Hatutan.com, (05 Setembru 2022), Díli—Reuniaun entre órgaun liga no klube sira primeira no segunda divizaun, iha ona konkordánsia atu mantein realiza liga Timorense époka 2022-2023 maibé sei hato’o mós proposta balun ba Federasaun Futeból Timor Leste (FFTL) atu tau iha konsiderasaun tuir kondisaun ne’ebé klube no órgaun liga presiza.

Prezidente Liga Futeból Timor Leste (LFTL), Nilton Telmo Gusmão dos Santos. Foto/Hatutan.com

“Reuniaun ohin atu rona klube sira nia aspirasaun tanba tinan ida-ne’e tama ona iha fulan Setembru maibé Liga seidauk la’o no desde fulan Abril órgaun LFTL loke rejistrasaun maibé to’o ohin loron laiha klube ida mak mai rejista. Tanba ne’e mak ohin órgaun liga konvoka reuniaun ida-ne’e hodi rona klubu sira nia hanoin,” Prezidente Liga Futeból Timor Leste (LFTL), Nilton Gusmão hateten hafoin reuniaun ho Prezidente klube sira iha otél JL Villa Fatuhada, Segunda (05/09/2022).

Lee Mós: LFTL Prontu Organiza Liga Timorense Époka 2022-2023

Parte órgaun LFTL halo ona analiza ba orsamentu ne’ebé iha hosi parte governu no FFTL ho totál $400.000, hosi orsamentu ne’ebé iha bainhira órgaun liga halo metade kompetisaun (setengah kompetisi) liga tenke buka angaria tán fundus $190.000 no bainhira halo kompetisaun nakonu (Full kompetisi) liga tenke angaria tan fundus $295.000.

Ida-ne’e todan oitoan ba liga tanba uluk kuandu liga hahú sei amadora, Governu tau $600.000 no neik-neik governu husik bebeik hakarak dehan órgaun liga atu independente mais haluhan tiha katak atividade ida-ne’e emprega ema lubuk ida no bele fó mós kontribuisaun ekonómika ba família.

Buat sira hanesan ne’e mak loloos ne’e parte hotu-hotu tenke hanoin tanba Timor Leste seidauk iha merkadu futeból ida hanesan país europeu ne’ebé nia futeból bele moris independente.

Situasaun ekonomia iha rai laran mós la’ós di’ak tebtebes tanba ne’e mak klubu sira mós hasoru difikuldade barak, iha faze Covid-19 klubu sira sofre konsekuénsia lubuk ida no ohin loron klubu sira la’ós fásil atu asesu apoiu hosi patrosiniadór sira.

Tanba ne’e mak klubu sira nia difikuldade ne’e hanoin hela atu lori ba ko’alia ho FFTL hodi haree took oinsa no  dalan saida mak bele foti hamutuk atu bele ajuda klubu sira hodi realiza liga Timorense époka 2022-2023.

Maske FFTL dispobiliniza ona nia fundus, maibé klubu sira mós iha hanoin atu aprezenta molok atu konkorda de’it fundus ne’ebé mak FFTL dispobiniliza ona.

Klubu sira iha atleta, treinadór inklui asistente no mós nesesidade sira seluk ne’ebé presiza tau iha konsiderasaun, nune’e klubu sira seidauk iha verba ida loos atu propoin ho detallu no sai hanesan despeza ba sira nia atividade lorloron nian no mós kustu jogu kada fulan nian.

Liga tenke hala’o maibé liga labele la’o sem klubu no nein federasaun bele halo relatóriu ba atividade futeból sem klubu ida ne’e tenke klaru tebe-tebes tanba klubu mak komponente ida importante tebe-tebes iha atividade futeból nia laran.

Timor leste nia merkadu futeból, la’ós hanesan ho Europa maibé iha merkadu ida ne’ebé buat hotu-hotu liuliu fundus sei depende ba Governu no federasaun tanba ne’e tenke konsidera mós kondisaun balun ne’ebé klubu sira enfrenta atu labele impede futeból iha Timor Leste.

Hafoin reuniaun ne’e, órgaun LFTL sei hala’o mós reuniaun ho FFTL iha loron 12 fulan setembru  hodi hato’o mós hanoin sira ne’ebé iha atu parte hotu tetu hamutuk hodi haree futuru liga Timorense ba oin no organiza.

Fundadór no treinadór Klube Zefra FC, Rogério Moc husu atu parte hotu-hotu ne’ebé atu organiza liga ida ne’e tenke fó liman ba malu no fó hanoin ba malu atu bele realiza liga ida ne’e.

Tanba bainhira Liga Timorense la realiza nia impaktu ne’e boot tebes no FIFA bele fó sansaun ruma ba Timor Leste tanba Liga ba époka 2022-2023 la realiza.

Tuir informasaun ne’ebé iha katak klubu primeira divizaun sei simu de’it $ 20.000 no segunda divizaun $10.000 no situasaun ne’e difikulta klubu sira.

Jornalista: Vito Salvadór