Hatutan.com, (26 Setembru 2022), Díli—Komandante Jerál Polísia Nasionál Timor-Leste (PNTL), Komisáriu Polísia Faustino da Costa, orienta no koloka ona ekipa servisu intelijénsia PNTL nian, hodi buka-tuir ema deskoñesidu ne’ebé ho ‘kilat-boot’ tiru subar animal komunidade nian iha aldeia Fehuriin, Suku Uma-Boco, Postu Administrativu Natarbora, Munisipiu Manatuto.

Komisáriu Polísia Faustino da Costa.

Kazu ne’e akontese iha Sesta (23/09/2022), maizumenus tuku 02:18 rai-nakaras, ne’ebé mak deskonfia envolve hosi sidadaun balun ho grupu utiliza kilat-boot hodi tiru karau komunidade nian, rezulta karau tolu mate, ida husik hela maibé karau rua mak ema sira ne’e konsege transporta iha sira-nia karreta lori halai liu.

Lee Mós: Ema ho Kilat Tiru Komunidade Nia Karau iha Natarbora

“Ha’u orienta ona ekipa intelijénsia ne’ebé durante ne’e ami instala, atu halo investigasaun ba kazu ne’e. Fiar katak, ita sei bele hetan,” Komisáriu Polísia Faustino da Costa, hateten hafoin partisipa iha workshop kona-bá utilizasaun eletrónika ba ezekutivu sira PNTL nian, iha Sentru Formasaun Polísia (CFP-Sigla Português), Segunda (26/09/2022).

Advertisement

Hatán kona-bá preokupasaun públiku nian ligadu ho utlizasaun arma ka kilat, ladun iha kontrolu ne’ebé másimu hosi komandu PNTL, Komisáriu Faustino dehan, bainhira komunidade ka karau na’in, sira mak hatene karreta ne’e sé nian no nia númeru matrikula bele hato’o informasaun ‘loloos’ bá polisia, nune’e fásil hodi identifika.

Iha fatin hanesan, Komandante PNTL Munisipiu Manatuto, Superintendente Polisia João da Costa, informa, hafoin simu informasaun kona-bá insidente ne’e, iha loron ne’ebá kedan nia parte fó orientasaun bá xefe investigasaun Eskuadra Natarbora, atu bolu karau na’in sira hodi hato’o sira-nia deklarasaun ho informasaun ne’ebé mak loos.

Liuhosi keixa sira ne’e mak Komandu PNTL Manatuto bele hetan informasaun ne’ebé ho akurásia nune’e mós relata bá iha komandu jerál, hodi halo prosesu investigasaun kontinua, atu bele hetan rezultadu ne’ebé mak di’ak no identifika suspeitu balun, relasiona ho akontesimentu ne’e.

“Problema ida mak sira la deteta kareta ne’e, sira haree de’it modelu karreta ne’e maibé, xapa matrikula laiha. Ami mós labele halo buat ida. Karreta ne’e kór azúl, kijan, maibé plat laiha. Ida ne’e mak difikulta ba servisu polisia nian,” Komandante João da Costa, hateten.

Foti  Ona Embolku 2

Advertisement

Komandante José da Costa, informa mós katak, embolku (kartus-maten) rua ne’ebé grupu deskoñesidu sira uza hodi tiru mate karau tolu ne’e, PNTL Eskuadra Natarbora foti ona no sei enkamiña relatóriu mai komandu jerál no sei haruka tán ekipa balun hosi nasionál, hodi tun direta ba iha fatin akontesimentu, nune’e foti informasaun detallu liután. 

Maske nune’e, seidauk hatene loloos tipu bala rua ne’ebé mak PTNL foti, tanba ekipa investigasaun sira sei halo ezaminasaun, hafoin mak foin bele hatane bala ne’e hosi kilat ida ne’ebé nian.

Bainhira rezultadu ezaminasaun mak indika katak nia membru balun mak involve iha tiru karau ne’e, sei aplika sansaun tuir lei, liu-liu iha Regulamentu Dixiplinár Polisia nian.  

Jornalista: Rogério Pereira Cárceres

Advertisement