Hatutan.com, (07 Dezembru 2022), Díli— Maski seidauk iha konkluzaun finál, maibé oras-ne’e prosesu  investigasaun hosi Policia Ciêntífica e Investigação Criminal (PCIC) kona-bá kazu Padre Abito José Brites Casimiro nia mate, la’o namanas hela.

Mate-isin Padre Abito José Brites Casimiro haloot ona iha Semitériu Padre sira nian iha Maloa Ailok laran, Dili, iha Kuarta 24 Agostu 2022. Foto/Hatutan.com.

Portavós PCIC, Octávio da Costa Araújo hateten, prosesu bá kazu ida-ne’e konforme lei, tama bá iha kompeténsia PCIC nian.

Lee Mós: Xefe Estadu Sei Buka Hatene Investigasaun Kona-bá Padre Abito ho José Bernardo Nia Mate

Iha momentu, depois Investigadór sira elabora tiha auto-notísia krime bá iha Ministéiru Públiku (MP) no MP delega fila-fali kazu ida ne’e bá PCIC hodi kontinua hakle’an prosesu.

“Prosesu ne’e to’o iha ne’ebé, rona ona sé, halo ona oinsá, ida ne’e segredu no ami labele fó hatene. Klaru katak, prosesu bá kazu sira ne’e la’o. Sedu ka tarde sei iha desizaun finál hosi Tribunál,” Octávio da Costa Araújo hateten iha kna’ar fatin Caicoli, Kuarta (07/12/2022).

Tuir kronolojia, iha Segunda (22/08/2022) maizumenus iha tuku 20:00 Otl, Padre Abito ho sasin moris inisiál MSR hetan asidente tráfegu ka monu ho motór marka Jupiter MX Xapa Matríkula E 8081 iha área Dare, Munisípiu Díli.

Asidente ne’e rezulta Padre Abito mate fatin, enkuantu sasin moris MSR ne’ebé sa’e hamutuk motór ida ho Amu ne’e kondisaun di’ak hela, inklui motorizada mós laiha buat ruma mak aat.

Informasaun inisial ne’ebé molok ne’e, PNTL liuhosi Komandu Munisipiu Dili rekolla hosi sasin moris MSR katak matebian Padre Abito mak kontakta nia liuhosi haruka mensajen, hodi sira na’in-rua konvida-malu atu ba hán kalan iha restaurante ida ne’ebé mak pertense bá área Dare nian.

Maibé, vítima ho MSR la’o to’o iha dalan klaran, haree bá kondisaun rai ne’ebé kalan ona, entaun sira deside tun fila-fali mai Díli, liuhosi dalan foun Dare nian, tun mai liuhosi Mauhoka nian uma leten bá, dala-ruma halai sees, no ikus mai tenke xoke morru protesaun ida iha área ne’ebá no rezulta vítima mate fatin.

Jornalista: Rogério Pereira Cárceres