Hatutan.com, (24 Juñu 2022), Díli- Primeiru-Ministru Interinu no Ministru Prezidénsia Konsellu Ministru (MPCM), Fidelis Leite Magalhães, informa Governu no órgaun kompetente Governu nian halo hela servisu atu bele lori solusaun bá problema traballadora timoroan ne’ebé “abandonada” iha sidade Abudabi, Uniaun Emiradu Árabe inklui traballadór timoroan seluk  ne’ebé sai vítima bá atividade ilísita internasionál sira ne’ebé bele fó ameasa bá sira-nia moris.

Lee Mós : Ramos-Horta Husu Governu Lori Fila Traballadora Timoroan iha Abudabi

Primeiru-Ministru Interinu no Ministru Prezidénsia Konsellu Ministru (MPCM), Fidelis Leite Magalhães. Foto/Hatutan.com

Ministru  Fidelis Leite Magalhães bá jornalista sira iha Palásiu Prezidensiál, Sesta (24/06/2022), hateten, kona-bá asuntu no kondisaun traballadór timoroan sira ne’ebé iha rai-li’ur inklui hirak ne’ebé konforme informasaun dehan lori ba iha ne’ebá liu husi dalan ilísita no sujeita bá iha tratamentu ne’ebé la di’ak iha rai-li’ur, asuntu hirak ne’e hetan atensaun boot husi Governu no órgaun kompetente Governu nian.

Nia afirma iha kestaun rua ne’ebé ipotétikamente, maibé ne’e lá’os kestaun hanoin ka la hanoin ne’e kestaun devér Governu nian atu halo atuasaun bá ninia sidadaun sira, maibé agora prematura liu atu ko’alia ka komenta asuntu ida ne’e bainhira Ministériu hanesan MNEK, ho órgaun kompetente sira hanesan Provedoria Direitu Umanu no Justisa (PDHJ), Ministériu Justisa, ho ligasaun servisu seguransa internasionál nian sira haree hela asuntu ida ne’e.

“Preokupasaun no devér Governu nian mak tau matan ba moris di’ak ninia sidadaun iha fatin hotu-hotu, no mós liu-liu bá sira-nia seguransa pesoál. Ne’e devér ida Governu nian atu halo.” Fidelis Leite Magalhães hateten.

Lee Mós : PCIC Kaptura Sidadaun Estranjeiru Na’in-rua, Deskonfia Envolve iha Sindikatu Tráfiku Umanu

Jornalista: Vito Salvador