Hatutan.com, (15 Jullu 2022), Díli– Prezidente Repúblika (PR), José Ramos-Horta  ho lider karizmátiku Kay Rala Xanana Gusmão, husu bá timoroan hotu atu hatoman an halo leitura mesak atu bele koñese kle’an liután dezenvolvimentu siénsia sira.

Prezidente Repúblika (PR), José Ramos-Horta ho lider karizmátiku Kay Rala Xanana Gusmão, halibur malu ho labarik Estudante sira iha atividade Feira Livru iha Palásiu Prezidensiál, Sesta (15/07/2022). Foto/Hatutan.com

Liuhusi atividade feira  bá livru ne’ebé organiza husi Gabinete Asesoria Edukasaun, Palásiu Prezidensiál hodi komemora loron aniversáriu CPLP bá da-26, Sesta (15/07/2022), PR Ramos-Horta ho Xanana Gusmão, husu timoroan sira tenke ábitu halo leitura hodi aprofunda koñesimentu iha siénsia atu nune’e bele kontribui mós bá dezenvolvimentu nasionál iha seitor hotu ne’ebé Estadu no Governu presiza.

Prezidente Repúblika, José Ramos-Horta hateten, livru iha Timor-Leste sei menus bá labarik sira atu lee, ne’e mak Estadu nia preokupasaun, maun boot Xanana, Governu, Ministeriu Edukasaun Juventude no Desportu (MEJD) atu haree  labarik oan sira gosta leitura. Tamba ne’e intensaun husi Feira livru ida ne’e mós atu haree mós bá preokupasaun ida ne’e, la’ós de’it bá labarik sira, maibé bá sosiadade tomak.

Horta hateten, sosiedade Timorense ladún lee no karik imi bele mós haree karik ema hotu-hotu gosta lee produsaun jornál sira bele boot liu tan. Maibé agora ema ladún lee, no sosiedade ladún lee, jornál sira ema iha Díli mak lee de’it no kuaze iha foho ladún lee no ida-ne’e la’ós iha Timor de’it, kuaze rai bara-barak iha mundu falta ábitu leitura.

“Feira mak ne’e duni atu halo promosaun bá leitura, neineik ita bele haree ita-nia sosiedade sei muda, hotu-hotu gosta literatura, gosta poezia, no ohin ita-rona maun boot Xanana nia poezia,” José Ramos-Horta haktuir.

Xefe Estadu rekoñese dezafiu ida iha Timor-Leste mak folin livru karun, tanba ne’e Governu no Estadu tenke buka meius atu halo livru sira ne’ebé bele asesivel tuir ida-idak nia ekonomia tanba bainhira livru karun ema hanoin atu gasta osan tanba nia hanoin atu hola foos ruma ai-farina inklui ai-han seluk.

Iha ámbitu selebrasaun aniversáriu CPLP ne’ebé Prezidénsia Repúblika liu husi Gabinete Asesoria Asuntu Edukasaun organiza feira livru hodi halo promosaun bá leitura ne’ebé partisipa husi estudante hotu ne’ebé mai husi munisípiu.

Biban ne’e, Kay Rala Xanana Gusmão hateten hatoman an halo leitura mesak atu bele iha koñesimentu hodi loke ema nia neon bá siénsia ne’ebé iha.

Xanana haktuir nia nunka halo leitura iha universidade no la enfrenta kursu iha universidade, maibé liu husi lee mesak nia manan koñesimentu ne’ebé lori valór bá moris sosiedade no nasaun nian.

“Hein katak ho feira livru ida-ne’e bele motiva labarik sira jerasaun ohin loron nian kuda fini lee tamba kultura Iee livru ne’e importante,” Xanana Gusmão hateten.

Xanana fó pparabéns bá Prezidente Repúblika bá inisiativa murak ne’e no parabéns áa hotu-hotu ne’ebé organiza feira livru ida ne’e.

Iha feira livru ne’e lider karizmátiku Kay Rala Xanana Gusmão lori mós poezia tolu mak hanesan Mulher Negra, Liberdade no ida ikus liu mak kona-bá Jerações.

Feira ba livru hetan kolaborasaun husi MEJD, Embaixada Portugál, Institutu Camões, no organizasaun sosiedade sivíl lubuk ida hanesan Oxfam, Care Internasionál, TimorAid inklui mós ho organizasaun no movimentu sira seluk.

Jornalista: Vito Salvadór