Hatutan.com, (18 Jullu 2022), Díli—Alumni Parlamentu Foinsa’e Timor Leste (APFTL) realiza formasaun kona-bá Edukasaun Sívika ba membru APFTL ho joven sira seluk hamutuk na’in-25 kompostu hosi mane na’in-sia no feto na’in-16.

Alumni Parlamentu Foinsa’e Timor Leste (APFTL) realiza formasaun kona-bá Edukasaun Sívika ba membru APFTL ho joven sira seluk hamutuk na’in-25 kompostu hosi mane na’in-sia no feto na’in-16, durante loron tolu, hahú hosi loron-15 to’o 17 fulan-Jullu tinan 2022 iha Sede APFTL, Bekora Díli. Foto/APFTL.

Formasaun ne’e hala’o durante loron tolu, hahú hosi loron-15 to’o 17 fulan-Jullu tinan 2022 iha Sede APFTL, Bekora Díli.

Lee Mós:APFTL Sei Halo Advokasia Ho Governu Mellora Setór Edukasaun

Objetivu hosi formasaun ne’e maka, hasa’e membru APFTL no foin-sa’e sira seluk nia koñesimentu oinsá atu forma joven sira sai sidadaun síviku, justu no responsabilidade iha Sosiedade no nasaun.

“Liuhosi formasaun Edukasaun Sívika bele hasa’e ita-boot sira-nia koñesimentu, talvez ita rona liafuan Edukasaun hosi ita-nia família desde ita moris mai, edukasaun ne’e la’o ona no edukasaun ne’e mais importante ba ita-nia an no mundu,” Hatutan.com sita liafuan Prezidente APFTL, Zaulino Gomes da Silva bainhira halo abertura ba formasaun ne’e, iha komunikadu.

Formasaun sira hanesan ne’e, hola parte iha edukasaun informál sira buat balun ne’ebé la introdús iha eskola ema bele aprende no introdús iha formasaun sira hanesan ne’e.

Zaulino Gomes da Silva agradese ba Governu liuhosi SEJD, tanba bele apoia joven sira-nia atividade no enkoraza partisipante sira atu labele lakon esperansa hodi aprende  tanba joven maka rekursu ba rai ida-ne’e.

Iha fatin hanesan reprezentante SEJD liuhosi Diresaun Asosiativizmu Juventude hateten, Edukasaun Sívika bele muda ema nia hahalok sai ema ne’ebé iha responsabilidade ba oraganizasaun ne’ebé ema ne’e hola parte ba no ba nasaun.

Husu ba partisipante sira hodi tuir formasaun ne’e no aproveita didi’ak atu bele kapasita an liuhosi formasaun ne’e hodi bele hadi’a-an iha sosiedade.

Formasaun ne’e fasilita hosi membru APFTL Cesar Ferreira Amaral no hetan apoiu hosi Sekretaria Estadu Juventude no Desportu (SEJD).

Jornalista: Rogério Pereira Cárceres