Hatutan.com, (02 Setembru 2022), Díli—Comité 12 de Novembro (C12N) haruka ona nota protestu bá Komandu Jerál Polísia Nasionál Timor Leste (PNTL), Komisáriu Faustino da Costa, hodi hato’o C12N nia pozisaun bá kazu José Bernardo (Adriano) ne’ebé mate ho tali kesi iha kakorok iha sela detensaun PNTL Munisípiu Díli, Kinta kalan, 01 fulan-Setembru 2022.

Lee Mós : PCIC Foti Ona CCTV iha Komandu PNTL Munisípiu Dili

Matebian José Bernardo. Foto/Ilustrasaun

Nota protestu ne’ebé Hatutan.com asesu, Sesta (02/09/2022), hosi C12N ne’e hato’o mós koñesimentu  (Cc) bá órgaun soberanu sira, hanesan Prezidente Repúblika, Prezidente Parlamentu Nasionál, Primeiru Ministru ho Prezidente Tribunál Rekursu.

Tuir mai versaun kompletu nota protesta hosi C12N nian bá Komandante  Jerál PNTL, Komisáriu Faustino da Costa;  

Exelentísimu Sr. Komandante Jerál PNTL

Komisáriu FAUSTINO DA COSTA

Caicoli, Díli, Timor-Leste

Asuntu : Nota Protestu

Exelénsia,

Sr. Komandante, populasaun Timor-Leste liu-liu iha Munisípiu Díli hakfodak no triste ho ita hotu nia oan joven ida naran JOSÉ BERNARDO (ADRIANO) ne’ebé mate horiseik, 01 Setembru 2022 ho kondisaun ida suspeitável iha sela detensaun PNTL Munisípiu Díli, Suku Caicoli.

Ita hotu seidauk hatene motivu sá maka halo joven ida ne’e mate. Nune’e ita hotu hein rezultadu autópsia ho investigasaun ida kle’an no profisionál, hodi deskobre seda maka halo nia mate. Maibé, evidénsia hatudu momoos katak joven ne’e mate iha sela laran tamba FIU METAN naruk ida kesi hela iha nia kakorok.

Relasiona ho trajédia ba’a joven mate ne’e, autoriza COMITÉ 12 DE NOVEMBRO hato’o nia hanoin hanesan tuir mai ne’e :

1. COMITÉ 12 DE NOVEMBRO Protesta Maka’as Joven JOSÉ BERNARDO (ADRIANO) nia mate, tamba mate iha instituisaun PNTL ne’ebé harii nu’udár rezultadu hosi nia aman hanesan ema 12 Novembru, ho povu Timor-Leste nia luta naruk no difisil iha tempu uluk;
2. COMITÉ 12 DE NOVEMBRO Protesta Maka’as Joven JOSÉ BERNARDO (ADRIANO) nia mate, tamba joven ne’e mate iha instituisaun PNTL ne’ebé devia fo protesaun ba nia, la’ós kria kondisaun la di’ak iha sela laran hodi implika nia mate;
3. COMITÉ 12 DE NOVEMBRO Protesta Maka’as Joven JOSÉ BERNARDO (ADRIANO) nia mate, tamba PNTL iha Munisípiu Díli serbisu la profisionál nune’e la fó garantia ba’a membru populasaun sira nebé detidu iha sela laran ho seguru;
4. COMITÉ 12 DE NOVEMBRO husu ba’a Sr. Komandante Jerál PNTL atu halo suspensaun no investigasaun ba’a membru PNTL sira hotu ne’ebé horiseik 01 Setembru 2022 hala’o serbisu iha Kuartél PNTL Munisípiu Díli, hodi asume sira-nia responsabilidade bá Joven JOSÉ BERNARDO (ADRIANO) nia mate;
5. COMITÉ 12 DE NOVEMBRO tau nafatin fiar ba’a PNTL hodi hala’o nia serbisu ho Profisionalizmu hodi fó Protesaun ho Domin bá ita-nia Povu Timor Leste tomak, sem halo diskriminasaun ba’a ema ida, maski tuir lei sira halo sala ruma.

Obrigadu barak bá Sr. Komandante Jerál nia atensaun.

Gregório Saldanha (Mouris)

Prezidente

Kópia sira :

1. Sua Excelência Sr. Prezidenti Repúblika
2. Sua Excelência Sr. Prezidenti Parlamentu Nasionál
3. Sua Excelência Sr. Primeiru Ministru
4. Sua Excelência Sr. Prezidenti Tribunál Rekursu