Hatutan.com, (09 Setembru 2022), Díli—Raiña Elizabeth II mate ho idade 96 iha Kinta (08/09/2022) Oras lokál.

Raiña Elizabeth II bainhira iha serimónia Platinum Jubilee Pageant iha Palasiu Buckingham, London, Domingu (05/06/2022). Raiña Elizabeth II mate ho idade 96 iha Kinta (08/09/2022). Foto/AP.

Raiña Elizabeth II ninia mate anunsia ofisialmente iha Palásiu Buckingham, ne’ebé Hatutan.com sita hosi live update BBC.

Antes Raiña Elizabeth II mate, ninia oan sira halibur hamutuk iha Kastelo Balmoral, Skotlándia, fatin ne’ebé matebian hetan atendimentu médiku hosi doutór sira iha Kinta (08/09/2022).

Antes liurai feto Inglaterra ne’e mate, iha momentu ne’ebá ekipa médiku mós deklara antes ona katak, haree ba idade no saúde sei labele salva.

Maski nune’e médiku sira anunsia katak, Raiña Elizabeth II tenke kontinua hetan tratamentu nafatin no tenke hetan akompañamentu hosi médiku sira.

Iha momentu ne’ebá mós família rasik hosi Liurai Feto Inglaterra ne’e halibur malu no akompaña mós nia iha Kastelo Balmoral iha área Aberdeenshire.

Raiña Elizabeth II   ninia oan sira ne’ebé halibur-malu iha fatin ne’e inklui Prínsipe Charles, Prinseza Anne, Prínsipe Andrew, Prínsipe William no Prínsipe Edward.

Enkuantu Prínsipe Harry ho nia kaben, Meghan Markle mós ba hotu Kastelo Balmoral atu bele akompaña Raiña Elizabeth II molok iis-kotu.

Raiña Elizabeth II iha oan na’in-haat mak hanesan Charles, Anne, Andrew, no Edward. Ho Raiña Elizabeth II ninia mate, maka Prínsipe Charles (73) mak sei sai susessór ba tronu Impériu Britâniku.

Raiña Elizabeth II moris iha 21 Abril 1926. Naran kompletu Elizabeth Alexandra Mary. Hatutan.com sita Wikipedia, Elizabeth mak oan dahuluk hosi Prínsipe Albert, do que de York ne’ebé ikus mai sai hanesan Liurai George VI, no ninia kaben, Elizabeth Angela Marguerite Bowes-Lyon ikus mai koñesida liu ho Raiña Elizabeth, mãe Raiña.

Raiña Elizabeth II ninia aman maka oan daruak hosi Liurai George V ho Raiña Mary. Raiña Elizabeth II ninia inan maka Prinseza ikun hosi nobreza Eskoseza ho naran Claude Bowes-Lyon.

Títulu Elizabeth ne’ebé hetan hafoin moris mai maka Alteza Real Prinseza Elizabeth hosi York.

Elizabeth ho Prínsipe Philip kaben iha 20 Novembru 1947 iha Westminster Abbey. Elizabeth hasoru-malu ho Prínsipe Philip hosi Grésia no Dinamarka iha tinan 1934 no 1937.

Raiña Elizabeth II sa’e tronu iha 06 Fevereiru 1952. Raiña Elizabeth II sai hanesan Monarka kleur liu iha istória Monarkia Británika durante tinan 70.

Monarkia Grá Británika mak monarkia ne’ebé boot liu iha Mundu mak hanesan, Kanadá, Austrália, Nova Zelándia, Afrika du Súl, Pakistaun no Sri Lanka.

Oras-ne’e daudaun Elizabeth mós hanesan Raiña hosi Jamaika, Bahama, Grenada, Papua Nova Guiné, Illa Solomaun, Tuvalu, Saint Lucia, Saint Vincent no Grenadines, Belize, Antigua no Barbuda, inklui Saint Kitts ho Nevis.

Jornalista: Cipriano Colo