Hatutan.com, (08 Novembru 2022), Díli—Tribunál Distritál Dili (TDD), iha Tersa 08 Novembru 2022 kontinua hala’o prosesu primeiru interrogatóriu bá arguidu sira hamutuk na’in-27, tanba deskonfia involve iha kazu asaltu iha aldeia Fatunaba, Suku Dare, Postu Administrativu Na’in-Feto, Munisípiu Díli.

Tribunál Distritál Dili (TDD), iha Tersa 08 Novembru 2022 kontinua hala’o prosesu primeiru interrogatóriu bá arguidu sira hamutuk na’in-27, tanba deskonfia involve iha kazu asaltu iha aldeia Fatunaba, Suku Dare, Postu Administrativu Na’in-Feto, Munisípiu Díli. Foto/Eliod dos Santos da Costa.

Iha kontinuasaun prosesu primeiru interrogatóriu ne’e, Ministériu Públiku (MP) ne’ebé reprezenta hosi Prokuradór Domingos Barreto, alega arguidu na’in-22 bá prizaun preventive ho arguidu na’in-lima bá Termu Identidade Rezidénsia (TIR).

Lee Mós: Kazu Dare, MP Promove Arguidu 27 ho Krime Omesídiu Simples no Krime Arma Branka

Alegasaun ne’e  tanba kazu asalta iha Dare, rezulta vítima Clementino Borges hetan kanek gráve iha ulun, kauza hosi tuda ho fatuk hosi grupu joven balun to’o sidadaun mane ne’e tenke lakon vida.

“TIR, ohin na’in-lima, restu ne’e Ministériu Públiku husu atu prizaun preventiva,” Advogadu Privádu Jerónimo Piedade da Silva hateten hafoin rona alegasaun hosi MP iha TDD.

Advogadu Privadu haktuir, konforme faktu sira hotu ne’ebé prodús durante prosesu primeiru interrogatóriu judisiál nia laran  hatudu katak, iha faktu balun labele nega, maske iha duni vítima ida mate. Faktu ida-ne’e, ema konsiente no ema hotu-hotu hatene, akontese duni konfrontu iha Dare.

Maski nune’e advogadu ne’e dehan, kazu ne’e labele sedu liu atu indika dehan, sé sé mak involve direta.

Nia mós rekoñese katak, iha duni indísiu sira katak iha ema ida-rua involve maibé balun laiha. Tanba ne’e, presiza liuhosi julgamentu sira mai oin mak foin bele hatene loloos.

“Iha primeiru interrogatóriu ne’e, pedidu hosi Ministériu públiku, husu maioria prizaun preventiva no balun ida-rua mak MP hanoin katak, nia la involve, ita dehan la merese. Involve ka la involve, ita hein iha julgamentu tuir mai. Maibé, MP sente ida ne’e dehan la merese la’e, atu hetan prizaun preventiva entaun, ohin husu TIR. Maibé iha ne’ebá, ita la nega katak sim, iha ema mate, iha konfrontu iha ne’ebá,” Advogadu Jerónimo Piedade, hateten.

Hatán kona-bá alegasaun sira hosi MP ne’e adekuadu ka lae, advogadu privádu ne’e dehan, iha alegasaun balun adekuadu, balun la’e. Sira ne’ebé deskonfia involve direta ne’e dala-ruma MP bele hanoin aplika ba prizaun preventiva.

“Ida ne’e versaun hosi defeza nian. Bá sira ne’ebé la involve iha momentu ne’ebá, laiha ne’ebá, no nein iha fatin ne’e, tuir defeza nia hanoin katak, sé ida ne’e prizaun preventiva, ne’e medida koasaun ida ne’ebé mak boot liu ona bá sira, karik sé bele sira hetan ida TIR, ka aprezentasaun periódika. Ida ne’e versaun hosi defeza nian,” nia dehan.

Maski nune’e Defeza mós submeter katak hotuhotu kumpri bá desizaun Tribunál nian. Bainhira iha ikus ona mak Defeza haree katak desizaun la merese ka la satisfas ho desizaun ne’e maka bele halo rekursu.

Hafoin rona tiha parte hotu, Juiz Singulár, Afonso Carmona deside hodi muda desizaun kazu ne’e bá tuku-lima (17:00), lorokraik Otl hodi bele rona desizaun saida mak TDD aplika bá arguidu sira, entre aplika hotu bá medida koasaun prizaun preventiva, ka bá TIR.

Audiénsia iha prosesu Primeiru Interogatóriu ne’e prezide hosi Juiz singulár, Afonso Carmona, Ministeriu Públiku reprezenta hosi Prokuradór Domingos Barreto, no arguidu sira hetan asisténsia legál hosi Advogadu na’in-haat.

Iha domingu (06/11/2022) foin lalais, durante iha prosesu Primeiru Interogatóriu judisial ne’e, MP ne’ebé reprezenta hosi Prokuradór Domingos Barreto, iha sala julgamentu promove arguidu sira ho Krime Omesídiu Simplés ne’ebé previstu artigu 138, hosi Lei Kodigu Prosesu Penál Timor-Leste no Krime Arma Branka hosi lei númeru 5/2017.

Arguidu sira ne’e mak deskonfia envolve iha kazu asalta iha Dare, ho naran inisial CCCS, FXTB, NM, LS, RAM, OCN, RSS, SSP, JMCS, ECS, SAR, RVST, ES, HCS, JCB, TAS, CC, MSS, TSL, FD, JMS, FCC, RSR, MZCC, TJM, FAT, no GCM.

Jornalista: Rogério Pereira Cárceres