Hatutan.com, (27 Outubru 2022), Díli—Asosiasaun Futeból Munisípiu (AFM) hamutuk sia hamutuk ho klubu kampiaun Primeira Divizaun époka 2021 Karketu Díli FC no Klubu Kampiaun Segunda Divizaun époka 2021 Emanuel FC ne’ebé iha direitu de votu ba iha kongressu Federasaun Futeból Timor Leste (FFTL) 2022, ejize atu Prezidente FFTL Francisco da Costa Pereira Jerónimo rejigna an hosi nia kargu.

Karta Abaixo Asinadu hosi Klubu no Asosiasaun sira hodi ejize ba Francisco Jerónimo atu rejigna aan hosi Prezidente FFTL.

Asosiasaun Futeból Munisípiu (AFM) hamutuk sia ne’e mak hanesan, Asosiasaun Futeból Lautém, Asosiasaun Futeból Manatutu, Asosiasaun Futeból Aileu, Asosiasaun Futeból Ainaro, Asosiasaun Futeból Manufahi, Asosiasaun Futeból Díli Leste, Asosiasaun Futeból Viqueque, Asosiasaun Futeból Díli Oeste no Asosiasaun Arbitrazen.

Lee Mós: Kazu Instalasaun Set-Top Box RTTL,E.P, CAC Halo Buska no Apreensaun iha Gabinete MAPKOMS, FFTL ho Rezidénsia Likisá

Ejizénsia ne’e mosu tanba konsidera oras-ne’e daudaun futeból Timor Leste hasoru hela dezafiu no presiza asaun imediata hosi parte hotu-hotu hodi bele asegura futeból labele monu ba dezastre ne’ebé bele hamosu sansaun hosi Asian Football Confederation (AFC) no Federation International  Football Association (FIFA) tanba ezekutivu sira laiha seriedade atu organiza no dezenvolve futeból tuir kompromisiu ne’ebé iha.

Razaun Asosiasaun no no klubu sira primeira no segunda divizaun halo asaun ne’e tanba hakarak salva futeból Timor Leste hosi dezastre boot ne’ebé oras ne’e sai preokupasaun públiku liuliu amantes futeból Timor Leste.

“Asosiasaun sira ne’e halibur hamutuk tau forsa hodi ejize bá Prezidente FFTL Francisco da Costa Pereira Jerónimo atu rejigna an hosi ezekutivu FFTL tanba Liga Futeból Timor Leste (LFTL) époka ne’e la la’o,” Porta voz AFM, Aniceto Berlelo hateten liu hosi konferénsia imprensa ne’ebé hala’o iha Estádiu munisipál Díli, Kinta (27/10/2022).

Razaun fundamental maka, terseira divizaun ne’ebé Prezidente atuál promete atu halo iha munisípiu la realiza, treinadór nasionál rejigna an tanba FFTL la selu nia saláriu, orsamentu intensivu ba jogadór selesaun nasionál seidauk selu to’o ohin loron, selesaun U-17 la partisipa iha kualifikasaun taxa Asia no subsídiu ba Asosiasaun Futeból Munisipiu sira paradu desde fulan Agostu to’o ohin loron no mós kondena makas ba pessoál ne’ebé polisia detein no borgol tanba halo krime mais agora daudaun servisu fali tán iha FFTL.

“Ho razaun sira ne’e maka Asosiasaun sira hamutuk ho klubu kampiaun primeira no segunda divizaun époka 2021 abaixo assinadu ejizi atu Francisco Jerónimo rejigna an hosi nia kargu hanesan Prezidente FFTL tanba laiha kapasidade atu lidera FFTL iha rai doben ida ne’e,” Aniceto Berlelo hateten.

