Hatutan.com (01 Marsu 2022), Díli—Ofisiál justisa hosi Tribunál Distritál Oecusse (TDO), arguida Zinha Maria Soares ameasada simu pena prizaun tinan rua no suspende tinan rua ba krime pekulatu, tanba privatiza osan kustu judisiáriu ho montante $250.

Liu hosi alegasaun Ministériu Públiku (MP) ne’ebe reprezenta hosi Prokuradór Domingos Gove Barreto iha Tersa loron 01 fulan ne’e, esplika razaun husu TDD atu aplika pena prizaun tinan ida suspende tinan ida ba arguida, tanba konsidera arguida konfesa faktus ne’ebé iha katak nia foti duni osan kustu judisiáriu ho montante $250 hodi utiliza no la depozita ba kofre Estadu, maske arguida rasik devolve ona osan ne’e.

Notisia iha Relasaun:Privatiza Kustu Judisiáriu, TDD Julga Ofisiál Justisa Tribunál Distritál Oe-cusse

Maski arguida koopera di’ak iha prosesu julgamentu, maibé arguida tenki responsabiliza ba aktu krime ne’ebé nia komete hanesan funsionária públika.

Parte Defensór Públiku ne’ebé reprezenta hosi Fernando de Carvalho husu ba Tribunál atu aplika pena ne’ebé adekuadu ba nia kliente, tanba tenki tau mós konsiderasaun ba aktu boa fé ne’ebé arguida hatudu hodi devolve hikas osan ne’e.

Arguida hanesan funsionária Tribunál nian ne’ebé ezerse funsaun hanesan ofisiál justisa no servisu kleur ona iha Tribunál.

Hafoin alegasaun, Tribunál adi’a hikas julgamentu ba loron seluk hodi rona leitura sentensa.

Antes ne’e, tuir akuzasaun hosi Ministeriu Publiku katak iha loron 05 Fulan Abril 2019, Tribunál Distritál Dili hamonu desizaun ba kazu Krime pekulatu inklui deside kustu judisiáriu ho montante $250 no iha loron ne’e kedan entrega osan ba arguida hanesan kustu judisiáriu nian, tanba momentu ne’eba arguida hanesan ofisiál justisa iha TDD, maibé osan ne’e arguida la depozita ba kofre Estadu hodi utiliza ba nesesidade privada, tanba ne’e MP akuza arguida ba pratika krime pekulatu ne’ebé previstu iha artigu 295 hosi kódigu penál TL.

Audiénsia julgamentu prezide hosi juiz kolektivu, Maria Solana, Ana Paula, Evangelino Belo no Ministériu Públiku reprezenta hosi Prokuradór Domingos Gove Barreto no arguida hetan asisténsia legál hosi Defensór Públiku, Fernando Da Costa.

Jornalista: Carmelita Isaac