Hatutan.com, (25 Novembru 2022), Díli—Prezidente Repúblika (PR), José Ramos-Horta husu na’in bá empreza tenke involve timoroan barak atu serbisu iha projetu investimentu Pelican Paradise.

Serimónia lansamentu projetu Investimentu Pelican Paradise iha Tasi tolu, Díli, Sesta (25/11/2022). Foto/Média PR.

Ramos-Horta husu ne’e durante partisipa iha serimónia lansamentu kona-bá projetu investimentu Pelican Paradise ne’ebé ninia konstrusaun fíziku lokaliza iha área Tasi-tolu, Díli, Sesta (25/11/2022).

Lee Mós: Governu Laiha Konflitu Ba Akordu Pelican Paradise

Xefe Estadukonsidera investimentu ne’e boot, agora daudaun na’in bá investimentu ne’e hahú ona prepara hadi’a rai, prepara buat sira ne’e lori mákina no dezeñu halo daudaun ona.

Iha intervensaun ne’e mós Ramos-Horta konsidera investimentu ida-ne’e nu’udár super-modernu hanesan mós ho nasaun sira iha Dubai no di’ak liu tán iha Sidney.

Tanba ida ne’e, na’in bá empréza ne’e sei arranka duni nia konstrusaun iha fulan-abril 2023, tanba agora sei prepara rai no dada bee, lori ekipamentu no halo kontratu ho empreza boot.

“Maibé ha’u husu kontratu ho empreza grupu timoroan balun ka la’e, sira dehan sim, sira konsege kontrata ho grupu timoroan balun. Tanba ha’u lakohi haree kontratór de’it, ema hosi liur mak mai halo projetu ne’e. Buat balun tenke ema mai hosi liur, mas buat balun timoroan lubuk ida bele halo. Ne’e ha’u sei tau-matan, atu halo obra ne’e depois rekruta, kuaze ita bele hateten 90% ka liután tenke timorense,” Prezidente Repúblika (PR), José Ramos-Horta, hateten.

Premiadu nobel da páz ne’e dehan,  timoroan sira mós sei serbisu iha fatin barbarak hanesan otél iha ne’e, eletrisista, ema ne’ebé haree bee, mekániku, komputadór, halo manutensaun mákina sira ne’e, servisu iha kuartu, servisu iha restaurante no seluk tán.

Serimónia lansamentu projetu Investimentu Pelican Paradise iha Tasi tolu, Díli, Sesta (25/11/2022). Foto/Média PR.

“Otél ne’e sei iha retaurante haat kedan, sei iha mós portu peska ida nia mak entrega roo peska atu peskadór sira bá peska, lori ikan mai fa’an bá otél, buat sira ne’e. Ha’u kontente, tanba ha’u akompaña investimentu projetu ne’e tinan lubuk ida nia laran,” nia hateten.

Tuir loloos projetu ne’e hahú tiha ona tinan lima ka sanulu liubá, maibé rai ida-ne’e iha ministru sira balun sempre komplika buat hothotu. Maibé, Ramos-Horta dehan, Timor-Leste sorte hetan ema ne’ebé relijiózu tebtebes no mai ho mehi atu ajuda Timor-Leste.

“La’ós tanba nia hakarak halo osan, tanba nia katuas ona no iha projetu boboot iha Singapura, iha Malázia ne’ebá, nia mai tanba nia relijiózu duni, nia hateten bá ha’u, nia fiar. Uluk, nia mai, nia lori kontentór lubuk ida, ajuda hahán, roupa, ai-moruk, no nia hateten, ne’e la sufisiente. Ha’u la rezolve problema Timor nian. Rezolve, kontribui halo Otél boot ida atu emprega joven sira,” Ramos-Horta afirma.

Dadaun ne’e buat hothotu na’in bá empréza Pelican Paradise, prontu atu arranka maibé iha tempu seluk, sira hakarak aumenta tanba konstrusaun bá otél boot sira iha área ne’e, totál iha faze tolu no dadaun ne’e sira arranka ho faze rua dala-ida de’it.

“Primeira no segunda faze halo dala-ida de’it. Depois terseira faze mak sei haree bá oin sei halo. Mas faze importante liu maka, primeira ho segunda faze,” Ramos-Horta, hateten.

Alkatiri Husu Aselera Projetu

Prezidente Repúblika, José Ramos-Horta kaer liman ho Eis Primeiru Minsitru Mari Bim Amude Alkatiri iha serimónia lansamentu projetu Investimentu Pelican Paradise iha Tasi tolu, Díli, Sesta (25/11/2022). Foto/Média PR.

Iha fatin hanesan líder nasionál Mari Bim Amude Alkatiri konsidera katak projetu investimentu boot Pelican Paradise sei lori  impaktu pozitivu ne’ebé boot bá ekonomia povu Timor-Leste, nune’e nia husu atu aselera liu tán projetu ne’e.

