Hatutan.com, (28 Dezembru 2022), Díli—Polísia Nasionál Timor-Leste (PNTL) liuhosi Komandu Jerál distribui tán motórizada hamutuk unidade 100 ho karreta Marka Mitsubishi (tenki) unidade ualu, bá komandu munisipiu 13, Rejiaun Administrativa Espesial Oecusse Ambeno (RAEOA), Unidade sira nomós iha Komandu jerál rasik, Kuarta 28 dezembru 2022.

Polísia Nasionál Timor-Leste (PNTL) liuhosi Komandu Jerál distribui tán motórizada hamutuk unidade 100 ho karreta Marka Mitsubishi (tenki) unidade ualu, bá komandu munisipiu 13, Rejiaun Administrativa Espesial Oecusse Ambeno (RAEOA), Unidade sira nomós iha Komandu jerál rasik, Kuarta (28/12/2022). Foto/Elio dos Santos da Costa.

Komandu jerál distribui mós ekipamentu elektrónika bá Unidade no Departementu sira mak hanesan Desktop, UPS Printer, inklui Mobiliáriu bá Eskuadra,  kadeira, meza,  hahán bá membru sira iha munisípiu.

Lee Mós: Komandu PNTL Entrega Viatura Unidade 61 Bá Eskuadra Sira

“Durante tinan barak nia laran, PNTL hasoru liu problema ida-ne’e, maibé iha tinan ida-ne’e duni no tinan kotuk, komandu jerál konsege responde ona bá eskuadra sira, seksaun balun iha munisipiu, hodi instala komputadór foun hotu. Ida-ne’e tanba OJE 2022 nian,” Komandante jerál PNTL, Komisáriu Polisia Faustino da Costa hateten hafoin serimónia pose ba Komandante foun Munisípiu Dili, iha Kuartél Jerál PNTL, Caicoli, Kuarta (28/12/2022).

Kona-bá OJE 2023 nian, komandu PNTL sei foka fila-fali bá unidade sira, hanesan Unidade Espesial Polisia (UEP), Unidade Polisia Marítima (UPM), Unidade Patrullamentu Fronteira (UPF), nomós seksaun balun iha komandu munisípiu sira.

Deskrisaun sasán hirak ne’ebé distribui ona mak hanesan; Motorizada marka KLX Kawasaki unidade 100, Karreta marka Mitsubishi (tenki) unidade 8, Ekipamentu eletróniku ne’ebé distribui bá Unidade no Departamentu sira dekstop 50, printer 50 no UPS 50. Mobiliáriu bá Eskuadra 69, inklui Munisipiu Ataúro iha kadeira 400, armáriu 400 no meza eskritóriu 400 kada eskuadra hetan  set neen.

Hosi motorizada ho unidade 100 ne’e, fahe bá Komandu Munisipiu Aileu (2), Ainaro (2), Ataúro (1), Baucau (3), Bobonaro (4), Covalima (5), Dili (4), Ermera (5), Lautem (4), Likisá (1), Manatuto (4), Manufahi (2), RAEOA (2), Viqueque (3).

Polísia Nasionál Timor-Leste (PNTL) liuhosi Komandu Jerál distribui tán motórizada hamutuk unidade 100 ho karreta Marka Mitsubishi (tenki) unidade ualu, bá komandu munisipiu 13, Rejiaun Administrativa Espesial Oecusse Ambeno (RAEOA), Unidade sira nomós iha Komandu jerál rasik, Kuarta (28/12/2022). Foto/Elio dos Santos da Costa.

Motorizada bá departamentu CN (4), Ofisial Polisia Suku (OPS) iha (16), Departamentu Tránzitu no Seguransa Rodoviáriu (10), Departamentu Serbisu Informasaun Polisia (10), bá UPM (4), no motorizada hamutuk 14, distribui bá departamentu foun ne’ebé mak komandu foin estabelese.

Karreta mitsubshi (tengki) 8 ne’e, distribui bá UPF (1), UPM (1), Kuartel Jerál (3), maibé kareta 1 sei uza hanesan tengek bee nian, 1 bá mina nian, no 1 seluk hodi Xupa sentina, ne’ebé mak sei halo operasaun bá komandu munisipiu hotu iha territóriu nasionál, tuir nesesidade.

Viaturas, Ekipamentu Eletróniku sira, Mobiliáriu no hahan matak hirak ne’e, kompras ho orsamentu hosi OJE 2022 nian. Kareta 8 ne’e sosa ho montante osan hamutuk rihun $549 (rihun atus-lima, haat-hulu-resin-sia).

Motorizada sira ne’e sosa ho montante orsamentu $300.000 (rihun atus-tolu). Mobiliáriu ho montante orsamentu $250.000 (rihun atus-rua, lima-nulu). Ekipamentu sira Eletróniku nian, ho orsamentu $200.000 (rihun atus-rua) no hahán matak sira, sosa ho valór orsamentu hamutuk $14.000 (rihun sanulu-resin-haat). 

Jornalista: Rogério Pereira Cárceres