Hatutan.com, (02 Juñu 2022), Díli- Departamentu Obstetrísia no Jinekolojia liu husi sentru Kolposkopia Ospitál  Nasionál Guido Valadares (HNGV) deteta pasiente na’in-tolu pozitivu kankru serviks.

Ospitál Nasionál Guido Valadares (HNGV).

Kankru serviks mai husi virus ida naran human paillioma virus (HPV) no tipu virus HPV ne’ebé iha poténsia bá hamosu kankru serviks hanaran Oncogênicos, espesialmenente HPV-16 no HPV-18 no iha porsentu 70 ba kankru serviks.

Xefe departamentu Obstetrisia no Jinekolojia HNGV,  Agusto Junir Gusmão hateten, molok halo lansamentu ba sentru kolposkopia antes ne’e departamentu Obstetrisia no Jinekolojia halo screening bá ema hamutuk 28 no husi ne’e na’in-neen (6) iha sinais pozitivu kankru serviks no parte Departamentu Obstetrisia no Jinekolojia kontinua halo Kolposkopia husi ne’e deteta na’in-tolu (3) mak pozitivu kankru serviks ida ho kankru serviks stadium 3, ida ho kondiloma termal ablation, ida seluk ho pre-Kankru sin 3 no parte médiku sira halo ona biopsy atu hodi hatene loos nia kankru ka lae.

“Screening Kankru ne’e em-prinsípiu atu ita bele deteta ema ne’e Kankru ka lae, inan feton sira ne’ebé ho idade 30-49 laiha moras, maibé sira ne’ebé kaben-na’in no kaben ho idade ki’ik no iha oan barak,” Agusto Junir Gusmão ba jornalista sira iha sentru Kolposkopia HNGV, Díli, Kinta (02/06/2022).

Nia hatutan, inan sira ka la’en sira ne’ebé ho multipartner sira ne’e mós iha risku boot tebes atu kona Kankru tamba ne’e molok halo screening ka kolposkopia sei liu uluk husi faze counseling atu haree sira-nia parte prontu ka lae atu ba faze tuir mai no depois halo screening no kolposkopia nia rezultadu sei halo hikas counseling dala ida tan atu fó korajen atu nune’e uainhira rezultadu pozitivu sei halo oinsá no karik negativu bainhira mak nia bele mai halo hikas check-up.

“Hafoin ita halo screening no kolposkopia ne’e, uainhira negativu tinan-tolu (3) mak sei mai hikas halo check-up no sira ne’ebé pozitivu parte  Ospitál sei halo kedas tratamentu,” Nia dehan.

MS Estabelese Sentru Kolposkopia iha HNGV

Governu liu husi ministériu Saúde (MS), hetan tulun husi Organizasaun Saúde Mundiál (OMS) fasilita ekipamentu no sentru Kolposkopia iha departamentu Obstetrísia no Jinekolojia iha Ospitál Nasional Guido Valadares (HNGV), Díli.

Ministra Saúde, Odete Belo iha nia diskursu hateten, ho estabelesimentu fatin ida-ne’e, hatudu pasu foun ne’ebé Timor-Leste enfrenta tamba liu husi sentru Kolposkopia Timor-Leste iha ona posibilidade atu redús númeru mortalidade no mós redús númeru moras sira ne’ebé iha ligasaun ho kankru seviks ka moras sira  ne’ebé liga ho inan sira.

MS iha dalan lubuk mak antes ne’e halo atu atu redús númeru mortalidade no númeru moras inan sira-nian ne’ebé nia kauza prinsipál mai husi kankru serviks, nune’e ikus mai estabelese ka harii sentru Kolposkopia iha departamentu Obstetrísia no Jinekolojia HNGV.

“Fatin ida-ne’e estabelese atu halo prevensaun no karik ita deteta mós ita bele halo tratamentu ne’ebé mak lais liu ida-ne’e mak ita hakarak. Promosaun saúde importante tebes tamba bainhira ema la ko’alia, la fó hatene no la aviza  bá públiku, fatin ida ne’e sei hela hanesan fatin ne’ebé mak ema mai tamba ema presiza. Tamba ne’e ita lakohi ida-ne’e akontese no husu atu ema hotu liuliu inan sira ne’ebé ho idade produtivu tenke voluntáriamente mai iha sentru ne’e atu hatene nia saúde liuliu halo check-up ba nia saúde liga ho kankru serviks nian,” Ministra Odete Bele hateten.

Xefe Departamentu Obstetrísia no Jinekolojia HNGV, Agusto Junir Gusmão hateten, ekipamentu ne’ebé OMS apoiu mak hanesan kolposkopia, reajente ne’ebé bele tulun deteta lalais de’it iha minutu ida nia laran.

“Ita antes ne’e seidauk iha sentru kolposkopia tratamentu ba inan-feton sira ne’ebé mai ho kankru stadium avansadu, ita hadi’a sira-nia kondisaun no halo transferénsia bá li’ur liu husi servisu junta médiku ne’ebé HNGV iha,” Agusto Junir Gusmão hateten.

Nia hatutan moras kankru ne’ebé HNGV rejista barak liu halo transferénsia bá iha ospitál sira iha Indonézia, Malázia no Singapora.

Tuir planu sentru kolposkopia sei halo atendimentu iha semana ida dala-rua bazeia bá oráriu ne’ebé parte Departamentu Obstetrísia no Jinekolojia HNGV sei fó sai. Sentru ne’e kompleta mós ho kuartu neen (6) hodi halo tratamentu no atendimentu.

Jornalista: Vito Salvador