Hatutan.com, (20 Janeiru 2023), Díli-Primeiru Ministru (PM), Taur Matan Ruak, fó ona orientasaun bá Ministru Obras Públikas (MOP), Abel Pires, atu hahú no aselera prosesu manutensaun bá estrada sira iha territóriu nasionál molok kampaña no eleisaun Parlamentár (ElPar), tinan ne’e.

Primeiru Ministru (PM), Taur Matan Ruak.

“Ami agradese bá Sua-exelénsia Primeiru Ministru nia tempu, husu ona ami mai, para atu halo atualizasaun bá serbisu lubuk ida ne’ebé mak Obras Públika halo hela. Primeiru Ministru  fó orientasaun maka’as liubá, oinsá atu halo manutensaun estrada iha Timor, liu-liu iha kontestu atu fasilita prosesu eleisaun ne’ebé mak sei akontese iha tinan ida-ne’e,” Ministru Obras Públika (MOP), Abel Pires, hateten bá jornalista sira iha hafoin sorumutu ho Primeiru Ministru Taur Matan Ruak, iha Palásiu Governu, Dili, sexta (20/01/2023).

Ministru Abel Pires informa mós progresu sira kona-bá preparasaun bá rehabilitasaun estrada hosi Postu Administrativu Laga bá Baguia, ho Laga bá Quelicai, Munisípiu Baucau.

Nia mós relata kona-bá projetu foun bá rehabilita estrada foun sira ne’ebé mak oras ne’e sei iha faze konkursu públiku, mak hanesan, hosi Manatuto Villa (Obrato) bá Postu Administrativu Laclo, no estrada urbana iha Maliana Villa, iha projetu rua; Aileu, bá Lequidoe, Alas bá Wedau-Berek.

Advertisement

“Ita hein katak, iha tempu badak, prosesu ne’e bele remata, depois bele ona submete dokumentu sira bá Kámara Konta  atu fó vistu,” Ministru Abel Pires, informa.

IGEADI Promete Finaliza Estrada Ligasaun Kribas–Camedar

Hosi sorin seluk, Prezidente Institutu Jestaun Ekipamentu no Apoio Dezenvolvimentu Infraestrutura (IGEADI, sigla portugés), Hermenezilda da Costa, hateten, IGEADI iha komprimisu atu finaliza prosesu melloramentu estrada ligasaun entre Suku Kribas ba Aldeia Camedar, Suku Barique, Postu Administrativu Natarbora hodi fasilita komunidade sira asesu ba merkadu, saúde no kontribui ba hasae rendimentu komunitáriu iha fatin refere.

Prezidente Institutu Jestaun Ekipamentu no Apoio Dezenvolvimentu Infraestrutura (IGEADI, sigla portugés), Hermenezilda da Costa. Foto/Elio dos Santos da Costa

Iha tinan kotu kPrezidente Repúblika José Ramos-Horta konvida Institutu Gestaun Ekipamentu no Apoio Dezenvolvimentu Infraestrutura (IGEADI), momentu ne’eba sei Institutu Jestaun Ekipamentu (IGE), hodi hatoo proposta rua; ida mak melloramentu estrada ligasaun husi Suku Kribas ba Suku Barique Antigu no ida seluk mak normalizasaun Mota Laclo.

Atividade normalizasaun dalan husi Suku Kribas ba suku Barique Antigu  ne’ebé ho naruk kilómetru lima (5) lao tiha ona desde tinan kotuk maibé tamba ferias ba loron boot natal no fim do ano, nune’e ekipa husi IGEADI sei tun hotu mai nasionál no passa ferias ho família.

“Ekipa IGEADI preparadu hikas ona atu tun ba terenu hodi kontinua hala’o servisu hodi finaliza atu bele fasilita komunidade sira iha suku refere asesu ba estrada nune’e bele fasil mos asesu ba merkadu no saúde,” Hermenezilda da Costa hateten.

Advertisement

Kona-bá Nota Laclo, ekipa IGEADI hafoin enkontru ho Prezidente Repúblika, orienta kedas tékniku sira tun bá terenu hodi hahú serbisu, tamba tuir dadus ne’ebé gabinete Prezidente Repúblika iha katak kuaze komunidade sira labele halo natar tamba irigasaun ba natar hetan estragus no natar sira ne’ebé abandona kuaze  hectare 9.000.

Jornalista: Rogério Pereira Cárceres/Vito Salvadór

Advertisement