Hatutan.com, (28 Janeiru 2022) Díli—Tribunál Distritál Díli (TDD), kontinua hala’o julgamentu ba krime burla agravadu ne’ebé deskonfia involve jerente kompañia Brother Hood, arguidu Mário Freitas relasiona ho projetu pakote referendum hosi Ministériu Agrikultura no Peska (MAP) hodi halo konstrusaun ba morru iha Baucau-Villa, ne’ebé ikus-mai fó prejuizu ba lezadu José Manuel dos Reis nu’udár diretór kompañia Unipazpro Lda.

Julgamentu kontinuasaun iha Segunda loron 28 fulan ne’e, sasin Diretór kompañia Brother Hood, Nelson Belo deklara nia parte fasilita arguidu hodi utiliza nia kompañia inklui rekening hodi hala’o projetu ne’e maibé nia parte laiha koñesimentu kona-bá fahe osan entre arguidu ho lezadu.

Notisia iha Relasaun:Kompañia Brother Hood ho Unipazpro Laiha Akordu Fahe Osan

Bainhira Governu halo pagamentu primeiru, arguidu mak prepara pedidu levantamentu osan inklui relatóriu lori ba sasin asina hodi ba foti osan.

“Arguidu uza ha’u-nia kompañia inklui rekening, tanba ne’e arguidu mak prepara pedidu levantamentu osan no ha’u asina inklui ha’u mak ba foti osan ne’e. Maibé, iha levantamentu daruak ha’u ho arguidu de’it mak ba foti osan ne’e no lezadu la ba. Osan ne’e ha’u entrega ba arguidu atu fahe oinsa ha’u la hatene,” sasin deklara.

Iha levantamentu dahuluk ba osan ho montante rihun $27-resin, sasin inklui arguidu no lezadu mak ba foti iha banku no entrega ba arguido.

Maibé, iha levantamentu daruak ho montante $135.000, komesa iha ona problema entre arguidu ho lezadu.

Tanba ne’e, sasin deside halo deklarasaun hodi fó autorizasaun ba arguidu atu ba foti osan iha Banku bainhira Governu halo pagamentu ba obra ne’e, tanba ne’e sasin laiha koñesimentu kona-bá pagamentu ikus ne’ebé fó prezuizu ba lezadu.

Hafoin rona sasin, juiz prezidi marka audiénsia ba loron seluk hodi kontinua rona sasin.

Antes ne’e, tuir akuzasaun hosi Ministériu Públiku (MP) katak, iha loron 23 fulan-Setembru 2009,  Ministériu Agrikultura no Peska hala’o enkontru ho emprezáriu hosi Munisípiu 13 hodi ko’alia kona-bá Pakote Referendum, ne’ebé deside katak projetu ne’ebé atu halo tenke termina iha fulan-tolu nia laran, maibé bele prolonga bainhira obra ne’e atinje ona 50% ka 80%, bainhira la kumpre mak Governu sei la fó tán lisensa.

lha enkontru deside mós bele iha kompañia rua hamutuk hodi kaer obra ne’e, maibé tenke halo akordu konjunta antes hahú asina kontratu no vistu hosi Koordenadór Munisípiu.

Tanba ne’e, iha loron 23 fulan-Setembru 2009, lezadu ho nia kompañia UNIPAZPRO hamutuk ho arguidu hanesan jerente hosi kompañia BROTHER HOOD Lda ho diretór kompañia Nelson Belo asina akordu hodi halo projetu ne’e.

Iha loron 4 fulan-Outubru 2009 lezadu hamutuk ho arguidu hala’o enkontru ida ho koordenadór Munisípiu Baucau, Abrão Gabriel dos Santos Oliveira, hodi ko’alia kona-bá osan adiantamentu 20% ho nia valor $27,159.60, tanba ne’e sira dezloka kedan ba fatin konstrusaun hodi hasoru malu ho bada’en Mateus da Silva Correia, hodi halo kontratu traballu no selu bada’en ho valor $5.000.00 no termina iha periodu fulan-tolu nia-laran.

Iha loron 19 fulan-Outubru 2009, liuhosi loja Toko Lay fornese materiál konstrusaun ho valór  $27,000.00, maibé iha loron 30 fulan-Outubru tinan 2009 arguidu halo pedidu ba iha AECCOP sem koñesimentu hosi lezadu, koordenadór Munisípiu hodi halo falsifikasaun hodi hetan  $135.000.00.

Iha loron 3 fulan-Novembru 2009, lezadu haree projetu ne’ebé sira halo, maibé bada’e sira informa katak labele halo obra, tanba material laiha, ho nune’e, nia mai husu iha Toko Lay atu fornese material, maibé sira hatán dehan, arguidu mai foti ona osan 15% ne’ebé iha ho valor $12.697.30 hodi fó informasaun falsu katak arguidu maka diretór ba kompañia Brodher Hood, maibé diretór loloos kompañia maka Nelson Francisco Assis Belo.

Arguidu mós halo falsifikasaun kona-bá relatóriu halo obra liu hosi pedidu ba iha Sekretáriu Estadu Agricultura, Marcos da Cruz hodi informa katak obra ne’e termina ona hodi husu pagamentu, maibé realidade obra sidauk termina ho nune’e  koordenadór Pakote Referendu Munisípiu Baucau Abrão de Oliveira lakohi asina.

Ho arguidu nia hahalok ne’e, lezadu simu informasaun hosi José Coelho katak loos duni arguidu falsifika dokumentu hodi ba foti xeke iha AECCOP hodi ba foti osan iha Banku sem koñesimentu hosi Iezadu no mós koordenadór Pakote Referendu Munisípiu Baucau.

Konsekuénsia hosi arguidu nia hahalok ne’e fó prejuizu ba lezadu ho montante $53.322,80, tanba ne’e MP akuza arguidu ba pratika krime burla agravadu ne’ebé previstu iha artigu 267 hosi kódigu penál TL.

Hafoin rona arguidu ho lezadu, juiz prezide adi’a hikas julgamentu ba loron seluk hodi kontinua rona lezadu no sasin sira.

Audiénsia julgamentu preside hosi juiz koletivu, Argentino Luisa Nunes, José Gonçalves, Alvaro Freitas, MP reprezenta hosi Prokuradór Reinato Berenahak no arguidu hetan asisténsia legál hosi Defensór Públiku Manuel Sarmento.

Jornalista: Carmelita Isaac