Hatutan.com, (15 Dezembru 2022), Díli—Judicial System Monitoring Program (JSMP) rekomenda bá Prezidente Repúblika (PR), José Ramos-Horta atu halo fiskalizasaun preventiva no abstrata bá Lei Organizasaun Judisiária.

Diretora JSMP, Ana Paula Marcal. Foto/Espesiál

JSMP husu ne’e tanba Parlamentu Nasionál (PN) iha loron 12 Dezembru 2022, liuhosi reuniaun plenária aprova ona iha finál globál ho votus afavór 39, kontra 0 no absteinsaun 0 ba Projetu Lei Nú.47/V(4a) Primeira alterasaun ba Lei Nú.25/2021 Lei ba Organizasaun Judisiária.

Lee Mós:Prezidente Repúblika Hakarak Apoia JSMP Promove Funsionamentu Seitór Justisa

Objetivu prinsipál hosi alterasaun ne’e atu fiksa prazu foun ba instalasaun Tribunál Supremu Justisa (STJ) no Tribunál Rekursu (TR) inklui fiksa mandatu foun ba Komisaun Instaladora.

“JSMP hanoin katak maski alterasaun ne’e importante hodi fó espasu tempu ne’ebé natón ba Komisaun hodi bele hala’o nia serbisu ho kualidade, maibé JSMP preokupa ho intervensaun politíka iha setór judisiáriu hanesan hari’i sede Komisaun ba Selesaun no Rekrutamentu juiz iha Parlamentu Nasionál ho nia orsamentu tama iha orsamentu privativu Parlamentu Nasionál nian. Nune’e, JSMP rekomenda ba Prezidente Repúblika hodi husu fiskalizasaun preventiva no abstrata ba lei refere,” Hatutan.com sita deklarasaun Diretora Ezekutiva JSMP, Ana Paula Marçal iha komunikadu.

JSMP nia haree katak, provizaun alinea b) parágrafu 2) Artigu 125 K-RDTL prevee katak juiz sira STJ nian, alende ida Parlamentu Nasionál mak nomeia, sira seluk Konsellu Superiór Majistratura Judisiál (KSMJ) mak nomea.

Provizaun parágrafu 1) Artigu 128 prevee mós kona-bá kompeténsia KSMJ hodi nomeia juiz sira STJ nian. Ida ne’e signifika, kuaze juiz sira STJ sei nomeia hosi KSMJ.

Nune’e, JSMP hanoin, sede Komisaun ba selesaun no rekrutamentu juiz nian tuir loloos harii iha KSMJ nia okos ka supervizaun, nune’e, bele tulun no fasilita prosesu selesaun no rekrutamentu ne’ebé di’ak no evita konflitu interese no intervensaun polítika.

Tanba ne’e, JSMP rekomenda atu bele altera mós provizaun parágrafu 10) Artigu 83 Lei Nú. 25/2021 kona-bá Lei Organizasaun Judisiária ne’ebé prevee katak Komisaun ba selesaun no rekrutamentu juiz sira ne’e nia sede iha Parlamentu Nasionál atu instala iha Tribunál.

JSMP rekomenda ba Prezidente Repúblika uza poder konstitusionál tuir provizaun aliñea e) Artigu 85, parágrafu 1) Artigu 149 no alinea a) Artigu 150 K-RDTL hodi husu ba STJ nia apresiasaun preventiva no abstrata ba iha provizaun parágrafu 1) Artigu 83 kona-ba extensaun prazu no parágrafu 7) no 8) kona-bá prazu nomeasaun ba Komisaun Rekrutamentu no Selesaun.

JSMP mós hanoin katak importante atu valoriza investimentu Estadu nian no investimentu pesoál juiz kareira sira no sira-nia serbisu, dedikasaun no kontribuisaun ne’ebé hala’o durante ne’e nu’udár juis TR no mós iha tempu hanesan hala’o knaar hanesan Juiz Konselleiru STJ nian.

Juis sira ne’e, JSMP rekomenda atu la nesesariamente partisipa iha prosesu selesaun no rekrutamentu, maibé simu de’it nomeasaun hosi KSMJ ba juiz Konselleiru STJ nian.

Atu bele asegura legalidade iha prosesu ne’e, JSMP rekomenda bá Prezidente Repúblika no Parlamentu Nasionál hodi prevee kedan artigu ida kona-bá prosesu ida-ne’e.

Jornalista: Elio dos Santos da Costa