Hatutan.com (28 Maiu 2022), Dili—Tribunal Distritál Díli (TDD) liu hosi alegasaun Ministériu Públiku (MP) ne’ebé reprezenta hosi Prokuradór Rogério Viegas, husu ba Tribunál atu aplika pena multa ba diretór empreza Tixar Unipesoal Lda, arguidu Luis Clementino Xavier ba krime eksplorasaun jogu ilísitu no frauda fiskál, tanba hala’o atividade eksplorasaun jogu slot mákina ne’ebé laiha lisensa no autorizasaun hosi Governu.

MP mós husu ba Tribunál atu atu deside tuir konviksaun Tribunal nian ba arguidu Bernardo Amaral Correia, tanba laiha faktus ne’ebé komprova katak arguidu involve iha atividade eksplorasaun jogu slot mákina refere.

MP husu pena multa tanba faktus provadu katak arguidu loke duni slot mákina, maibé seidauk iha lisensa hosi Governu maske antes ne’e hetan ona aprensaun maibé arguidu kontinua loke jogu slot mákina refere.

Parte defeza ne’ebé reprezenta hosi Juvinál Dias husu ba Tribunál atu deside tuir justisa ne’ebé iha.

Hafoin alegasaun, juiz prezide adi’a julgamentu ba loron seluk hodi rona leitura sentensa.

Ministériu Públiku akuza arguidu na’in-rua ba krime eksplorasaun jogu ilísitu no frauda fiskál ne’ebé previstu iha artigu 322, 314 hosi kódigu penál Timor Leste, tanba laiha lisensa no autorizasaun ba atividade jogu slot mákina.

Audiénsia julgamentu prezide hosi juiz singular Evangelino Belo, MP reprezenta hosi Prokuradór Rogério Viegas no arguidu na’in-rua hetan asisténsia legál hosi Defensór Públiku Juvinal Dias Ximenes.

Jornalista: Carmelita Isaac