Connect with us
Pakote Ahi

Justisa & Krime

Privatiza Osan Estadu, Funsionáriu PN Kondenadu ho Pena Suspensaun

Published

on

Hatutan.com (22 Abril 2022), Díli—Tribunál Distritál Díli (TDD) iha Sesta 22 fulan ne’e, liu hosi leitura sentensa ne’ebé lee sai hosi juiz kolektivu Afonso Carmona, Ana Paula Fonseca no Maria Solana deside aplika pena prizaun tinan tolu, maibé suspende ninia ezekusaun tinan lima ba Funsionáriu Parlamentu Nasionál (PN) aguidu Justino de Jesus Salsinha Babo ba krime pekulatu, relasiona ho alokasaun fundu rezerva ba estudu komparativu Deputadu sira iha Xina no Macau ne’ebé hamout osan restu ho montante $7.507.75 hosi total $10.000.

Tribunál konsidera faktus provadu hotu bazeia ba arguidu nia konviksaun ne’ebé prienxe elementu krime pekulatu signifika arguidu utiliza duni osan refere.

Lee Mós: Funsionáriu PN Uza Osan Estudu Komparativu Deputadu ba Interese Privadu

Advertisement

Maski nune’e, bazeia ba sirkustánsia hotu ne’ebé iha liu-liu arguidu kolabora di’ak ho justisa hodi konfesa faktus hotu ne’ebé iha, tanba ne’e Tribunál deside arguidu la presiza tama prizaun maibé iha liur durante tinan lima.

Maibé ho kondisaun katak arguidu tenki selu hikas osan restu ho montante $15.975 ba Estadu ho prazu fulan ida no kustu judisiáriu ho valor $40.

Antes ne’e, tuir akuzasaun hosi Ministériu Públiku katak, iha loron 09 fulan jullu 2019, Prezidente Comissão E PN Assuntos Infraestruturas, Abel Pires da Silva, haruka pedidu ba Prezidente Parlamentu Nasionál hodi husu apoiu fundu Rezerva ho montante de $10.000, hodi utiliza ba Estudu komparativu Deputadu sira iha Xina no Macau iha loron 30 jullu to’o 14 Agosto no iha loron 23 de Jullu 2019, Prezidente Parlamentu Nasionál aprova pedidu refere.

Iha loron 2 fulan Setembru 2019, Abel Pires da Silva haruka karta ba PPN hodi informa kona-bá alterasaun ba loron dezlokasaun Deputadu hosi komisaun E ba Repúblika populár Xina.

Iha loron 3 fulan Setembru Ofisiál Finansas Lina Fatima Babtista prepara Payment Request, ne’ebé sertifika hosi Zélia Maria da Costa Fátima no hetan aprovasaun hosi Adelino Afonso de Jesus.

Advertisement

Iha loron ne’ebé hanesan Herman de O. Soares no Lina Fátima Baptista prepara dokumentu Commitment And Payment Voucher ne’ebé sertifika hosi Maria da Costa Fátima no autoriza hosi Adelino Afonso de Jesus.

Iha loron 04 fulan Setembru 2019, Diresaun Finansas PN hasai cek ho númeru 0017321 ho montante $10.000, liu hosi ofisiál finansas Isabel Alves Ximenes entrega osan ho montante refere ba arguidu hodi utiliza ba nesesidade deputadus nian iha estudu kompativu iha Xina-Macau.

Iha loron 05 fulan Setembru 2019, Deputadu Kimissaun E, Abel Pires da Silva hamutuk ho deputadu sira seluk arranka hosi Dili ba Denpasar no kontinua viajen ba Xina-Macau no iha loron 19 fulan Setembru 2019, deputadu sira dezloka ba Beijing no Timor-Leste.

Iha loron 23 fulan Dezembru 2019, Prezidente Komissaun E, Abel Pires da Silva haruka karta ida ba sekretária Jeral PN Cedelizia Faria dos Santos, hodi informa katak durante vizita estudu komparativu iha Xina no Macau deputadus hosi komisaun E utilizara osan hosi fundu rezerva ho montante $2.492.25, tanba ne’e komisaun E sei fo fila osan restu ho montante  $7.507,75.

Maibé osan restu ne’ebé arguidu kaer la konsege fo fila ba sekretaria PN to’o ohin loron hodi utiliza fali ba interese privadu, tanba ne’e Diretor Joaquim Vicente, haruka karta chamada ba arguidu hodi devolve hikas osan restu.

Advertisement

Iha loron 30 fulan Setembru 2020, arguidu haruka karta ida ba sekretariu jeral PN, Cedelizia Faria dos Santos, hodi informa kona-ba disponibilidade arguidu nian hodi devolve hikas osan restu ne’e liu hosi kontratu sosa sasan iha terenu durante deputadu sira nia estudu kompativu iha Xina no Macau, tanba osan restu ho montante $7.507,75 utiliza hotu ba atividade estudu komparativu Deputadu no ba interese privadu.

Ho hahalok arguidu, fo prezuizu ba Estadu ho montante $7.507,75 tanba ne’e MP akuza arguidu ba pratika krime pekulatu ne’ebé previstu iha artigu 295 hosi kodigu penal Timor Leste.

Audiénsia julgamentu prezide hosi juis koletivu Afonso Carmona, Ana Paula Fonseca, Maria Solana, MP reprezenta hosi Prokuradór Adérito Tilman no arguidu sira hetan asisténsia legál hosi Advogada privada Adelina Lobo, Virna Carvalho.

Jornalista: Carmelita Isaac

Advertisement
Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Justisa & Krime

Konsidera Buska Ilegál iha Rezidénsia Fulolo, Mari Alkatiri Halo Keixa Hasoru Rogério Lobato

Published

on

Hatutan.com, ( 23 Maiu 2024), DíliAntigu Prezidente Autoridade Rejiaun Administrativu Oé-Cusse Ambeno (RAEOA), Mari Alkatiri, Kinta (23/05/2024), hatama keixa bá Ministériu Públiku  kontra Prezidente RAEOA atuál  Rogério Tiago de Fátima Lobato tanba konsidera buska ne’ebé Rogério Lobato ho ekipa halo bá nia rezidénsia iha Fulolo, Aldeia Sanane, Suku Costa, Sub-Rejiaun Pante Makasar, ilegál no kontra Lei ne’ebé vigora.

(more…)

Kontinua Le'e

Justisa & Krime

Halo Diskursu Ódiu, Polísia Bolu Amaro Susar

Published

on

Hatutan.com, (23 Maiu 2024), Díli-Polísia Nasionál Timor-Leste (PNTL) liuhosi Departamentu Investigasaun Kriminál (DIK),  Kinta (23/05/2024), bolu ona Amaro da Costa “Susar”tanba halo diskursu ódiu hodi sadik Primeiru-Ministru Kay Rala Xanana Gusmão no ameasa Ministru Obras Públikas (MOP), Samuel Marçal, liuhusi gravasaun audio ne’ebé espalla rede média sosiál Facebook no WhatsApp.

(more…)

Kontinua Le'e

Justisa & Krime

Pesoál PCIC husu Osan bá Oan Mane Fujitivu Teves Jr, Ramos-Horta Ezije Rezultadu Investigasaun

Published

on

Hatutan.com, (22 Maiu 2024), Díli- Prezidente Repúblika (PR), José Ramos-Horta ezije rezultadu  investigasaun bá pesoál membru Polícia Ciêntífica e de Investigação Criminal (PCIC) ne’ebé husu osan bá  oan mane fujitivu Arnolfo Teves Jr.

(more…)

Kontinua Le'e
Advertisement

Trending