Hatutan.com, (22 Setembru 2022), Díli—Roo ahi Reliant hosi Austrália, atraka hela iha Portu Díli hodi demonstra ka hatudu kapasidade no abilidade bá timoroan sira, kona-bá oinsá fó asisténsia umanitária ba vítima sira bainhira hetan dezastre iha tasi-laran.

Roo ahi Reliant hosi Austrália, atraka hela iha Portu Díli hodi demonstra ka hatudu kapasidade no abilidade bá timoroan sira, kona-bá oinsá fó asisténsia umanitária ba vítima sira bainhira hetan dezastre iha tasi-laran, Kinta (22/09/2022).

“Prezensa roo ahi ne’e iha Timor-Leste atu hatudu de’it ba timoroan sira kona-bá roo ne’e nia kapabilidade ka abilidade. Depois hatudu mós, karik iha dezastre ruma oinsá roo ahi ne’e bele fó asisténsia,” Koordenadór Operasionál bá Roo Ahi Reliant, Kapitaun Tenente Gregory Wilson hateten iha Portu Díli, Kinta (22/09/2022).

Lee Mós: TL-Austrália Sei Implementa Programa PROSIVU Durante Tinan Haat ho Millaun $25

Roo apoiu Pasífiku Reliant sei promove ligasaun governu-bá-governu ne’ebé besik liuhosi interaksaun governu ho komunidade lokál, apoiu esforsu sira atu harii kapasidade rejionál sira no fornese resposta ba asisténsia umanitária no asisténsia dezastre ne’ebé persistente.

Roo ahi ne’e ho nia misaun mak hanesan, apoiu envolvimentu rejionál sira, apoiu levantamentu hidrográfiku, fó ajuda no kapasita viziñu sira, fornese apoiu saúde, fó asisténsia umanitária persistente, fornese apoiu militár, fornese apoiu ba evakuasaun, fornese apoiu dezastre ho nia kontinuasaun, fó asisténsia iha misaun buka no salva.

Roo ne’e ho nia naruk metru 102, luan metru 900 no todan ho tonelada 9.000, velosidade roo ahi ne’e, bainhira viájen iha tasi-laran ho distánsia to’o kilómetru 24 kada oras.

Koordenadór Operasionál bá Roo Ahi Reliant, Kapitaun Tenente Gregory Wilson.

“Todan tonelada 9.000 no luan 900m uza hodi tau kontentór sira, hodi suporta ka apoiu bá ajuda umanitária nomós fó asisténsia ba dezastre. Roo ahi ida-ne’e bele akumula bee-moos atu hemu litru  tonelada 800 no bele prodús tonelada 300 kada loron,” nia hateten.

Iha roo ahi ne’e nia laran, eziste mós estasionamentu bá roo ahi sira seluk, atu oinsá mak bele fó asisténsia umanitáriu bá vitima sira, bainhira hasoru situasaun dezastre.

“Portu Díli mak sai fatin dahuluk ne’ebé Roo ahi ne’e mai no depois ami sei halo operasaun bá iha rejiaun sira pasífiku ninian. Roo ahi ne’e sei iha tasi-laran, durante loron 300,” nia hateten tán.

Tuir oráriu, Roo ahi ne’e sei atraka iha Portu Díli durante loron tolu hafoin kontinua viájen bá nasaun Papua Nova Guiné, Illa Salomon, Cirabas, Vanuatu, Tonga no Fiji.

Iha roo ahi ne’e nia laran, sei transporta de’it ema na’in-60, kompostu hosi krú ka ekipa Tripulante sira hamutuk na’in-19 no sira na’in-41 seluk nu’udár pesoál bá apoia umanitária nian hodi salva vítima bá dezastre sira iha tasi-laran.

Tékniku sira ne’ebé operasionaliza Roo ahi ne’e, iha servisu konjunta entre Governu Austrália ninia ema sivíl sira rasik ho Forsa Austrália sira liuhosi Komponente Navál.

Tinan produsaun Roo ahi ne’e hahú iha 2017 no oras-ne’e mós rejístadu iha Organizasaun Internasionál Marítima (IMO-Sigla Inglés) ho númeru 9752254.

Jornalista: Rogério Pereira Cárceres