Hatutan.com, (17 Marsu 2022), Díli—Kampaña eleitorál Kandidatu Prezidente Repúblika sira-nian termina iha loron 16 fulan-ne’e, maibé atributu kampaña nian, hanesan pamfletu husi kandidatu Prezidente Repúblika períodu 2022-2027 balun kontinua eziste iha fatin públiku.

Pamfletu Kandidatu PR 2022-2027, Jenerál Reformadu, Lere Anan Timur nian sei taka boot hela iha Uma Andar ida iha área Fatuhada, Dili, 17 Marsu 2022. Foto/Hatutan.com

Observasaun Hatutan.com nian iha Dili laran, Kinta (17/03/2022), Kandidata PR  Isabel Ferreira ho Kandidatu  PR Jenerál Reformadu Lere Anan Timur nian, kontinua eziste iha espasu públiku hanesan iha Hudi-Laran, Fatuhada, Villa-Verde no Palacio do Governo sorin (estrada entre Palacio do Governo ho Acait).

“Eleisaun sei mosu iha loron 19 fulan-Marsu ne’e, tanba tuir lei seidauk bele hasai bainhira eleisaun no rezultadu seidauk halo no karik sei iha segunda volta hodi haree ba poténsia kandidatura rua ne’ebé atu avansa iha segunda volta, maibé hela de’it maka atributu kandidatu rua ne’ebé atu avansa restu tenke hasai obrigatóriamente,” Prezidente CNE, Jose C. Belo Pereira, hateten liuhusi konferénsia imprensa ne’ebé hala’o iha salaun CNE, Dili.

Iha dekretu lei nu 5/2017 loron 27 fulan-Fevereiru ne’ebé ko’alia kona regulamentu kampaña no propaganda eleitorál iha kapítulu III artigu 15 hateten hafoin de kampaña eleitorál remata, ekipa susesu husi kada kandidatu iha obrigasaun atu hamoos propaganda eleitorál liu-liu materiál sira ne’ebé uza durante kampaña ho prazu loron hitu molok tama ba loron eleisaun.

Atributu Banner Kandidata PR 2022-2027, Isabel da Costa Ferreira nian sei eziste hela iha estrada públiku entre Palaçio do Governo ho Acait, Dili, 17 Maret 2022. Foto/Hatutan.com

Karik material kampaña sira ne’e la hasai tuir tempu ne’ebé determina CNE sei husu ba autoridade seguransa atu hasai materiál kampaña liu-liu pamfletu ho kustu limpeza kandidatu maka sei responsabiliza.

Jornalista: Carmelita Isaac