Hatutan.com, (15 Marsu 2022), Díli—Iha loron 14 fulan-Maiu tinan-2022, Asosiasaun Feto Jurista Timor-Leste (AFJTL) hala’o lansamentu ofisiál asosiasaun nian nu’udar Asosiasaun foun ida iha Timor-Leste (TL).

Membru Asosiasaun Feto Jurista Timor-Leste (AFJTL) hala’o lansamentu ofisiál asosiasaun nian nu’udar Asosiasaun foun ida iha Timor-Leste (TL), iha Díli, 14 Maiu 2022. Foto/Espesiál.

Iha tinan 20 nia laran hafoin votu istóriku ba ukun rasik-an, Timor-Leste hetan ona progresu bo’ot iha área justisa no garantia ba feto nia direitu.

Maibé iha prátika, maluk feto sira seidauk hetan oportunidade ne’ebé hanesan ho maluk mane sira, liuliu hodi kontribui ba dezenvolvimentu Nasaun nian.

Ida-ne’e hatudu katak, diskriminasaun hasoru maluk feto sira sei la’o nafatin iha nível oin-oin hosi Estadu no sosiedade Timor-Leste nian.

Iha área justisa, maiór parte hosi autór judisiáriu sira mak mane. Feto sira reprezenta de’it 17% hosi autór judisiáriu sira hotu, inklui juiz, prokuradór, defensór no advogadu privadu sira. Agora daudaun iha Centro Formação Jurídica e Judiciária hosi 48 formandu, 16 de’it mak feto.

Realidade ne’e hatudu katak, partisipasaun feto iha seitór justisa sei nafatin dook hosi igualdade. Tanba ne’e, AJFTL mai ho misaun atu hakbi’it feto jurista sira, liu hosi servisu hamutuk hodi halakon dezigualdade, diskriminasaun hasoru feto, no promove oportunidade ba partisipasaun feto nian no sai nu’udár autór ativu hodi hametin sistema justisa iha ita-nia rai doben Timor-Leste.

AFJTL mós ho kompromisu no sei esforsu atu hametin liután kapasidade feto jurista sira nian, nune’e mós halo advokasia ba entidade sira hotu atu halo mudansa ba realidade ida-ne’e.

“Dezafiu oin-oin ita sei hasoru agora, ho nune’e ami feto jurista iha kompromisu atu apoiu-malu. Susesu hosi feto jurista ida, hanesan susesu feto hotu-hotu nian,” Hatutan.com sita deklarasaun Prezidente atuál Konsellu Administrasaun, Ediana Castela iha komunikadu.

Nune’e mós Vise Prezidente atuál, Satrurnina Belo, hateten Asosiasaun Feto Jurista Timor-Leste halibur membru besik 100, ne’ebé namkari iha Munisípiu ualu.

“Asosiasaun nia riku-soin mak asosiada sira-nia partisipasaun rasik, no asosiada sira hotu tenke selu ninia taxa atu sai membru, nune’e AFJTL bele iha kapasidade finanseiru atu funsiona ho sustentabilidade,” nia hateten.

Serimónia lansamentu ida-ne’e hetan partisipasaun másimu hosi feto jurista sira, jurista feto no ativista seniór, reprezentante hosi entidade públika sira, organizasaun sosiedade sivíl, nune’e mós parseiru dezenvolvimentu sira.

AFJTL nia Estatutu hetan ona rekoñesimentu legál liu hosi eskritura públika iha fulan Marsu 2022. Órgaun sosiál sira hakruuk ba prinsípiu demokrasia no tinan-tinan halo rotatividade hodi asegura Asosiada hotu nia partisipasaun.

Moto ne’ebé AFJTL foti mak “Feto Forte, Justisa Forte”, no valór asosiasaun nian bele rezumu liuhusi liafuan “SADI’IK”, ho nia signifikadu katak: Solidariedade, Apoiu malu, respeitu Diversidade, promove Igualdade, Integridade no Korajen.

AFJTL nakloke ba jurista feto ka hirak ne’ebé identifika a’an nu’udár feto no feto hodi hola parte nu’udár membru Asosiasaun nian.

Feto jurista ne’ebé ho nia nasionalidade estranjeiru no servisu iha Timor-Leste mós elijível atu sai membru.

AFJTL fó mós oportunidade ba maluk feto finalista Direitu sira hodi hamahan-an iha Asosiasaun ida ne’e, no sei fiar katak ho ita-nia hamutuk bele ona hametin futuru feto jurista sira iha Timor-Leste.

Jornalista: Carmelita Isaac