Hatutan.com, (11 Agostu 2022), Díli—Empreza nasionál Aero Dili, marka istória foun mai Timor-Leste iha mundu transporte aéreu nian, ne’ebé bá dahuluk halo international technical leanding ho aviaun Timor no ho bandeira Timor nian rasik iha Aeroportu Internasionál Eltari, Kupaun, Timor Osidentál.

Aviaun Cesta husi Aero Dili halo internasionál technical leanding iha Aeroportu Eltari, Kupaun, Indonézia, Kinta (11/08/2022). Foto/Espesiál

Dezde Timor-Leste restaura nia ukun rasik an iha 20 fulan-Maiu 2002 mai to’o ohin loron, seidauk iha kompañia aéreu Timor nian rasik  ne’ebé bele koko halo operasaun internasionál ho bandeira Timor nian rasik.

Aviaun komersiál sira ne’ebé halo operasaun iha Timor-Leste durante ne’e, hahú  kedas inísiu tinan 2002 to’o mai ohin loron, mesak aviaun charter (aluga) de’it no uza nasaun seluk nia aviaun ho nasaun seluk nia bandeira. Maibé bá dala-ida ne’e, empreza nasionál Aero Dili, maske ho aviaun ki’ik Cesna (C207) halo ona international technical landing iha Aeroportu Internasionál  Eltari-Kupaun, Indonézia, Kinta (11/08/2022).

Aviaun Aero Dili nian ho marka C207 hahú nia international technical leanding sai husi Aeroportu Internasionál Prezidente Nicolau Lobato, Comoro, Dili, tuku 09:30 Otl no to’o iha Aeroportu Eltari, Kupaun, tuku 9.30 oras Kupaun, no to’o fali mai Timor-Leste  iha tuku 15:39  Otl. (Diferensa oras Timor-Leste ho Timor Osidentál liu oras ida)

Aviaun C207 ne’e rejistu tiha ona iha Timor ho Timor nia bandeira no durante ne’e  hala’o operasaun iha rai-laran de’it, hanesan semo hosi Dili-Oé-Cusse bá-mai, Dili-Suai bá-mai ho Dili-Baucau bá-mai.

Aviaun Cesna hosi Aero Dili halo internasionál technical leanding iha Aeroportu Internasionál Eltari, Kupaun, Kinta (11/08/2022). Foto/Espesiál

“Oinsá mak ita koko took lori ita-nia rejistu Timor ho bandeira Timor nian rasik bá halo internasionál technical leanding tanba  ne’e Aero Dili halo aplikasaun bá Indonézia atu halo internasionál technical leanding no autoridade kompetente sira iha Indonézia  aprova,” Diretór Ezekutivu Aero Dili, Lourenço de Oliveira informa bá jornalista hafoin susesu  halo technical leanding iha Kupaun no fila mai Timor-Leste iha Aeroportu Internasionál Prezidente Nicolau Lobato, Dili.

Iha  technical leanding ne’e  la lori pasajeiru, maibé lori de’it mak tékniku na’in-ida,  instrutór internasionál nian na’in-ida, inklui ho pilotu timoroan  ho total ema na’in-haat (4).

Aero Dili mós iha planu iha tempu sira tuir mai sei halo tan aplikasaun bá Austrália atu bele halo mós internasionál technical leanding iha Aeroportu sira balun iha Austrália.

International technical leanding nu’udár rekizitu tékniku ida kuandu bainhira Aero Dili iha futuru maka iha aviaun boot komersiál ho tipu boing ka airbus bele  ona semo bá fatin hotu-hotu iha mundu.

 Jornalista :  Elio dos Santos da Costa