Hatutan.com, (06 Outubru 2022), Díli—Primeiru Ministru (PM), Taur Matan Ruak deside ona hodi la simu subsídiu “fim do ano” ba uma-ka’in sira, maski  iha Kuarta (28/09/2022), governu liuhosi reuniaun ordináriu KM aprova projetu Dekretu-Lei ne’ebé aprezenta hosi Vise-Primeira Ministra no Ministra Solidariedade Sosiál no Inkluzaun Armanda Berta dos Santos, bá alterasaun dahuluk Dekretu-Lei númeru 37/2022, loron 25 fulan-maiu, kona-bá subsídiu “fim do ano” bá uma-kain sira.

Primeiru Ministru (PM), Taur Matan Ruak.

Maski Dekretu Lei ne’e seidauk haruka ba Xefe Estadu atu halo promulgasaun ka veta maibé alterasaun ne’e, Governu deside katak subsídiu $200 ne’e sei atribui universalmente ka oferese bá uma-ka’in hotu-hotu iha territóriu nasionál.

Lee Mós: Konsellu Ministru Mós “Kontra-Malu” Kona-bá Desizaun Subsídiu $200

“Dekretu Lei seidauk haruka mai Xefe Estadu no Governu sei haruka mai, iha opsaun rua. Ida universál maibé ema hotu-hotu ne’ebé iha kondisaun, nia foti ninian fó ba sira seluk ka simplesmente nia la simu. Ida seluk, ba de’it sira ne’ebé ki’ak. Se mak lakohi hetan subsídiu fim do ano $200 ne’e, bele entrega ba ema seluk, pur ezemplu ha’u la simu,” Taur Matan Ruak hateten iha Palásiu Prezidensiál Nicolau Lobato Bairru-Pité, Kinta (06/10/2022).

Uluk asume pasta nu’udár Prezidente Repúblika Taur Matan Ruak kontra pensaun vitalísia, saida mak nia halo maka, foti hodi fó bolsu estudu ba joven sira.

Tanba ne’e, se mak dehan nia lakohi simu, bele ho konsiénsia entrega fali ba ema ki’ak sira, enkuantu nia haree balun ibun mak ko’alia, maibé foti hatama daudaun ba bolsu.

“La presiza ko’alia maibé prátika. Se ema hotu mak sente katak nia iha liu kondisaun, foti osan ne’e no fó tiha ba nia viziñu, duké ko’alia de’it, hanesan ema dehan, ita nia hahalok vale liu fali ita ko’alia liafuan rihun ida.

Antes ne’e Prezidente Repúblika, José Ramos-Horta deklara ona katak, sei la simu subsídiu $200 no prefere atu oferese ba ema vulnerável sira.

Antes ne’e mós iha ona rekomendasaun hosi parte sosiedade sívil inklui Provedoria dos Direitos Humanos e Justiça (PDHJ) ho Comissão Anti Corrupção (CAC) katak, subsídiu “fim do ano” ho montante $200 ne’e tenke atribui bá familia sira ne’ebé vulnerável, la’ós bá ema hotu-hotu.

Lee Mós: Komisáriu Adjuntu CAC Husu Prezidente Repúblika Veta Alterasaun Dekretu Lei Subsídiu $200

Jornalista: Vito Salvadór