Hatutan.com, (09 Jullu 2022), Díli—Primeiru Ministru (PM) Taur Matan Ruak hameno ba inan-aman benefisiáriu sira ne’ebé asesu ba subsídiu foun $50, atu uza osan oitoan ne’e ba nesesidade ne’ebé nesesáriu no la’ós uza fali ba lia ka buat seluk.

Xefe Governu, Taur Matan Ruak hala’o lansa pagamentu subsídiu foun $50 ba ferik-katuas ho Emah o Defisiénsia iha Suku Maumeta, Postu Administrativu Bazartete Munisípiu Likisá, Kinta (07/06/2022). Foto/Média PM.

“Xefe Governu hameno ba inan-aman benefisiáriu sira, atu uza osan oitoan ne’e ba nesesidade ne’ebé nesesáriu invés uza fali ba lia ka buat seluk,” Hatutan.com sita intervensaun Xefe Governu iha serimónia lansamentu pagamentu subsídiu foun iha Suku Maumeta, Postu Administrativu Bazartete  Munisípiu Likisá, Kinta (07/06/2022) liu hosi komunikadu.

Lee Mós: Baze Hosi Subsídiu ba Idozu no Inválidus

Pagamentu subsídiu foun $50 kada fulan ba ferik-katuas no maluk defisiente sira, nu’udár prestasaun sosiál hosi Estadu liuhosi Governu ba sidadaun sira ne’ebé lei garante.

Advertisement

Xefe Governu agradese ba Ministériu Solidariedade Sosiál no Inkluzaun (MSSI), Banku Nasionál Komérsiu Timor-Leste (BNCTL), Institutu Nasionál Seguransa Sosiál (INSS) no Autoridade lokál sira ba esforsu hodi bele realiza lansamentu subsídiu foun $50 ba ferik-katuas no maluk defisiente sira.

Taur Matan Ruak dehan, ho rekursu finansas oitoan ne’ebé Estadu iha, la fásil ba Governu atu aumenta subsídiu hosi $30 ba $50, enkuantu iha sei iha nesesidade seluk ne’ebé Governu presiza mós tau atensaun,maibé ho kontribuisaun Parlamentu Nasionál nian no Prezidente Repúblika nian, benefisiáriu sira bele simu $50 kada fulan ne’ebé simu kada fulan neen dala ida ho totál $300.

Hosi sorin seluk, Diretór Solidariedade Sosiál Munisípiu Lautém (CSSML), Paulo da Silva Pinto, informa ba Hatutan.com katak, Oráriu ne’ebé mak determina hosi BNCTL Sukursál Munisípiu Lautém, hahú 07 Jullu 2022 komesa selu ona subsídiu Ferik-Katuas no Ema ho Defisíensia sei remata iha 12 Agostu 2022.   

“Sentru Solidariedade Sosiál Munisípiu Lautém mós hakarak informa katak BNCTL sei la ezizi ba benefisiáriu sira Ferik-Katuas no Ema ho Defisíensia tuan no foun atu aprezenta Billete Identidade (BI) ba pagamentu periudu ida-ne’e. Maibé  benefisiariu sira sei iha tempu tinan ida to’o 29 Maiu 2023, atu aprezenta identidade seluk hanesan Billete Identidade ka Passaporte konforme instrusaun númeru 05/2017 no autorizasaun hosi BCTL ba BNCTL, ba abertura konta no retensaun idade,” Paulo da Silva Pinto, hateten liu hosi telefónika.

Lista elijível ka lista pagamentu aprovadu ba subsídiu Ferik Katus no Ema ho Defisíensi inklui lista adisionál ba Faze Primeiru ne’ebé MSSI- INSS fó-sai katak ba Munisípiu Lautém ne’e ho totál  hamutuk tuir kategoria ferik-katuas no ema ho defisiénsi mak hanesan tuir mai ne’e:

Advertisement

Sumáriu Ferik-Katuas no Ema ho Defisiénsia Faze 1, 2022 Munisípiu Lautém

Sumáriu Lista Adisionál Ferik-Katuas no Ema ho Defisiénsia Faze 1, 2022 Munisípiu Lautém

Totál Jerál Ferik-Katuas no Ema ho Defisiénsia Ba Munisípiu Lautém ba faze 1 tinan 2022, ferik Katuas hamutuk 5.980, Ema ho Defisiénsia 292 no totál jerál 6.272.

Jornalista: Vito Salvadór

Advertisement