Hatutan.com, (27 Dezembru 2022), Díli- Prezidente Partidu Congresso Nasionál de Reconstrução Timorense (CNRT), Kay Rala Xanana Gusmão, apela bá kuadru no militante partidu CNRT atu mantein servisu no entrega an bá prinsípiu Fraternidade Umana hodi bele kumpre obrigasaun ida atu haree bá ema seluk no povu tomak nia moris di’ak ho Timor-Leste nia dezenvolvimentu bá futuru.

Prezidente partidu CNRT, Kay Rala Xanana Gusmão. Foto/Elio dos Santos da Costa

Kay Rala Xanana Gusmão hato’o lia hira ne’e iha ambitu selebrasaun festa Natál hamutuk ne’ebé partidu CNRT organiza iha sede sentral partidu nian iha Bairo Grilos, Díli, Tersa (27/12/2022), ne’ebé partisipa mós hosi Prezidente Repúblika, José Ramos-Horta ho parseiru no konvidadu sira seluk.

Prezidente Partidu CNRT, Kay Rala Xanana Gusmão hateten, hamutuk iha  CNRT  atu assume espíritu Fraternidade ho mós sira ne’ebé iha li’ur, atu nune’e, tau hamutuk hanoin hodi bele kumpre obrigasaun ida atu haree bá ema seluk no povu tomak nia moris di’ak no Timor-Leste nia dezenvolvimentu.

Kuadru, estrutura, simpatizante no apoiante sira partidu CNRT  halibur hamutuk la natoon de’it atu selebra natál hamutuk, maibé mai ho prinsípiu ida, tau hanoin hamutuk bá malu, halo sakrifísiu, hodi lori responsabilidade no haluhan an rasik la’ós aproveita partidu CNRT sa’e tiha bá leten haluha tiha povu nia moris.

“Ita hotu tenke iha prinsípiu ida de’it entrega an bá objetivu bo’ot hadia povu nia moris, hadia ita nia rain. Ida ne’e mak tenke sai orientasaun ema hotu nian iha partidu CNRT,” Xanana Gusmão hateten.

Líder Karismatiku ne’e hatutan CNRT nia objetivu la’ós deit atu ukun, maibé aproveita povu nia konfiansa hodi servi povu ne’e. Se mak tama iha partidu CNRT la’ós atu aproveita hodi buka oportunidade, maibé mai ho responsabilidade atu kontribui, servisu fó laran tomak tuir espiritu Fraternidade Umana.

PR Ramos-Horta partisipa iha festa natal hamutuk partidu CNRT, 27 fulan-Dezembru 2022. Foto/Elio dos Santos da Costa

Iha fatin hanesan Prezidente Repúblika (PR), José Ramos-Horta iha nia diskursu hateten laiha mensajen natál ida espesial no husu atu kontinua festa natál ho di’ak, liu-liu prepara an ba eleisaun  parlamentar 2023, ne’ebé hela deit semana balun, fulan balun, tamba ne’e partidu politiku hotu bainhira tun ba ida-idak nia baze prepara aan halo didiak.

“Bainhira tun ba idak-idak nia baze, nia partido, prepara an didiak ba eleisaun 2023 para Timor dala ida tan, mensajen ba mundu, demokrasia ida metin, klean, la iha violensia étnika, religiosa no polítika.” Prezidente Repúblika José Ramos-Horta hateten.

Xefe Estadu hatutan, demokrásia iha Timor-Leste tenke sai ezemplu bá mundu hanesan rai ida mais tolerante, simu malu hodi fo resposta ba povu nia mehi, povu nia nesésidade, povu nia susar ka sofrimentu sira.

Iha selebrasaun natál ne’e Pe. Ângelo Salsinha iha nia reflesaun hateten natál tenke sai lalenok atu ema hare hikas komprimisu sira no misaun sira ne’ebé iha ema nia moris.

“Natál ne’e onra no domin, dame no justisa ne’ebé Cristo husik hela ba umanidade liu husi nia simplicidade hodi moris iha balada han fatin. Maromak oan husik hela onra, atu fo hanoin ba umanidade planu salvasaun Maromak nian,” Pe. Ângelo Salsinha hateten.

Natál halo ema rekoñese nia na, halo ema hanoin no hare hikas nia aktu sira hodi reflete iha nia misaun moris hanesan ema sarani, hanesan polítiku no hanesan servidor do estadu.

Hanesan Francisco Borja da Costa hateten Natál lolos tenke sai odamatan ba verdadeiru Fraternidade, katak natál atu sai odamatan ida ba maualin lolos iha moris

Partisipa iha selebrasaun natal nee Prezidenti da Republika José Ramos Horta halao no estrutura Partido Sekretariu Jeral Partido CNRT Francisco Kalbuadi Lay, inklui estrutura CPN no membru CPN, Estrutura KP-CNRT, KP-SAUDE CNRT, OJP-CNRT, kordenador Partido CNRT 12 munisipiu inklui kordenador CNRT-RAEOA, inklui lider partido sira seluk maka hanesan  Antonio Kalohan (PD), Francisco David ‘Abonu’ (UDT), João Mariano Saldanha (Partido Republikano), Ricardo Nheu (Frenti Mudansa), Jose Luis Guterres ‘Lugu’, Prezidenti Asosiasaun Xineza Timor  Leste Kathleen Goncalves inklui mos konvidados espesial Vise Ministru Negosiu Estranjeiru i Kooperasaun Republika Dominikana José Julio Gómez.

Jornalista: Vito Salvadór