Hatutan.com, (23 Dezembru 2022), Díli- Prezidente Repúblika (PR),  José Ramos-Horta, motiva populasaun Munisípiu Ermara, inklui hosi munisípiu sira ‘poténsia’  kafé atu badinas liután kuda kafé iha ida-idak nia kintál.

Lee Mós : Kafé Reprezenta Timor Nia Identidade no Kultura Sekulár

PR Ramos-Horta partiispa iha kampaña nasionál kuda kafé iha Suku Fatubesi, Ermera, Sesta (23/12/2022). Foto/GPR

Liuhosi kampaña Nasionál Kuda Kafé iha Suku Fatubesi Postu Administrativu Hatulia B, Munisípiu Ermera, Sesta (24/12/2022), Xefe Estadu husu agrikultór sira kontinua servisu maka’ás bá kuidadu kafé  no kuda kafé nune’e bele aumenta produsaun hodi tulun dezenvolvimentu ekonómiku família nian.

Tema bá programa kampaña nasionál kuda kafé iha Suku Fatubesi,  , postu Administrativu Hatulia B, Munisípiu Ermera, mak “HADOMI KAFÉ, KAFÉ ITA NIA KULTURA”.

Advertisement

Komunikadu ne’ebé Hatuta.com asesu hosi Palásiu Prezidensiál Repúblika, relata katak hafoin entrega enxada bá agrikultór sira, Xefe Estadu kuda simbolikamente kafé iha rai mamuk iha Fatubesi no husu ba agrikultór sira atu servisu maka’as liu tan.

“Ita tenke trata kafé didi’ak, kafé na’in sira kuda kafé, konforme halo tuir tékniku sira hatete, tau matan ne’e, la’ós de’it tinan-tinan ba ku’u kafé, lae, ita atu ku’u hudi ruma tenke kuda hudi, rega ai-funan ne’ebé de’it, kafé mós hanesan, hamoos didi’ak, sanak sira tuan ne’e, ita tesi, kuda beibeik para tinan 10 ka 20 mai, imi nia bei-oan sira mak iha kafé ne’e, se la’e kafé lakon,” Prezidente Repúblika José Ramos-Horta hateten.

Xefe Estadu apela nafatin bá to’os na’in no tékniku sira, atu halo tratamentu di’ak ba kafé, prevene atake peste, hodi haforsa produsaun no tulun dezenvolvimentu ekonómiku.

Iha fatin hanesan, Sekretáriu Estadu Peska, Elidio de Araújo ne’ebé reprezenta Ministru Agrikultura no Peska, elojia inisiativa hosi Prezidente Repúblika no parseiru sira ne’ebé aposta bá melloria produsaun kafé iha Ermera.

Pr Ramos-Horta kuda kafé oan iha kampaña nasionál kuda kafé iha Suku Fatubesi, Ermera, Sesta (23/12/2022). Foto/GPR

“Ministériu Agrikultura sente kontente no orgullu tebes ho esforsu husi Prezidente Repúblika, tanba pasu ida reabilitasaun, ohin loron ida-ne’e, inisia hatama tan kafé (Kampaña Nasionál Kuda Kafé) para atu aumenta, normalmente tenke kuidadu.” Elidio de Araújo hateten.

Prezidente Auroridade Munisipiu Ermera, Eugébio Salsinha, agradese no apresia bá empreza nasionál sira ne’ebé sempre iha korajen no motivasaun atu servisu hamutuk ho agrikultór kafé sira hodi kuidadu no hadi’a produsaun kafé iha kada tinan.

Advertisement

“Ha’u agradese mós ita-nia empreza lokal sira hanesan NCBA ho Timor Global, ne’ebé halo ona fatin prosesamentu ba kafé no kualidade bá merkadu internasionál,” Eugébio Salsinha hateten.

Kampaña Nasionál Kuda Kafé, partisipa husi Embaixadór Brunei Darusalam, Nova Zelándia, membru Parlamentu Nasionál balun, Kargu Xefia sira iha Ministériu Agrikultura no Peska, autoridade lokál no kafé na’in sira.

Lee Mós : Xina Apoiu $70,000 Hasa’e Produsaun Kafé Timor

Jornalista: Vito Salvadór

Advertisement