Hatutan.com, (16 Novembru 2022), Díli—Primeiru Ministru (PM) no atuál Ministru Interiór (MI), Taur Matan Ruak, mak fó orientasaun bá Polísia Nasionál Timor-Leste (PNTL) hodi muda manifestante sira halo asaun sees hosi resintu Parlamentu Nasionál tanba konsidera perturba atividade órgaun soberania ne’e nian.

Manifestante sira iha resintu UNTL kontra desizaun PN atu sosa Karreta Pajero Sport ho OJE 2023, Tersa (15/11/2022).

“Atu informa de’it bá Prezidente Parlamentu no distintus no destintas sira, Ministru Interiór fó órden atu blokeia dalan tama mai iha ne’e no haruka sira bá fali iha Jardím 05 de Maiu, sé la sala. Ha’u espera katak sira kumpri ida-ne’e,” Primeiru Ministru, Taur Matan Ruak deklara durante diskusaun espesiáilidade OJE 2023 iha plenária PN, Kuarta (16/11/2022).

Lee Mós: Hafoin PN Kansela Sosa karreta Foun, Reitór UNPAZ Organiza Estudante Ejize-tán Alterasaun LPV

La’ós ne’e de’it, Reitór UNTL, João Soares Martins mós ante ne’e submete ona karta ofisiál ida bá Parlamentu Nasionál, liuhosi Prezidente Komisaun G PN, deputadu António Verdial, hodi informa katak, manifestasaun pasifika ne’ebé hala’o iha resintu UNTL hosi grupu Aliansa Maubere Nasionál (AMN) ne’ebé kompostu hosi reprezentante hosi estudante UNTL balun, universidade priváda sira seluk, nomós ema públiku balun, hahú iha loron 07 to’o 14 novembru 2022, laiha koñesimentu hosi parte autoridade UNTL.

“Tanba ne’e, iha loron 08 fulan-novembru 2022, UNTL hala’o ona intervensaun direta bá asaun refere, tanba prejudika prosesu aprendijazen ne’ebé tama ona ba faze ezame, teste semestrál ninian,” Prezidente Komsiaun G, deputadu António Verdial, halo leitura bá karta koñesimentu hosi retitór UNTL, iha sala plenária PN.

Iha karta ne’e, lideransa másimu UNTL nian informa mós katak, daudaun ne’e parte universidade hala’o preparasaun bá atividade Dias Natalís UNTL nian, liuhosi atividade extra-kurríkulár sira, nune’e, manifestasaun ne’ebé mak grupu ne’e halo, fó perturbasaun bá atividade universidade nian, nomós implika bá funsionáriu sira-nia servisu iha universidade.

Iha biban ne’e, Prezidente Parlamentu Nasionál (PPN), Aniceto Guterres afirma, manifestasaun ne’e, direitu no liberdade sidadaun ida-idak nian, dezde ke la vióla regra, la viola lei ruma, bele halo iha ne’ebé de’it no PN la kestiona ida-ne’e.

“Kestiona, tanba perturba funsionamentu órgaun soberania, nune’e mós konteúdu manifestasaun ne’e, insultus no akuzasoins falsas. Ida-ne’e mak ita kestiona. Agora, halo iha fatin seluk, sé iha kampus nafatin, autoriza ka la autoriza hosi reitór universidade ida-idak, ne’e kestaun interna instituisaun ida-idak nian. Basta ita informadu kona-bá asaun sira ne’ebé la’o tiha ona iha kampus sentrál UNTL, agora sira muda tiha bá fatin seluk,” PPN Aniceto Guterres, hateten.

Observasaun Hatutan.com, iha Kuarta 16 novembru 2022, tuku 09:00 dadeer, PNTL liuhosi Komandu Munisipiu Dili, lidera hosi Komandante Tránzitu, Inspetór Xefe, Domingos Sarmento Gama, tun direta bá terrenu hodi informa bá estudante sira atu labele halo tán manifestasaun, besik iha Parlamentu Nasionál nia oin.

Iha terrenu, Komandu Munisipiu Dili hetan reforsu hosi unidade Batalhão Ordém Pública (BOP), inklui membru tránzitu no seguransa Rodoviária, muda-sees Grupu manifestante sira hosi Aliansa Maubere Nasionál nian, bá halo fali demonstrasaun iha Jardím Muzeum Nasionál Rezisténsia nia oin.

Jornalista: Rogério Pereira Cárceres