Hatutan.com (21 Jullu 2022) Díli—Primeiru-Ministru (PM) Taur Matan Ruak, Kinta ne’e iha Palásiu Governu, simu Embaixadora Timor-Leste nian ba  Austrália, Inês Almeida akompañadu hosi Kónsul Onoráriu Timor-Leste  nian  ba Austrália Sul (Adelaide) Satish Dasan, Jerente Jenerál Grupu HR-Compliance, Morna Young, Jerente Grupu Planta Stawell hosi Victoria, Shane  Wittman no  responsavel hosi Hazbon Recruitment Pty Ltd, Hazel Kristeria, lori kompañia Thomas Foods International ne’ebé iha inisiativa hakarak investe iha Timor-Leste (TL) iha área produsaun na’an.

Primeiru-Ministru (PM) Taur Matan Ruak, simu Embaixadora Timor-Leste nian ba Austrália, Inês Almeida akompañadu hosi Kónsul Onoráriu Timor-Leste nian ba Austrália Sul (Adelaide) Satish Dasan, Jerente Jenerál Grupu HR-Compliance, Morna Young, Jerente Grupu Planta Stawell hosi Victoria, Shane Wittman no responsavel hosi Hazbon Recruitment Pty Ltd, Hazel Kristeria, lori kompañia Thomas Foods International ne’ebé iha inisiativa hakarak investe iha Timor-Leste (TL) iha área produsaun na’an. Foto/Média PM.

Iha enkontru ne’e Embaixadora Inês introdús ba Xefe Governu kona-bá interese kompañia Thomas Foods International ne’ebé hakarak atu investe iha Timor-Leste iha tempu oin mai iha prosesamentu naan karau, bibi, tanba ne’e reprezentante kompañia ne’e hakarak vizita Timor-Leste atu haree besik Timor-Leste nia kondisoins, maibé ba daudaun ne’e kompañia sei fokus uluk selesiona traballadór timoroan atu ba serbisu iha sira nia kompañia kona-ba prosesamentu naan.

Xefe Governu sente kontente no agradese ba Kompañia Thomas Foods International ne’ebé  iha interese atu mai loke investimentu iha Timor, no hanesan Governu prontu fasilita kria kondisoins.

Aleinde ne’e agradese mós tanba kompañia iha interese atu simu traballadór timoroan ba serbisu iha kompañia ne’e rasik.

“Ha’u nu’udar Embaixadora no Konsul Onoráriu ita-nian iha Adelaide lori kompañia ida Thomas Foods International ne’ebé boot tebetebes, tinan-tinan sira halo sira nia lukru billaun 2  ne’e hanesan kuaze ita-nia orsamentu totál gastu ba iha Timor-Leste. Sira halo aprezentasaun fokus liu ba prosesa naan karau, bibi malae, no bibi timur no sira nakloke atu investe iha ne’e, mas agora sira fokus liu mak oinsá lori Timoroan sira ba serbisu iha sira-nia kompañia, sira kontente tebetebes ho vizita ida ne’e,” Hatutan.com sita deklarasaun Embaixadora Inês iha komunikadu.

Embaixadora  ne’e dehan sira foin koñese malu de’it iha semana tolu liu ba, bainhira nia to’o Adelaide ba vizita sira, Konsul Onoráriu aprezenta, nia konvida sira, no dehan, sei mai Timor-Leste, sira hakarak nakloke an semana tolu mai duni, hatudu katak kompañia iha vontade.

To’o agora laiha trabalhador Timoroan ida serbisu iha sira nia fatin, traballadores kuandu ba Austrália sira bolu traballadór sazonal, ba liu ai-fuan ou selae ku’u alfase ho modo seluk tan, iha mós traballadór balu halo serbisu iha fabrika naan nian mas uitoan de’it, agora sira nu’udar kompañia boot nunka Timoroan iha ne’ebá, ema sira husi rai sira seluk hanesan Vanuatu, Fiji Tonga, Tailándia, Samoa, mas ne’e foin primeira vez sira hakarak Timoroan.

Horisehik sira hahú entrevista ona ba ema Timoroan 15,  depois sira hato’o ba iha Primeiru-Ministru katak iha semana oin, sira sei mai haree tan oinsá rekruta Timoroan, agora Austrália presiza ema barak mak ba serbisu entaun Timor hanesan loke ona dalan atu sira mai rekruta Timoroan.

Nu’udar Xefe de Misaun halo apelu boot ida ba Timoroan sira ne’ebé hetan oportunidade atu ba Austrália, ne’e oportunidade di’ak ida nakloke Timoroan hotu bainhira ba Austrália, favór boot ida komportamentu, disiplina tenke iha nu’udár Timoroan tanba ba lori Bandeira TL, tenke respeita, primeiru tenke obdese lei Austrália nian, segundu mós disiplina bainhira ba serbisu iha ema nia fatin tanba oportunidade úniku aban-bainrua la hatene saida mak akontese bele taka dalan, entaun ba sira na’in lima ne’ebé mak agora kompañia sei prepara atu ba, sira mak tenke iha responsabilidade dever atu oinsá serbisu di’ak, komitmentu di’ak.

Ohin kompañia fó tiha ona komitmentu ba Primeiru-Ministru katak sira sei haree trabalhadores sira ne’e di’ak, sira sei manán osan di’ak tuir saida mak iha Austrália fó no sira lakohi esplora Timoroan sira no sira mós agradese tanba TL loke ona odamatan atu sira mai foti Timoroan sira ba serbisu iha Austrália.

Jornalista: Rogério Pereira Cárceres