Asosiasaun Futeból Munisípiu (AFM) hamutuk sia hamutuk ho klubu kampiaun Primeira Divizaun époka 2021 Karketu Díli FC no Klubu Kampiaun Segunda Divizaun époka 2021 Emanuel FC, ne’ebé iha direitu de votu ba iha kongressu Federasaun Futeból Timor Leste (FFTL) 2022, ejize atu Prezidente FFTL Francisco da Costa Pereira Jerónimo rejigna an hosi nia kargu, liu hosi konferénsia imprensa ne’ebé hala’o iha Estádiu munisipál Díli, Kinta (27/10/2022).

Bainhira Prezidente FFTL iha fuan no hadomi Futeból Timor Leste, Asosiasaun sira hanoin katak lalikan liu hosi kongresu extraordinária ka kongresu anuál maibé di’ak liu rejigna an ho dignidade atu fó fali oportunidade ba ema seluk ne’ebé iha vizaun di’ak ba Futeból hodi kontinua hadi’a no dezenvolve futeból iha Timor Leste ba oin.

Asosiasaun mak iha kbiit atu fó votu konfiansa ba lideransa ida no asosiasaun sira mós mak iha kbit atu hatun hodi halo mudansa tanba lideransa ne’e la kumpri nia promesa no lori dezastre ba instituisaun.

“Ami ne’ebé mai halo asaun ne’e iha asosiasaun hamutuk 11, ne’e atu hatudu katak ami nia fiar ba lideransa FFTL atuál laiha ona. Tanba ne’e husu atu realiza kongresu extraordinária ka ho vontade rasik rejigna an,” nia ejize.

Asaun ne’ebé sira halo la’ós tanba iha ódiu pessoál ba ezekutivu sira iha FFTL, maibé tanba iha domin ba FFTL no hakarak dezenvolvimentu futeból ba oin.

Nune’e mós Prezidente Emanuel FC, Aleixo de Carvalho Monteiro hateten, iha estatutu FFTL artigu 23 fó dalan atu iha kongresu extraordinária bainhira iha lakunas ka ezekutivu Federasaun nian la kumpri ona nia devér hodi ezerse nia funsaun ho di’ak tuir promesa no kompromisu ne’ebé iha.

Ema ne’ebé fó podér ba Prezidente FFTL atuál maka Asosiasaun sira, tanba ne’e bainhira Asosiasaun sira laiha ona konfiansa ba lideransa atuál tenke  ejize atu obrigatoriamente tenke marka data ba kongresu extraordinária tuir artigu 23 estatutu FFTL haruka.

“La iha razaun atu Prezidente FFTL atuál la marka kongresu extraordinária tanba asosiasaun mak iha podér. Tamba ne’e ami abertamente hateten ba públiku katak, ami laiha ona konfiansa ba lideransa FFTL atuál, Francisco da Costa Pereira Jerónimo,” Aleixo do Carvalho Monteiro hateten.

Prezidente Asosiasaun Díli Oeste, Hipolito Soares hateten situasaun ne’ebé FFTL hasoru loloos ne’e estrutura no ezekutivu sira loke matan hodi haree ba realidade nune’e labele lori dezastre ba Futeból iha Timor Leste.

Asosisaun sira sei manda karta aberta ida ba estrutura FFTL atuál no bainhira laiha resposta ba karta ne’ebé submete maka sei halo asaun pasifika hasoru ezekutivu FFTL.

“Bainhira sira fó karta mak  la resposta ba ami nia ejizénsia maka ami sei halo asaun pasifika durante seman ida. Sei akumula jogadór primeira no segunda divizaun inklui públiku no amante Futeból iha Timor Leste atu husu nia rejigna an,” Hipolito Soares hateten.

Bainhira Francisco Jerónimo la rejigna aan maka Asosiasaun sira sei hato’o mós karta aberta ne’e diretamente bá AFC no FIFA bazeia ba ejizénsia ne’ebé iha.

Lee Mós: Deskonfia, MAPKOMS Nu’udar Prezidente FFTL Fó Projetu iha RTTL,E.P Ba Sekretaria FFTL

Jornalista: Vito Salvadór