Hatutan.com, (06 Fevereiru 2023), Díli- Sekretáriu Jerál Partidu Frente Revolucionário Timor-Leste Independente  (FRETILIN), Marí Bin Amude Alkatiri, husu bá Ministériu Públiku (MP) atu bolu Kay Rala Xanana Gusmão hodi aprezenta prova korrupsaun sira ne’ebé Xanana akuza hasoru nia.  

Lee Mós : Xanana Hakarak CNRT Hetan Kadeira 33 iha PN Hodi Halo Revizaun bá PEDN no Hadi’a Povu Nia Moris

Sekretáriu Jerál Partidu FRETILIN) Mari Alkatiri. Foto/Elio dos Santos da Costa

“Ha’u la hatama keixa bá Ministériu Públiku, la hatama keixa kontra líder nasionál ida. Há’u husu bá Ministériu Públiku atu bolu Xanana aprezenta faktu korrupsaun sira,” Marí Alkatiri afirma hodi responde Hatutan.com iha Palásiu Prezidensiál, Segunda (06/02/2023).

Mari Alkatiri mós hateten, nia mós la hatama keixa kontra mídia balun ne’ebé fó sai notísia alegasaun sira hasoru nia mezmu la balansu no viola kode étika Jornalístika tanba Alkatiri konsidera mídia publika tutan de’it deklarasaun Xanana nian.  “Kona-ba mídia balun ne’ebé halo publikasaun bá notísia akuzativu ne’e ha’u la husu bá Ministériu Públiku atu halo investigasaun, ha’u devia husu mais ha’u la husu tanba mídia sira iha ne’e rona líder ida mak ko’alia sira públika,” Marí Alkatiri hatutan.

Bainhira halo konsolidasaun partidu CNRT nian iha Postu Administrativu Balibo, Munisípiu Bobonaro, Sábadu, 21 fulan-Janeiru 2023, Xanana Gusmão nu’udár prezidente CNRT deklara katak nia sei la kaer liman ho ema sira hosi BP7 (atual sede Comité Central FRETILIN/CCF) tanba ema sira iha ne’ebé fo’er  alias korruptór.

Iha okaziaun ne’e, Xanana mós afirma hodi konsidera Mari Alkatiri nu’udár traidor bá Timor-Leste tanba orienta nia membru sira iha Parlamentu Nasionál hodi vota kontra retifikasaun tratadu frontiera marítima ho Austrália iha tinan 2019.

Xanana mós dehan tan, nia sei bá hasoru fali Alkatiri bainhira Alkatiri husu deskulpa bá povu tomak iha Timor-Leste atu bele hetan perdaun.

Jornalista: Vito Salvadór