Hatutan.com (25 Jullu 2022) Díli—Tribunál Distritál Díli (TDD) liu hosi juiz kolektivu José Gonçalves, Argentino Nunes, Alvaro M. Freitas kontinua hala’o julgamentu ba krime abuzu de konfiansa agravadu ne’ebé deskonfia involve eis supervizór NGO Moris Rasik, arguidu AdJG tanba deskonfia halo lakon osan NGO Moris Rasik nian ho montante $5.284.

Brankas rai osan. Foto ilustasaun google.

Iha julgamentu kontinuasaun ne’e, eis tezoreira NGO moris rasik Fransisca de Almeida hanesan sasin rekoñese katak, antes ne’e nia parte servisu hamutuk ho Nelson Maria dos Santos ne’ebé iha momentu ne’ebá sai hanesan Supervizór Moris Rasik nian iha Aileu, tanba ne’e tuir regra ne’ebé iha katak xave brankas sasin mak kaer no kódigu supervizór maka kaer.

Maibé, liu tinan ida arguidu ba troka fali Nelson Maria dos Santos nia fatin iha Aileu no ikus-mai mudansa pozisaun nafatin akontese no Nelson Maria ba troka fali arguidu hodi muda regra katak sasin maka kaer kódigu brankas no Nelson Maria maka kaer duni kódigu brankas ne’e.

Bainhira hand over pozisaun refere, osan ho montante $5.284 lakon ona tanba atu loke brankas hodi hatudu ba supervizór foun osan laiha ona.

“Momentu troka pozisaun Nelson atu ba troka arguidu, ha’u loke brankas hamutuk ho sira na’in rua, maibé osan iha brankas laiha ona, tanba ne’e ha’u tanis no husu se mak foti osan refere,” sasin deklara iha sala audiénsia.

Sasin mós deklara katak, maski troka pozisaun entre Nelson Maria ho arguidu AdJG maibé brankas inklui kódigu nunka troka, normalmente bainhira atu foti osan ema ne’ebé kaer xave no kaer kódigu iha oin mak foin bele foti osan, tanba xave mós ida de’it.  

Hafoin rona sasin, Tribunál adi’a hikas julgamentu ba loron seluk hodi kontinua rona sasin sira.

Antes ne’e, Ministériu Públiku (MP) ne’ebé reprezenta hosi Prokuradór Osório de Deus akuza arguidu ba prátika krime abuzu de konfiansa agravadu ne’ebé previstu iha artigu 257 hosi kódigu penál Timor Leste (TL), tanba deskonfia halakon osan NGO Moris Rasik ho montante $5.284.

Audiénsia julgamentu prezide hosi juiz kolektivu José Gonçalves, Argentino Nunes, Alvaro M. Freitas, MP reprezenta hosi Prokuradór Osório de Deus no arguidu hetan asisténsia legál hosi Defensór Públiku (DP) Joana Cristina Pinto.

Jornalista: Carmelita Isaac