Hatutan.com, (22 Jullu 2022), Díli—Tribunál Distritál Díli (TDD) iha Sesta 22 fulan ne’e, liu hosi juiz kolektivu Afonso Carmona, Evangelino Belo no Ercilia de Jesus, hala’o julgamentu ba krime omesídiu ne’ebé deskonfia involve arguidu na’in-ha’at ho inisiál AC, NC, MS no DC tanba oho vitima CL, hakanek FC no estraga lezada RC, EB, VS no SS nia uma iha konfrontu entre Grupu Arte Marsiais (GAM) iha Ermera.

Konfrontu. Foto Ilustarasaun Google.

Iha audiénsia julgamentu kontinuasaun ne’e, lezada RS deklara momentu ne’ebá arguidu sira hamutuk ho ema lubuk ida hodi ataka lezada sira nia uma ne’ebé lokaliza iha Ermera hodi sobu lezada nia uma no arguidu AC ta’a lezada nia aman FC iha parte kabas, arguidu NC ta’a iha parte Hasan no MC ta’a iha parte liman.

“Ami iha relasaun familia maske ha’u tuir Arte Marsiál ida maibé momentu sira ataka la ko’alia buat ida. Derrepente tuda uma hodi hakilar serang no arguidu na’in-tolu ta’a ha’u-nia aman iha parte hasan, liman no kabas tanba ne’e ho pániku ha’u halai ba kous ha’u-nia aman ne’ebé monu hela iha odamatan no arguidu DM tuda ha’u hosi liur maibé ha’u la preokupa tanba ha’u foku ba ha’u nia aman nia kondisaun,” lezada deklara ba Tribunál.

Nune’e mós, lezadu Saturnino Soares deklara momentu ne’ebá nia ho matebian mak hamutuk iha kuartu ida, derrepente rona ema barak hakilar no tuda uma lori mós katana, rama ambon ema balun falun oin metin no lezadu konsege haree arguidu AC no FC ne’ebé hana lezadu iha liman no hana matebian iha parte rentos.

Advertisement

“Sira hana matebian kona iha rentos, tanba ne’e ha’u ho matebian halai fahe-malu. Bainhira matebian halai sai hosi odamatan oin sira ta’a mate nia iha oin. Ha’u konsege la haree se mak ta’a tanba oin taka metin,” lezadu ne’e deklara.

Hafoin rona lezadu sira, Tribunál adi’a hikas julgamentu ba loron seluk hodi kontinua rona lezadu sira seluk.

Antes ne’e, tuir akuzasaun hosi Ministériu Públiku (MP) katak, iha loron 06 fulan Dezembru tinan 2010, arguidu na’in-haat hamutuk ho ema deskoñesidu halo ataka ba lezadu sira nia hela fatin ne’ebé lokaliza iha Ermera hodi tuda, sobu uma, oho vitima CL no hakanek lezadu sira seluk.

Tanba ne’e, Ministériu Públiku (MP) ne’ebé reprezenta hosi Prokuradór Simão de Brito akuza arguidu sira ba pratika krime omesídiu ne’ebé previstu iha artigu 138 hosi kódigu penál TL.

Audiénsia julgamentu prezide hosi juiz koletivu Afonso Carmona, Evangelino Belo no Ercilia de Jesus, MP reprezenta hosi Prokuradór Simão de Brito no arguidu hetan asisténsia legál hosi Defensór Públiku.

Advertisement

Jornalista: Carmelita Isaac