Hatutan.com, (10 Agostu 2022), Díli—Delegasaun Estadu Unidus Amérika (EUA) iha Timor-Leste, Fausto Gusman konvida Komisáriu Comissão Anti-Corrupção (CAC), Sérgio Hornai atu sai oradór iha eventu konferénsia internasionál ne’ebé sei hala’o iha sidade Washington Amérika iha tinan 2023.

Delegasaun Estadu Unidus Amérika (EUA) iha Timor-Leste, Fausto Gusman konvida Komisáriu Comissão Anti-Corrupção (CAC), Sérgio Hornai atu sai oradór iha eventu konferénsia internasionál ne’ebé sei hala’o iha sidade Washington Amérika iha tinan 2023, Kuarta (10/08/2022). Foto/CAC.

“Objetivu hosi vizita ne’e hodi hato’o informasaun inisiál kompromosiu Estadu Unidus Amérika nian kona-bá konvida CAC sai oradór iha konferénsia internasionál ne’ebé sei hala’o iha sidade Washington Amerika iha 2023,” Hatutan.com sita komunikadu.

Lee Mós: CAC ho The Asia Foundation Sei Halo Peskiza Kona-bá Persepsaun Públika Korrupsaun iha TL

Sorumutu ida-ne’e mós reprezentante EUA Fausto Gusman ho kuriozu hakarak buka-hatene liu-tán servisu ne’ebé Komisaun halo durante iha nia ezisténsia, liu-liu kona-bá planu prioridade Komisaun nian, progresu ne’ebé atinje ona no dezafiu sira ne’ebé Komisaun hasoru durante ne’e.

Komisáriu Sérgio Hornai esplika progresu lubuk ida ne’ebé CAC halo ona durante iha nia ezisténsia mak hametin integridade instituisaun Estadu sira, partikularmente konsensializa sosiedade organizmu públika no privada sira nia hanoin no konsiénsia no edukasaun ba foinsa’e sira kona-bá kuda kultura rejeisaun forte ba aktus korrupsaun.

Esforsu balun ne’ebé Komisaun halo, liu-liu iha dekada ida antes maka hamutuk ho podér polítiku sira hodi hamosu lei Medida Prevensaun no Kombate Korrupsaun (MPCC) no daudaun ne’e hahú implementa ona, liu-liu iha rejime deklarasaun rikusoin nian.

Esforsu seluk ne’ebé Komisaun halo maka, oinsá hamosu Estratéjia Nasionál Anti-Korrupsaun (ENAK) ne’ebé daudaun ne’e Komisaun prepara ona nia termu referénsia, timeline sira, no sei hamosu steering committee hodi involve entidade hotu-hotu tantu nasionál no internasionál, organizmu públiku no privada sira hodi fó opiniaun ba elaborasaun dokumentu ofisiál refere.

Komisáriu Sérgio Hornai esplika mós katak, dezafiu sira ne’ebé komisaun hasoru mak lei ba protesaun testemuña ba sidadaun sira ne’ebé seidauk iha, nune’e difikulta sidadaun sira ne’ebé hakarak hato’o keixa krime korrupsaun mai iha CAC, inklui mós ho lei ba rekuperasaun átivu ninian.

Gusman husu mós kona-bá vulnerabildade ne’ebé Komisaun enfrenta durante iha nia ezisténsia no karik hetan influensia ruma hosi podér polítiku sira.

Komisáriu Sérgio hateten katak, TL nu’udár Estadu direitu demokrátiku, no Komisaun iha ninia lejitimidade ne’ebé forte la iha vulnerabilidade boot liu.

Komisaun nem hakruuk ba pesoál sé de’it ne’ebé iha podér polítiku no sempre firme hodi hatuur nafatin prinsípiu sira separasaun podér.

“Ita iha legitimidade, ne’ebé la ta’uk atu servisu ba defende justisa. Mate ohin, mate aban, ita la ta’uk atu defende justisa,” katak komisariu.

Durante ne’e Komisaun servisu di’ak hodi koopera ho instituisaun Estadu hotu, maibé ba pesoál sira ne’ebé la kumpre ba lei, Komisaun nafatin hala’o nia knaar tuir legalidade no objetividade.

Enkontru ne’e Komisariu érgio Hornai akompaña hosi Xefe Unidade Kooperasaun João Correia iha edifisiu CAC, Faról Díli, Kuarta (10/08/2022).

Jornalista: Carmelita Isaac