“Husu de’it atu projetu ne’e bele la’o ho lalais oitoan tanba Timor presiza mós fatin ida ne’ebé ema bele haree hanesan ikóniku,  ema bele mai iha ne’e no hatene katak iha kondisaun atu hela. Agora ha’u polítiku reformadu. Impaktu pozitivu, mais ha’u hanoin, ita kuandu halo serbisu ida bá ita nia rai, impaktu politiku ne’e, ita tenke haree uluk impaktu bá povu nia vida. Projetus ne’e basta loke dalan bá turizmu ida ne’ebé kualidade, signifika reseitas mós mai,” Mari Alkatiri, hateten.

Eis Primeiru Ministru ne’e dehan iha 2017 sétimu governu mak fó duni sertifikadu investidór bá Grupu Pelican Paradise no ne’e tempu naruk demais tanba ne’e nia husu atu aselera tanba iha barak mak moris de’it ho turizmu no turizmu Timor-Leste iha nia potensialidade ne’ebé boot, turizmu oioin, dezde komunitária, to’o turizmu bá kualidade nian.

“Agora ita hahú ho turizmu de kualidade ida ne’ebé mak bele loke dalan mós bá investimentu seluk. Investidór sira tenke iha konfiansa, odamatan ita tenke loke, sira hetan konfiansa, sira sei mai fali,” nia tenik.

Lee Mós: Juñu Finaliza Dezeñu, Novembru Pelican Paradise Hahú Konstrusaun

Primeira Faze Sei Fó Serbisu bá Ema 1.000

Serimónia lansamentu projetu Investimentu Pelican Paradise iha Tasi tolu, Díli, Sesta (25/11/2022). Foto/Média PR.

Iha biban ne’e, Prezidente Grupu Pelican Paradise, Datuk Edword Ong, hateten iha primeira faze projetu ne’e sei fó serbisu ba ema 1.000.

“Bá Aery no Prlican Paradise Resort sei fó servisu por volta rihun ida bá de’it faze tomak primeiru,” nia hateten.

Asinatura hosi SIA (Akordu Investimento Espesial) fó bá sira konfiansa atu hahú tau ona konsiderasaun iha dezeñu foun nian no espektasaun hosi turista sira depois de pandemia nomós espektasaun hosi Timor-Leste ne’ebé atu tama bá ASEAN iha 2023.

“Ami mós junta tiha ona Plot 3 designadu bá 228 servisu apartementu ne’ebé kuñesidu hanesan THE AERY ne’ebé fó xávi 624 no Plot sanulu (10) ne’ebé designadu bá Resort Hotel no kuñesidu hanesan Pelican Paradise Resort ne’ebé fó xáve 303 no Villa sanulu (10) hanesan Faze Primeira, totalmente fó ami xavi 927, Villa sanulu (10), Presidential suite ida (1) no Pent house haat (4), no ida sei iha uma 15 bá xefe de Estadu, kada ida iha dalan tama privádu no seguru,” Datuk Edword Ong, hateten iha diskursu.

Hosi THE AERY sei iha lifts privadu no kuartu toba ba individual 3 no 4. Lift kabuar to’o iha Sky Garden no Roof Garden. Pelican Paradise Resort sei iha Ballroom (salaun entkontru boot) ba vizitante rihun ida hat nulu (1040 Pax), Salaun enkontru sanulu resin ida (11), VIP Lobby.

Klubu Privádu bá deskansa rihun rua atus hitu walu nulu resin hitu mentro quadradu ba fatin arte no gym 30.000 Sq Ft, piscina de borda infinita metro-lima-nulu (50m), spa própriu bá fasilidade fitun lima, kobre husi kampu tennis no klubu ba labarik sira.

Datuk Edword Ong dehan, dezenvolvimentu ida ne’e tau atensaun maka’as hodi haforsa liután enviromentu. Sira halo ona integrasaun 5 MW hosi solar panel, Forsa solar Ró sei konverta bee tasi bá bee portátil hodi reforsa tán bee ne’ebé fornese hosi Autoridade, bá área drainage sei resikla hodi uza fali hanesan bee bá jardin nian.

“Jestaun hosi kompleksu tomak kometidu ba zero plástiku no prepara fatin karega karreta elektróniku ne’ebé ami antisipa kedan karik Timor-Leste sei uza hanesan saida maka ami haree iha nasaun dezenvolvidu sira. Bainhira de’it no tempu saida de’it posível, ami sei la uza ona kombustível fóssil nian,” Prezidente Grupu Pelican Paradise ne’e hateten.

Fatin Investimentu Pelican Paradise iha Tasi tolu, Díli. Foto/Média PR.

Datuk Edword Ong, afirma asinatura hosi SIA hanesan hahú ona dezafiu barak ne’ebé sei mai. Konkordánsia ne’e estátiku no la’o ba oin, nune’e relasaun ne’e dinámiku. Laiha konkordánsia ida maka bele kaer lia hotu antes tanba dezemvolvimentu ne’ebé pasivu loos.

“Ita presiza servisu hamutuk liman bá liman ho Governu no ho fiar ita hamutuk bele halakon kualkér dezafiu iha ita nia dalan atu lori dezenvolvimentu ida ne’e bá nia rohan ho Nai nia Glória,” hateten.

