Hatutan.com, (27 Juñu 2022), Díli- Komisaun Nasionál Eleisaun (CNE), oras ne’e, iha hela esforsu atu introdús sistema biométriku hodi evita fraude eleitoral no hasae tasa partisipasaun sidadaun sira nian iha eleisaun parlamentar 2023.

Prezidente CNE, José C. Belo Perreira. Foto/Hatutan.com.

Prezidente CNE, José Agostinho Belo bá jornalista sira hafoin hasoru malu ho Prezidente Repúblika iha Palásiu Prezidensiál, Díli, Segunda (27/06/2022), informa CNE hahú introdús ona sistema biométriku ne’ebé agora daudaun kuaze nasaun sira iha mundu uza atu evita deskonfiansa fraude eleitorál no liu husi sistema ne’e sidadaun sira iha ne’ebé de’it bele vota tanba dala barak estudante no traballadór sira ne’ebé bá li’ur foin mak bá la kleur eleisaun fulan oin sira labele partisipa, sira rejistu ona iha Dili, maibé sira labele partisipa.

Prezidente Repúblika fó mós hanoin ruma kona-bá eleisaun sira ne’ebé liu bá no preparasaun eleisaun parlamentár ne’ebé mai, difikuldade no obstákulu ne’ebé iha CNE rejista katak presiza mós atensaun husi Xefe Estadu hanesan mós husi Parlamentu Nasionál, atu nune’e, eleisaun sira tuir mai ne’e CNE preparadu, liu-liu eleitór sira iha diáspora.

Votasaun la’ós obrigatóriu tanba ne’e órgaun eleitoral sira sei halo aproximasaun ho fasilita sira ne’ebé iha atu sidadaun sira ezerse sira-nia votu ho di’ak.

Advertisement

 “Ita iha esforsu atu eleisaun iha Timor-Leste partisipasaun ita-nia sidadaun bele másimu liu, iha problema ida mós kona-bá baze de dadus tanba ne’e mak rekomendasaun husi CNE nian katak presiza ona ita tenke halo mós limpeza bá ita-nia baze dadus ne’ebé kleur demais ona.” José Agostinho Belo hateten

CNE iha ona planu bá halo resenseamentu iha rai-li’ur baá rejistu sira ne’e no proposta ida inklui mós Indonézia tanba foin lalais delegasaun bá li’ur konsege mós vizita Indonézia atu tinan ne’e CNE haree bá terrenu, haree bá situasaun iha posibilidade bele estabelese.

Prezidente CNE ne’e hatutan Xefe Estadu disponivel odamatan nakloke atu ko’alia ho CNE ka parseiru ruma ne’ebé iha hanoin ruma sempre hakarak diskute asesór sira mós iha esperiénsia ne’ebé natoon, atu nune’e, buka solusaun ida no lejizlasaun mós bele kobre asuntu sira ne’ebé seidauk iha.

CNE Sei Kria Sentru Votasaun Sensivel Bá Ema ho Defisiénsia

Prezidente CNE hateten iha sorumutuk ne’e ko’alia ho Xefe Estadu atu hamutuk  ho Governu haree hela liu-liu bá ema sira ne’ebé ho kondisaun defisiénsia matan no defisiénsia sira seluk oinsá atu bele introdús ona sistema brind nune’e ajuda sira bele iha opsaun ba partidu ne’ebé sira rasik hili.

Advertisement

Ho sistema brind ema ne’ebé hanesan defisiénsia sira ne’e bele mós vota ho konsiénsia bele mós sira ne’ebé akompañamentu ne’e mak bele dudu sira vota bá sentru sira ne’ebé hakarak, entaun CNE hakarak resolve buat sira ne’e ho rasionál entaun presiza mós tenke prepara kondisaun.

“Sentru votasaun ne’ebé la sensivel bá ema ho defisiénsia ida ne’e hanesan rekomendasaun ne’ebé ami hato’o mós bá Xefe Estadu atu bele servisu hamutuk ho Ministériu sira liu-liu Governu nune’e sentru votasaun ne’ebé iha aban bainrua ita estabelese karik ita sensivel mós kona-bá ita-nia maluk defisiénsia sira” José Agostinho Belo dehan.

Xefe Estadu promete bainhira iha enkontru ho Xefe Governu no membru Governu sira sei tau matan bá asuntu no prosesu sira ne’e CNE iha.

Jornalista: Vito Salvador

Advertisement