Hatutan.com, (27 Setembru 2022), Díli—Polísia Nasionál Timor-Leste (PNTL), liuhosi Komandu Munisípiu Díli identifika ona suspeitu na’in-rua ho inisiál P no H, ne’ebé hakanek vítima Domingos da Costa Neves, hanesan membru Konsellu Polisiamentu Komunitáriu (KPK), iha área Bairru-Pité, Postu Administrativu Dom Aleixo, Munisípiu Díli.

PNTL liuhosi Komandu Munisípiu Díli identifika ona suspeitu na’in-rua ho inisiál P no H, ne’ebé hakanek vítima Domingos da Costa Neves, hanesan membru Konsellu Polisiamentu Komunitáriu (KPK), iha área Bairru-Pité, Postu Administrativu Dom Aleixo, Munisípiu Díli, Gang-45, Segunda (26/09/2022).

Aktu kríme ne’ebé hakanek membru KPK ne’e, durante mosu konfrontu ka tuda-malu entre grupu juventude iha Bairru-Pité, Gang-45, Segunda (26/09/2022) maizumenus tuku 22:00 Otl.

Lee Mós:Konfrontu Becusse PNTL Detein Autór Na’in-Lima

Hafoin simu informasaun kona-bá insidente ne’e, Komandu Dili liuhosi Eskuadra Dom Aleixo, halo kedan patrulla bá lokál krime hodi halo atendimentu inklui transporta mós membru KPK ne’e, bá halo tratamentu saúde iha Klínika Kampung-Baru, depois vítima fila-fali bá ninia uma.

“Sira bá atende, iha tempu ne’ebá KPK ne’ebé mak iha Bairru-Pité ninian iha Gan-45 ne’e, nia tenta atu hakalma grupu ne’ebé mak tuda-malu ne’e. Entaun, nia mak hetan fila-fali tuda ka fatuk kona iha nia ulun no ita mós identifika suspeitu balun,” Komandante PNTL Munisípiu Díli, Superintendente Xefe Polísia, Henrique da Costa informa, liuhosi konferénsia imprensa iha Komandu Caicoli, Tersa (27/09/2022).

Durante atuasaun iha terrenu, membru KPK ne’e hato’o katak nia koñese di’ak suspeitu sira ne’e ho nune’e sira hakarak atu bolu-malu, hodi  rezolve tuir família iha sira nia bairru.

Maibé, tanba informasaun kona-bá kazu insidente ne’e parte PNTL rasik mós hetan ona, maka Ofisiá Polisia Suku (OPS) sei halo akompanãmentu bá iha prosesu ne’e tomak.

“Ita la kaer suspeitu, iha duni na’in-rua ne’ebé mak ita bolu mai halo identifikasaun, maibé, membru KPK ne’e hateten katak, sira hakarak atu rezolve interná sira nian. Entaun, ita husik fila-fali, nune’e sira bele rezolve tanba vítima rasik lakohi atu keixa,” Komandante Henrique da Costa, hateten tán.

La’ós ne’e de’it, iha Segunda (26/09/2022) kalan to’o madrugada, PNTL rejísta mós kazu ne’ebé hanesan, ida akontese iha área Santa Cruz, Postu Administrativu Na’in-Feto, ida tán, iha Bairru-Pité, besik jardím no kazu ikus liu mosu iha área Mali-Namuk, Suku Comoro, Díli.

Kazu konfrontu iha Santa Cruz, rate nia kotuk purvolta iha tuku-hitu kalan, mosu grupu rua mak tuda-malu ne’ebé mak deskonfia envolve hosi membru Grupu Arte Marsiál (GAM) balun.

Komandante PNTL Munisípiu Díli, Superintendente Xefe Polísia, Henrique da Costa.

Kronolojia kazu ne’e tanba iha provokasaun entre joven na’in-rua hosi membru GAM ho GAR, ne’ebé sadik malu, atu tuku-malu (sparing), maibé la konsege.

Maske nune’e, mosu tán fali joven na’in-rua seluk hosi área ne’ebá nian duni, bá konvida ka bolu fila-fali ninia kolega sira hosi fatin seluk, hodi ikus mai mosu ataka malu entre sira iha Santa Cruz.

“Entaun, mosu tuda-malu ne’ebé mak rezulta ita nia komunidade ida ne’ebé mak buka-moris, fa’an sasán ne’e ninia sasán ka fatin tunu sate hetan estragus. Ita identifika katak, joven na’in-rua ne’ebé mak halo provokasaun, ita fó ona orientasaun, nune’e dadeer ne’e bolu sira hodi halo identifikasaun. Tanba iha mós informasaun katak, vítima agora hato’o ona ninia keixa ba iha eskuadra Na’in-Feto,” komandante Henrique informa.

Insidente ida seluk ne’ebé mosu iha área Dom Aleixo, iha Jardím Bairru-Pité iha grupu rua mós tuda-malu iha ne’ebá.

Maibé, la rezulta ema ruma kanek ka sasán ruma estragus, tanba ekipa patrullamentu hosi Eskuadra Dom Aleixo nian responde kedan.

Enkuantu, kazu konfrontu ida tán ne’ebé mak mosu iha área Mali-Namuk, Suku Comoro, besik matebian, Sauzodu Lucas da Costa “Rama-Metan” nia rezidénsia.

Akontese grupu rua tuda-malu, hafoin remata atividade festa ida iha área ne’ebá nian, bainhira uma-na’in ho família sira haloot hela sasán, depois hetan tuda hosi grupu balun.

“Entaun, ita nia patrulla mós bá kedan iha ne’ebá hamutuk ho uma-na’in, ita konsege asegura tiha evidénsia ida, dekonfia katak evidénsia motór ne’e sira uza hodi hala’o asaun kríme, agora dadaun iha hela eskuadra Dom Aleixo, parte investigasaun sei bolu hamutuk ho uma-na’in, atu identifika motór ne’e sé nian, depois ita hala’o ninia prosesu,” Henrique hateten.

Hosi kazu insidente sira ne’ebé mosu dala-ida de’it iha kalan ida ne’e, maiória involve hosi membru GAM ho GAR sira.

“Sim, iha insidente haat ne’e insidente tolu, ita identifika katak, involve grupu artes marsiais, PSHT ho arte rituál, Sete-Sete ninian. Maibé, la rezulta ema ruma lakon vida, estragus boot ne’e laiha,” Komandante Henrique, subliña.

Tanba ida ne’e, PNTL liuhosi Komandu Munisipiu Dili, sei halo nafatin atividade sira hanesan prevensaun, tantu patrulla la’o ain nomós karreta inklui patrulla motorizada ninian, nune’e bele asegura.

Jornalista: Rogério Pereira Cárceres