Hatutan.com, (19 Jullu 2022), Díli—Tribunál Distritál Díli (TDD) iha Tersa 19 fulan ne’e, liu hosi juiz kolektivu Ercilia de Jesus, Albertina Neves, Evangelino Belo hala’o primeiru julgamentu ba krime falsifikasaun domentu no abuzu de konfiansa agravadu ne’ebé deskonfia involve arguidu FFV, tanba efetua kartaun débitu kliente Banco Nacional Ultramarino (BNU) hodi halo levantamentu osan la hó autorizasaun hosi kliente na’in-neen.

Foto Ilustrasaun Google.

Kliente na’in-neen ne’e mak hanesan Marcelino Maia, Tome de Sousa, Ande da Costa Calau, Danila Moniz, Maria da Costa (matebian) no Leonel Gonçalves.

Lee Mós:Tribunál Aplika Pena Suspensaun Tinan Tolu ba Arguidu Falsifika Karimbu BNU

Iha sala audiénsia, arguidu konfesa no rekoñese katak nesesidade mak obriga arguidu, tanba ne’e arguidu foti kliente nia osan liu hosi levantamentu kartaun débitu, tanba maioria kliente hirak ne’e mate ona no osan la foti durante tinan lima nia laran.

Advertisement

Meius ne’ebé arguidu uza hodi foti osan ne’e mak liu hosi dalan ativa fali kartaun débitu ne’ebé blokeadu ona, liu-liu ba kliente hirak ne’ebé mate ona tanba maske sira la ba foti osan maibé fulan-fulan osan tama, nune’e arguidu aproveita hodi reativa kartaun débitu no halo transferénsia hosi konta órden ba konta.

“Faktus loos hotu, tanba buat ne’ebé konsta iha akuzasaun mai hosi ha’u nia auto deklarasaun ne’ebé ha’u halo perante audit. Maibé, diferente iha valór prezuizu tanba tuir relatóriu audit ne’ebé BNU halo ba ha’u katak, totál prezuizu hamutuk $16.000 no ha’u selu ona $10.000 falta $6.000. Tanba ne’e, ha’u hatama pedidu ba BNU hodi estabelese konkordánsia ida katak restu ne’e ha’u selu tuir prestasaun mensál, maibé sira la responde no ikus-mai hasai ha’u,” arguidu esplika iha audiénsia.

Maibé iha kliente balun hanesan matebian Vitória Brites nia oan Cirstovão Pereira mak haruka arguidu halo levantamentu ho montante $5.000 no arguidu intrega osan no kartaun débitu ba kliente ne’e, maske la hó prokurasaun.

Nune’e mós koordenadór komersiál BNU, Jacinto Soares da Silva hateten bainhira BNU log atividade tranzaksaun foin detekta katak, iha frauda ka levantamentu hosi konta ne’ebé antes ne’e blokeadu ona, maski ema seluk labele halo maibé funsionáriu BNU bele halo no loke.

“Ho konfiansa tomak ne’ebé banku iha, oferese ba arguidu tanba ho perfil ne’ebé di’ak hodi bele hetan asesu ba transaksaun hotu. Tanba ne’e, ho skill ne’ebé iha, arguidu halo ida-ne’e la hó ajuda hosi funsionáriu seluk, tanba só arguidu de’it mak iha perfil ne’ebé di’ak hodi asesu ba transaksaun hotu,” sasin deklara.

Advertisement

Hafoin rona sasin, TDD adi’a hikas julgamentu ba loron seluk hodi kontinua rona sasin sira seluk.

Iha kazu ne’e, Ministériu Públiku (MP) ne’ebé reprezenta hosi Prokuradór Nelson Carvalho akuza arguidu ba Pratika krime falsifikasaun dokumentu ka notasaun téknika dala 11, abuzu konfiansa agravadu ne’ebé previstu iha artigu 303, 257 hosi kódigu penál Timor Leste (TL).

Jornalista: Carmelita Isaac

Advertisement