Hatutan.com, (26 Juñu 2022), Díli-Tribunál Distritál Dili (TDD) liu husi primeiru interrogatóriu ne’ebé hala’o iha Domingu (26/06/2022), aplika medida koasaun Termu Identidade Rezidénsia (TIR) bá arguidu na’in-tolu timoroan ne’ebé deskonfia envolve iha kazu tráfiku umanu.

Lee Mós : PCIC Kaptura Sidadaun Estranjeiru Na’in-rua, Deskonfia Envolve iha Sindikatu Tráfiku Umanu

PCIC akompaña arguidu sira iha TDD. Foto/Hatutan.com

Arguidu na’in-tolu ho inisiál MV, JG,  ho HDS envolve iha sindikatu haruka traballadór timoroan bá  Abudabi, Uniaun Emiradu Árabe, ne’ebé rezulta inan-feton timoroan na’in-hitu  “abadonada” hela iha sidade Abudabi.

Tribunál aplika medida koasaun ne’e, tanba iha primeiru interrogatóriu prienxe rekizitu legál ne’ebé iha, maibé hodi asegura arguidu sira-nia prezensa durante prosesu investigasaun.

Lee Mós : Traballadora Na’in-hitu “Abandona” iha Abudabi

Advogadu privadu, Pedro Apariçio ne’ebé fó asisténsia legal bá arguidu sira  esplika desizaun TDD iha konsekuénsia legál tolu maka hanesan primeiru, arguidu ne’ebé viajen bá estranjeiru mak liu ona loron 15 tenke informa bá Ministériu Públiku, segundu bainhira arguidu sira muda sira-nia hela fatin tenke informa, terseiru bainhira atu troka sira-nia númeru telefone tenke informa bá MP.

“Bá ha’u nia kliente na’in-tolu, ne’ebé maka iha média sosiál iha informasaun ne’e viral teb-tebes, dehan sira halo atividade sira ne’ebé mak hanesan ladún di’ak, ohin, julgamentu ona, no Tribunál deside TIR bá sira,” Advogadu Pedro Aparíçio, hateten bá jornalista sira, hafoin akompaña nia kliente na’in-tolu iha Tribunál.

Iha primeiru interrogatóriu ne’e, MP promove arguidu na’in tolu bá pratika krime tráfico de pessoas, asosiasaun kriminoza ne’ebé previstu iha artigu 163, 188 husi kódigu penal TL.

Advogadu privadu, Pedro Apariçio. Foto/Hatutan.com

Promove mòs arguidu na’in-tolu bá krime ne’ebé previstu  iha artigu 163, númeru 1, ho Asosiasaun Kriminózu, iha artigu 188, Lei Kódigu Penál Timor-Leste.

Iha kuarta (22/06/2022), liu husi mandadu TDD hodi halo buska domisiliáriu no detensaun bá arguidu na’in-tolu iha sira-nia hela fatin hodi detein durante 72 hafoin submete bá primeiru interrogatóriu, tanba deskonfia pratika krime tráfiku umanu no asosiasaun kriminoza.

Audiénsia julgamentu iha primeiru interrogatóriu ne’e, prezide husi juis singular Afonso Carmona, MP reprezenta hosi Prokuradór Domingos Gouveia no Arguidu sira hetan asisténsia legál hosi Defensor Públiku Humberto Alves no Advogadu Privadu Pedro Aparíçio.

Lee Mós : Deskonfia Envolve iha Krime Tráfiku Umanu, PCIC Detein Autór Na’in-tolu

Jornalista: Rogério Pereira Cárceres