Hatutan.com, (24  Agostu 2022), Díli- Xefe Estadu, José Ramos-Horta, promete kontinua fó apoiu bá Instituto de Apoio ao Desenvolvimento Emprezarial (IADE) liuliu iha programa formasaun bá empoderamentu feto emprezariál.

Lee Mós : Governu Rona Opiniaun Ramos-Horta Kona-bá Vizaun Boot Futuru Timor

Prezidente Repúblika, José Ramos-Horta. Foto/Media GPR

Bainhira partisipa iha serimónia enserramentu formasaun kona-bá empoderamentu feto iha edifísiu IADE, Díli, Kuarta (24/08/2022),  Prezidente Repúblika, José Ramos-Horta, hateten programa empoderamentu feto para halo formasaun badak, formasaun espesial bá inan-feton sira ne’ebé halo bussines para kumpre no hatene liután kona-bá halo planeamentu no akontabilidade merkadu atu iha poupansa atu sira bele bá oin.

Tuir Ramos-Horta, empoderamentu feto presiza para haree oinsa bele muda no tane feto sira iha aktividade makro, maibe la’ós haree bá feto sira ne’ebé iha bussines bo’ot hanesan loja bo’ot sira mais tane feton sira, liliu inan sira ne’ebé mak hanesan vendedor ambulante, faan modo, faan tais no buat sira seluk para neineik sira bele hakat bá oin ho sira nia busines.

“Há’u hatene hau nia desijaun, hau nia intendimentu investidór sira iha liur sira haree sira kontente no  akompaña se situasaun politíka lao di’ak prezidente República, Parlamentu Nasionál no Governu lao diak, ema barak kontaktu ha’u kuaze loron-loron ka ha’u koalia ho sira pesoalmente atu oinsa sira bele mai halo investimentu iha ne’e,” José Ramos-Horta hateten.

Iha tempu oin, Horta dehan, atividade ekonomika barak sei akontese iha Timor-Leste entaun hahú prepara inan feton sira ho formasaun no sira bele hetan benefísiu mós partisipa direitamente ho konesimentu ida ne’e.

Governu tinan ne’e tau millaun $50 iha BNCTL ne’e foin badala uluk Governu hahu investe iha BNCT para tulun setór privadu halo imprestimu hodi halo business ho funan ne’ebé kiik kuaze 3 %  tanba uluk ne’e todan boot loos to’o 12% no balun 14%  mais agora ne’e 3% no ida ne’e bele ajuda ekonomia empreza kiik sira nian.

 “Há’u kontente ho desizaun Governu nia tau osan iha BCTL mais há’u koalia dadauk ho ema iha liur para haree oinsa apoia feto sira iha Timor-Leste bele halo kontribui di’ak bá ekonomia.” Horta hateten.

Diretór Ezekutivu IADE, Filomeno Marcelino Belo hateten, formasaun ne’ebé IADE oferese ne’e atu kapasita emprezariu sira atu oinsa sira jere sira-nia bussines ne’e hodi bele dezenvolve ekonomia iha Timor-Leste.

IADE mós sempre halo planu negósiu bá joven sira ida ne’e prosesu sira ne’e lao ho di’ak no tinan  ida ne’e IADE ultrapasa orsamentu jeral estadu ne’ebé konsege fó apoiu bá emprezáriu hamutuk 16 iha Timor laran tomak bá iha aspetu business.

IADE fó formasaun ho tipu rua; ida bá  partisipante  sira ne’ebé mak lahatene lee no hakerek maibe realidade sira hatene halo business sira ne’e merese duni atu hetan kapasitasaun formasaun no ida seluk (rua) bá sira ne’ebé bele jere sira nia business maibé presija haklean tan koñesimentu.

Jornalista: Vito Salvadór