito Salvador