Hatutan.com (26 Jullu 2022) Díli—Ministériu Justisa (MJ) halo ona alterasaun ba Estatutu Defensoria Públiku (DP) hodi muda artigu balun liu-liu sai autómu finanseiru no patrimoniál rasik, tanba antes ne’e iha MJ nia okos, maibé sei aprezenta ba Konsellu Ministru (KM) hodi hetan aprovasaun.

“Estatutu Defensoria Públiku ami halo ona alterasaun no prontu ona atu submete ba KM,” Ministru Justisa, Tiago Amaral Sarmento hateten hafoin enkontru iha Gabinete MJ, Colmera, Tersa (26/07/2022).

Lee Mós: MJ Esforsu Muda Estatutu Defensoria Públika Bá Autonomu Finanseiru

Iha alterasaun ne’e, foka liu ba sira nia automia finanseira ho patrimonial, nune’e sira bele jere rasik sira nia osan, tanba antes ne’e maski DP no advogadu temi ona iha Kontituisaun RDTL nu’udár instituisaun autónomu, maibé durante ne’e sira iha hotu MJ nia okos, tanba ne’e presiza halo alterasaun ba sira nia estatutu.

Alterasaun ne’e importante tebes no tenki hetan aprovasaun hosi KM ho razaun primeiru lei fó dalan nune’e DP bele jere rasik orsamentu tuir nesesidade.

Segundu, lei organizasaun Judisiáriu ezije iha kada Munisípiu tenki iha Tribunál ne’ebé automatikamente tenki iha Juiz, Prokuradór no DP, tanba ne’e sira tenki iha autonomia finanseiru rasik nune’e bele jere no hatan lalais ba nesesidade DP nian.

Hosi alterasaun ne’e, sei la afeta ba MJ tanba bainhira sira iha autonomia rasik maka orsamentu ne’ebé alokadu ba MJ sei responde fali ba nesesidade seluk hanesan rezolve problema konservatóriu, notariadu no sira seluk tán.

Jornalista: Carmelita Isaac