Hatutan.com, (28 Jullu 2022), Díli—Defensór Públiku na’in-tolu simu posse hodi sai responsável ba Defensoria Públika Munisipál Baucau, Covalima no Rejiaun Administrativa Espesiál Oecusse Ambeno (RAEOA).

Serimónia Posse ba Defensór Públiku na’in-tolu ne’ebé hala’o iha Sentru Formasaun Jurídiku no Judisiáriu (SFJJ), Caicoli, Díli, Kinta (28/07/2022). Foto/MJ.

Defensóre Públikus na’in-tolu ne’ebé simu posse hodi substitui Defensór na’in-tolu hosi Munisípiu tolu ne’e mak hanesan, Laura Valente Lay ho karreira profissionál nu’udár Defensora Públika II klase, eskalaun B, exerse funsaun hanesan Defensora Públika Responsável ha Defensoria Públika Munisipál Baucau.

Lee Mós: MJ Esforsu Muda Estatutu Defensoria Públika Bá Autonomu Finanseiru

“Nia simu posse hodi substitui Defensór Públiku, Gregório Maria Lourdes de Lima, ne’ebé termina ona nia mandatu, hafoin períodu rua tutuir malu ezerse funsaun nu’udár Defensór Públiku Responsável iha Defensoria Públika Munisípal Baucau,” Hatutan.com sita komunikadu.

Advertisement

Jonas Henrique da Costa, ho karreira profissionál antes ne’e nu’udár Defensór Públiku II klase, eskalaun A. Somu posse nu’udár Defensór Públiku, Responsável ba Defensoria Públika Munisípal Covalima hodi  substitui Defensór Públiku, Manuel Amaral, ne’ebé termina ona nia mandatu hafoin períodu rua tutuir malu ezerse funsaun hanesan Defensór Públiku Responsável iha Defensoria Públika Munisipál Covalima.

Afonso Gomes Fátima, antes ne’e ho karreira profissional nu’udár Defensór Públiku II klase, eskalaun A, simu posse  nu’udár Defensór Públiku Responsável ba Defensoria Públika RAEOA, hodi substitui Defensór Públiku, Calisto Tout, ne’ebé termina ona nia mandatu, hafoin períodu rua tutuir malu ezerse funsaun hanesan Defensór Públiku Responsável iha Defensoria Públika RAEOA.

Iha loron 12 fulan Maiu tinan ne’e, Konsellu Superiór Defensoria Públika, ezerse funsaun no uza atribuisaun ho responsabilidade, konferida tuir artigu 35″ alinea a,c,d no e, artigu 38 númeru 4 no artigu 92 Dekretu-Lei No. 10/2017, Estatutu Defensoria Públika nian,  Halo ona reuniaun ordinariamente ho prezensa membrus Konsellu Superiór nian, halo apresiasaun, diskute no ikus-mai aprova proposta Re-estruturasaun pozisaun ba Defensores Públikus Responsáveis Munisípius Baucau, Covalima no RAEOA.

Serimónia Posse ne’ebé hala’o iha Sentru Formasaun Jurídiku no Judisiáriu (SFJJ), Caicoli, Díli, partisipa hosi Prezidente Tribunál Rekursu, Deolindo dos Santos, Ministru Justisa, Tiago Amaral Sarmento, Vise Ministru Justisa Jose E. Caetano, Prokuradór-Jerál Repúblika, Alfonso Lopes, Komisáriu Komisaun Anti Korrupsaun, Sérgio Hornay, no seluk tán.

Jornalista: Carmelita Isaac

Advertisement