Hatutan.com, (26 Marsu 2022), Díli- Komisaun hari igreja foun no Empreza ARTHA DÍLI sei hahú halo kontinuasaun servisu ba konstrusaun Igreja São José Aimutin, Dioseze Dili ne’ebé durante ne’e paradu kauza husi kontratu multi annual ne’ebé Gabinete Apoiu Sosiedade Sivíl (GASC, sigla portugés) ho igreja iha inválidu.

Notísia iha Relasaun: Governu Transfere Ona $489,000 Ba Projetu Konstrusaun Igreja Aimutin

Dezeñu 3D Igreja Aimutin. Foto/Repro

Relasiona ho kontratu multi annual ne’ebé GASC ho Igreja Aimutin nian ne’ebé inválidu ona, Konferénsia Episkopál Timorense (CET, sigla Portugés) liu husi Arsebispu Arkidioseze Metropolitanu Dili, Dom Virgílio do Carmo da Silva, SDB halo ona rekomendasaun hodi kompleta dokumentu komprovativu seluk hanesan, relatóriu servisu husi empreza konstrutór no komisaun hari igreja foun  hodi simu tan osan ho montante $480,000.00, hodi kompleta millaun tolu Dollar Amerikanu ($3,000,000.00) ne’ebé Governu oferese ba konstrusaun Igreja Aimutin.  Nune’e iha semana rua liubá komisaun hamutuk ho empreza kontrutor ARTHA DÍLI halo ona sorumutuk no garante atu iha fulan-Abríl nia laran empreza bele hahú hikas nia servisu.

Komisaun harii igreja foun no konsultór ba konstrusaun Igreja Aimutin, Cesar Moreira, ba Hatutan.com iha nia rezidénsia, Pantai Kelapa, Díli, Sesta (25/03/2022), esplika katak, konstrusaun Igreja Aimutin sei hahú hikas iha fulan-Abríl tamba prosesu transferénsia osan ba konstrusaun Igreja Aimutin husi Arkidioseze Dili foin halo iha fulan kotuk.

Husi total osan $480,000.00 ne’ebé iha parókia no komisaun sei utiliza mós atu halo pagamentu ba dívida sira empreza CINOMA CBMI no ARTHA DÍLI tanba antes ne’e sira adianta ona srvisu lubuk ida no parte igreja seidauk halo pagamentu tamba osan laiha.

Notísia iha Relasaun: Finaliza Igreja Aimutin presiza tan milaun rua

“Osan ne’ebé iha ita sei uza hodi rezolve uluk lai dívida sira empreza Estatál Xina CINOMA CBMI no ARTHA DÍLI ho montante $325,000.00 no ARTHA DÍLI purvolta $100,000.00 maibé sei hein rezultadu avaliasaun ba nia servisu sira ne’ebé presta tiha ona tanba sira mós adianta servisu lubuk ida no restu husi osan ne’ebé iha sei utiliza hodi kompleta plafond ne’ebé hahú tiha ona no seluk bele ba halo montajen ba odamatan, janela no seluk-seluk tan,” Cesar Moreira hateten.

Komisaun harii igreja foun no konsultór ba konstrusaun Igreja Aimutin, Cesar Moreira. Foto/Hatutan.com

Komisaun Harii Igreja Foun Aimutun haree no kalkula katak maske  Governu kompleta ona transferénsia orsamentu ba konstrusaun Igreja Aimutin, maibé nafatin sidauk sufisiente tanba tuir estimasaunaAtu finaliza konstrusaun Igreja Aimutin presiza tan osan adisionál  millaun $1.8

Cesar Moreita hateten, razaun presiza orsamentu adisionál tanba estimasaun sasán konstrusaun nia folin-sa’e no la hanesan ho tinan anteriór ne’ebé sasán folin normál kompara ho situasaun COVID-19 no kalamidade públiku ne’ebé afeta Timor Leste.

Konsultóriu ba obra konstrusaun Igreja Aimutin  ne’e salienta, dioseze husu atu komisaun no empreza implementadór tenke aprezenta relatóriu final husi total gastu ba millaun tolu Dollar Amerikanu ($3,000,000.00) ne’ebé Governu fó atu nune’e bele hamutuk buka dalan hamutuk hodi solusiona difikuldade ne’ebé parókia enfrenta.

Notísia iha Relasaun: Selu ona milaun $2,5, konstrusaun Igreja Aimutin “nunca terminou”

“Dioseze ezije atu ami  tenke halo relatóriu finál ida ba ezekusaun fundu husi GASC molok hanoin dalan seluk ka kontinua halo aproximasaun ho Governu ba fundus adisionál hodi kompleta konstrusaun ne’e,” nia subliña.

Haree ba difikuldade finanseira ne’ebé iha, Komisaun Harii Igreja foun Aimutin hamutuk ho parókia hili dalan alternativu hodi husu partisipasaun balun husi sarani sira no oferta husi pesoa ka grupu ka organizasaun balun ne’ebé ho voluntarizmu hakarak kontribui hodi halais prosesu konstrusaun ba igreja foun parókia São José Aimutin.

“Partisipasaun sarani sira halo ona no osan ne’ebé sarani sira halibur hamutuk iha $40,000.00-liu hetan mós oferta ba atributu hanesan estátua no altar inklui ho kadeira konfesionáriu no estimasaun ne’e partisipasaun sarani sira nian bele to’o 7% husi totál orsamentu adisionál ne’ebé iha,” nia esplika.

Igreja Aimutin bele konsidera hanesan igreja reprezentativu no monumental tamba igreja ne’e lokaliza iha Estrada prinsipál no hela loos ha sidade Díli nia fuan no bele akumula sarani barak no ho dezeñu modernu no iha estétika momental relijiozu tuir kultura no fiar sarani Timor-Leste ne’ebé maioria katóliku.

Relasiona ho situasaun ne’e maka Arkidioseze Díli husu atu komisaun tenke halo relatóriu finál ba GASC no labele husik dívida ba igreja no tenke garante kualidade servisu liuliu liga ho konstrusaun fíziku igreja nian.

Notísia iha Relasaun: Konstrusaun Igreja ‘paradu’, Sarani Parókia São José Aimutin la kontente

Jornalista: Vito Slvador