Nia kompromete katak, sira ho laran kma’an asegura bá onrável Primeiru Ministru (PM), Taur Matan Ruak, katak sira sei halo buat hotu ne’ebé bele halo ho hanoin atu lori projetu ida ne’e bá to’o nia rohan kompletamente.

“Ami hakarak halo duni ida liuhosi parseria ho Governu Timor-Leste, tanba sei karik laiha kooperasaun no korajen ami labele la’o dook hanesan agora no loos katak ami tenke kontinua konta ba iha futuru. Iha konklusaun, ha’u hakarak hato’o agradesimentu ba ita hotu nebe marka prezensa iha fatin ida ne’e hodi sai testamuña ba eventu  Ground Breaking ida ne’e. Ita-boot sira nia presenza iha ne’e hanesan korajen boot tebes mai ami,” Datuk Edword Ong agradese.

Iha okaziaun ne’e, Datuk Edword Ong, lori naran Grupu Pelican Paradise hato’o nia agradesimentu bá Prezidente Repúblika Ramos-Horta, tanba bele iha biban hodi partisipa iha eventu ne’e, nu’udár sira-nia konvidadu onorável.

“Ita sai ona inspirasaun mai ha’u durante tinan sanulu resin haat (14) atu ha’u bele duni ha’u nia mehi. Ita nia korajen durante ne’e pertinente loos. Obrigado Senhor,” Prezidente Grupu Pelican Paradise, Datuk Edword Ong, agradese ba Ramos-Horta.

Agradese mós Sua Eminénsia Dom Virgilio Cardeal  do Carmo da Silva ne’ebé dedika no fon bensaun ba  eventu Ground Breaking ne’e no bá dezemvolvimentu Pelican Paradise nian tomak.

Agradesimentu mós bá onorável Primeiru Ministru (PM), Taur Matan Ruak no membru Governu tomak, iha ekipa primeiru MCAE ne’ebé lideradu hosi Ministru Agio Pereira, depois Ministru Prezidensia Konsellu Ministru (MPKM), Fidelis Magalhães no Ministru Koordenadór bá Asuntu Ekonómiku (MKAE), Joaquim Amaral no ekipa sira hosi TradeInvest ne’ebé asselera ona prosesu bá aprovasaun final SIA (Akordu Investimentu Espesiál) iha 29 Setembru 2021 iha reuniaun Konsellu Ministru.

Aprovasaun finál ida ne’e, asinatura hosi SIA iha 3 Janeiro 2022 ho Títulu Aluga Rai ne’ebé asina hosi Vise Ministru Justisa (VMJ), José Edmundo Caetano.

Agradese bá Xanana

Prezidente Repúblika, José Ramos-Horta asina plaka iha serimónia lansamentu projetu Investimentu Pelican Paradise iha Tasi tolu, Díli, Sesta (25/11/2022). Foto/Média PR.

Datuk Edword Ong agradese bá Eis Primeiru Ministru, Kay Rala Xanana Gusmão ne’ebé tau ona fiar hodi asina tiha Konkordánsia Projetu inisiál iha Outubru  2008.

“Nia domin ba nasaun doben Timor Leste no vizaun admirável tebes. Tanba liuhosi fiar sagradu ne’ebé hafanun ami atu bele kaer metin espíritu no intensaun hosi SIA até ohin loron. Ami Apresia tebes no obrigadu señor,” Datuk Edword Ong, agradese tán.

Aagradese bá Eis Primeiru Ministru iha Sestu Governu Konstitusionál, Rui Maria de Araújo no Ekipa sesante iha MCAE ne’ebé Lidera hosi Estanislau da Silva hodi bele fiar iha projetu no hahú esbosu ba Konkordánsia Investimentu Espesial hanesan fundasaun no estrutura bá hahú investimentu.

Nune’e mós bá Primeiru Ministru iha Sétimu Governu Konstitusionál, Mari Alkatiri bá dezenvolve no estruturaliza tiha Akordu Investimentu Espesial ho maneira katak ida ne’e prátikal no ejekutável entre Governu no Investór.

“Ida ne’e ajuda ami dezenvolve tuir faze bainhira Governu hahú halo lívre rai. Obrigado Señor,” Datuk Edword Ong, agradese.

Agradese mós bá nia kaben Enung no nia oan sira, kolega sira ne’ebé mak halo ona viájen dook to’o iha fatin ida ne’e, bá suporta no fó korájen atu labele rende ba Vizaun ne’ebé Na’i Maromak fó.

Datuk Edword Ong konsidera apoiu sira ne’ebé liu ona, hanesan atu refleta bá jornada tinan sanulu resin haat (14) no ema hotu nia ajuda durante ne’e.

Datuk hakarak hato’o nia agradesimentu bá Na’i Maromak nia fidelidade no grasa hodi hahú jornada ida ne’e.

Lee Mós: Arrendamentu Rai ba Pelican Paradise Tinan 50, Vise MJ Kumpre Desizaun KM

Jornalista: Rogério Pereira Cárceres