Hatutan.com (27 Juñu 2022), Díli- Kazu krime abuzu  podér no partisipasaun ekonomia iha negósiu ne’ebé deskonfia involve Adjuntu Prezidente Autoridade RAEOA ho inisiál MN, daudaun ne’e, Komisaun Anti-Korrupsaun (CAC, sigla portugés) halo ona relatóriu finál hodi aprezenta bá investigadór no karik sei falta provas balun  presiza kompleta molok hetan apresiasaun.

Lee Mós : Kazu Abuzu Podér iha RAEOA Tama Ona Faze Ezame Telefónika

Ekipa Investigadór CAC hala’o investigasaun iha rezidénsia MN iha Sikluli, RAEOA.Foto/Dok.CAC.

“Prosesu investigasaun daudaun iha faze relatóriu finál iha ne’ebé investigadór sei aprezenta bá investigadór sira hotu hodi haree no karik sei falta iha parte ruma presiza kompleta, maka foin tama iha faze apresiasaun no ikus liu submete ba komisáriu CAC hodi husu apresiasaun finál no remese bá Ministériu Públiku,” Diretór Jerál Investigasaun CAC, José Verdial bá Hatutan.com iha ninia knar fatin, Farol-Dili, Segunda (27/06/2022).

Maske seidauk konklui relatóriu finál, maibé bazeia bá provas dokumental no sasin hamutuk 10 resin, CAC konsege identifika ona arguidu na’in-rua ne’ebé involve direita iha kazu refere.

Iha loron 18 fulan-Janeiru 2022, Ekipa Investigadór CAC nian lidera hosi Diretór Investigasaun Kriminál (UIK), Emílio Quintas, akompaña hosi Polísia Nasionál Servisu Investigasaun Kriminál (PNSIK) ezekuta no asegura mandadu Tribunál Rejiaun Administrativa Espesiál Oé-Cusse Ambeno (RAEOA) ho númeru NUC 0057/21.PDOEC loron 17/12/2021.

Mandadu ne’e hasai husi juis Yudi Pamungkas fó podér bá investigadór CAC hodi halo operasaun buska no apreensaun bá suspeitu diretór emprezáriu na’in-ida (1) hanesan mós sobriñu hosi suspeitu seluk nudár Jerente Seniór RAEOA/ZEESM ka Adjuntu Prezidente Autoridade ho inisiál MN ho ninia espoza (co-autór ne’ebé posibilidade bele sai suspeitu), tanba deskonfia envolve iha kazu krime korrupsaun.

Lee Mós : Kazu Abuzu Podér iha RAEOA, CAC Konstitui Arguidu Na’in-rua

Mandadu ba buska iha domisiliáriu no prende sasán ne’e, juis haruka no fó orden atu halo buska iha domisiliáriu ho posibilidade ba prende sasán ne’ebé mak iha ligasaun ho faktu hirak ne’ebé investiga ona, tuir dispozisaun iha art 37 no nú 2, hosi KRTL, iha artigu 226 no 1, al. c) artigu 108 no 1 artigu 170, hotu-hotu hosi KPP ba suspeitu ninian hela fatin.

Bá kumprimentu efetivu bá mandadu ida-ne’e, iha autorizasaun bá asesu iha dependénsia hotu-hotu, inklui kofre, fatin hirak rai sasán nian, veíkulu hirak ne’ebé uza hosi suspeitu, bele fera odamatan, hakat sai hosi moru no neutraliza animál sira, se presiza duni ho observánsia ba dispozisaun iha artigu 169 no 170 hosi KPPTL.

Iha operasaun buska domisiliáriu no apreensaun ne’e, investigadór CAC halibur dokumentu lubun boot; konta bankária, osan cash ho montante boot, dokumentu kompañia nian, telefone no dokumentu sobre projetu eletrifikasaun, no projetu balun iha RAEOA/ZEEMS ne’ebé suspeitu ho ninian espoza nian kompañia manán nu’udár evidénsia no objetivu krime.

Kazu ne’e rasik hetan delegasaun kompeténsia hosi Prokuradór Distritál Oé-Cusse hodi fó delegasaun ba investigadór CAC tuir podér lei hodi halo prosesu investigasaun ho kuidadozu hanesan rona sasin sira, halibur dokumentu no halo survelénsia ba iha intervenenti prosesuál liu-liu arguidu nian bens sira.

Lee Mós : CAC Kontinua Investiga Kazu Abuzu Podér iha RAEOA

Jornalista : Carmelita Isaac