Hatutan.com, (06 Janeiru 2023), Díli—Autoridade de Inspeção e Fiscalização da Atividade Económica Sanitária e Alimentar, Instituto Publico (AIFAESA,I.P), kontinua halo kontrolu no alerta bá distribuidór masin-midar, bebidas no sigaru atu labele halo monopóliu hodi fa’an sasan tuan ne’ebé importa antes ona ho folin atuál depois de Dekretu Governu nian atu hasa’e taxa tama vigór.

Espésie Bebidas ne’ebé folin sa’e iha inísiu tinan 2023.

AIFAESA,I.P  alerta ne’e tanba informasaun ne’ebé espalla iha públiku katak, produtu hotu-hotu folin sa’e maibé hakarak klerifika katak, loloos ne’e bebidas de’it ho masin midar, inklui sigaru no karreta mak ninia taxa ne’e sa’e bazeia bá desizaun Governu nian liu hosi dekretu ne’ebé vigora ona iha dia 03 Janeiru 2023.

Lee Mós: Governu Hasae Taxa Importasaun Halo Susar Tan De’it Povu Kbiit Laek

“Tanba ne’e maka AIFAESA ninia prezensa ne’e atu konfirma de’it kona-bá invoice ne’ebé iha, tanba tuir Lei N. 4/2011 1 Juñu Kona-bá Krime sira Asambarkamentu no Espekulasaun nian ne’e bandu atu produtu ne’ebé iha estoke tuan, distribuidór sira labele fa’an iha momentu presu sa’e hanesan agora daudaun tuir folin atuál,” Sub Inspetór Jerál AIFAESA, Dionísio Neto da Silva, hateten bainhira halo inspesaun ba distribuidór Perisos Ai-mutin, Díli, Sesta (06/01/2023).

Advertisement

Nia fó ezemplu katak, agora daudaun taxa sa’e no produtu antes ne’e distribuidór sira fa’an ho folin $6.50 cent maibé tanba dehan taxa sa’e, entaun produtu anteriór ne’e sira fa’an fali ho folin atuál no AIFAESA sei la tolera ida ne’e labele akontese tanba kontra lei.

Ho ida-ne’e maka AIFAESA agora daudaun halo hela vizilánsia hodi tama no sai loja, liuliu distribuidór sira hodi halo inspesaun ba fatura sira atu hatene kona-bá sasan ida ne’ebé mak estoke tuan no sasan ida ne’ebé mak estoke foun no fa’an tuir folin atuál.

Governu hakarak Hasa’e reseita dométika hodi introdús impostu iha Proposta Orsamentu Jeral Estadu (OJE) 2023, Governu propoin ba Parlamentu Nasionál atu introdús impostu seletivu konsumu foun mak hanesan 10% impostu ba karreta ho valór liu $10.000, 20% ba karreta ho valór liu $25.000, 30% ba karreta ho valór liu $50.000.

Aumentu iha impostu konsumu ba tabaku no produtu tabaku seluk hosi $50 kada kilograma sa’e ba $100 kada kilograma, Impostu konsumu foun $1.00 kada kilograma ba masi-midar.

Introdusaun impostu konsumu foun ho valór $3 kada litru ba bebida asukarada hanesan Fanta, Coca-Cola, Sunkist, Sprite no sst. Governu introdús ida-ne’e atu proteje sidadaun sira nia saúde públiku.

Advertisement

Aleinde ne’e, Governu mós propoin atu hasa’e impostu importasaun (Import Duty) hosi 2,5% ba 5%.

Tuir observasaun Jornalista iha terrenu, bebidas kalén hanesan Fanta, Sprite, Coca-Cola, Sagiko, Delos no seluk tán ne’ebé iha tinan 2022 ho folin entre $9 to’o $12 kada kaixa, agora daudaun sa’e ba $18 kada kaixa. Masin-midar iha 2022 saka ida ho folin $40 agora sa’e ba $80 kada saka.

Jornalista: Rogério Perreira Cárceres  

Advertisement