Hatutan.com, (08 Agostu 2022), Díli—Tribunál Distritál Díli (TDD) iha Segunda 08 fulan ne’e, liu hosi julgamentu kolektivu ne’ebé prezide hosi Afónso Carmona, Evangelino Belo no João Ribeiro, kontinua hala’o julgamentu ba krime abuzu konfiansa agravadu ne’ebé deskonfia involve sidadaun Bangladesh na’in-ida arguidu NRT, tanba privatiza osan supermekadu Flamengo liu hosi halo lista falsa iha data base hodi apropria osan produtu ne’ebé konsumidór sosa no fó prezuizu ba lezadu Arif Uz Zaman ho montante $40.000.

Foto ilustrasaun hosi Google.

Iha julgamentu kontinuasaun ne’e, lezadu deklara ba Tribunál katak totál osan ne’ebé nia uza hodi loke supermerkadu ne’e hamutuk $89.000, hodi fó konfiansa ba arguidu nu’udár manajer no kontabilista tanba arguidu iha koñesimentu di’ak iha área refere ho knaar espesífiku hamutuk ho lezadu sosa produtu merkadoria no alista produtu iha data base inklui fólin hodi fa’an iha supermerkadu.

“Sasan ne’ebé nia fa’an la entrega osan mai ha’u no nia entrega de’it mak $25.000, restu la intrega no nia halai tanba antes ne’e iha audit detekta katak lista produtu ne’ebé fa’an ona la hanesan ho osan ne’ebé nia entrega. Signifika produtu fiziku iha loja laran ho produtu ne’ebé alistadu iha data base la hanesan,” lezadu deklara ba Tribunál.

Hafóin rona lezadu, Tribunál adi’a hikas julgamentu ba loron seluk hodi kontinua rona sasin sira.

Antes ne’e, tuir akuzasaun hosi Ministériu Públiku (MP) ne’ebé reprezenta hosi Prokuradora Ivonia Guterres katak iha loron 18/02/2019, lezadu hahú loke nia supermerkadu Flamengo hodi atribui konfiansa ba arguidu nu’udár manajer no kontabilista tanba arguidu iha koñesimentu di’ak iha área refere, hodi servisu hamutuk ho lezadu sosa produtu merkadoria no arguidu rasik mak alista produtu hirak ne’e iha data base komputador supermerkadu hafóin tau fólin ba kada produtu no fa’an iha loja.

Tanba ne’e bainhira konsumidor sira sosa produtu ruma (kasir) Timor-oan simu fó koñese produtu liu hosi komputadór no print nota produtu fó ba arguidu verifika loos ona mak asina no entrega produtu fiziku ba konsumidór no kasir simu osan entrega ba arguidu maka rai.

Maibé iha loron 18 Maiu 2019, lezadu komesa deskonfia eziste manipulasaun entre produtu fiziku tau iha loja laran ho produtu hirak ne’ebé arguidu alistadu iha data base.

Tanba ne’e, lezadu fó órden ba Kamrul Islam ne’ebé fila ona Banlandesh ho sasin Sahaj Uddin hodi print lista produtu 50 iha data base hodi halo konfrontasaun ho produtu fiziku iha loja laran ho rezultadu katak bainhira cek produtu fiziku iha loja laran no verifika katak produtu 50 naran iha lista la hanesan ho produtu fiziku iha loja laran ka sasan balun menus no sasan balun barak liu.

Produtu alistadu ho tipu 50 print sai hosi data base ho produtu fiziku iha loja laran eziste diferensa mak hanesan produtu fiziku ne’ebé hanesan ho produtu alistadu iha data base hamutuk 13 entre produtu tipu 50, produtu fiziku ne’ebé kuantidade barak liu alistadu iha data base iha produtu 8 entre produtu tipu 50, produtu fiziku ne’ebé nia kuantidade menus liu alistadu iha data base iha produtu 29 entre produtu tipu 50.

Hosi diferensa ne’ebé eziste, ıha loron 13 Mai 2020 lezadu konvoka reuniaun iha nia uma entre nasionalidade Banlandesh de’it ne’ebé servisu iha lezadu nia kompañia hodi buka tuir diferensa entre produtu tipu 500 hosi data base ho produtuk fiziku iha loja laran.

Tanba ne’e, lezadu husu ba arguidu tanba sa maka mosu diferensa bo’ot entre produtu fiziku ho produtu alistadu ne’ebé própriu arguidu rasik mak alista iha date base no arguidu la responde hodi nonok de’it no la ko’alia buat ida ho nune’e lezadu deside halo audit ba servisu arguidu nian durante loron lima nia laran.

Bainhira audit hahú hosi loron 16-19 maiu 2020, marka prezensa sasin no nota katak arguidu la koopera ho nia kolega sira ne’ebé própriu nia maka hili no arguidu dada tempu audit to’o loron 27 Jullu 2020, maibé depois de audit arguidu halai sai hosi loja no troka hotu pasword komputadór data base nian ho motivu impede lezadu labele asesu no subar nota konsumidór ne’ebé durante ne’e sosa produtu.

Durante periodu okupa pozisaun refere, arguidu apropria indevidamente osan supermerkadu ba interese partikulár liu hosi dalan halo lista falsa iha data base supermerkadu hodi apropria osan produtu ne ebé mak konsumidór sosa hodi fó prezuizu ba lezadu ho montante $40.000 ne’ebé ikus mai supermerkadu refere tenki bankarrota.

Tanba ne’e, MP akuza arguidu ba pratika krime abuzu konfiansa agravadu ne’ebé previstu iha artigu 256 hosi kódigu penál Timor Leste.

Jornalista: Carmelita Isaac