Hatutan.com, (08 Fevereiru 2023), Díli- Prezidente Repúblika (PR), José Ramos-Horta,  Kuarta (8/2/2023),  iha Palásiu Prezidensiál,  halo enkontru ho partidu Asosiasaun Sosiál Demokrata Timorense (ASDT) ho Partidu Sosialista Timorense (PST) hodi rona opiniaun hosi estrutura no lideransa partidu rua ne’e molok dekreta loron eleisaun parlamentár 2023.

Lee Mós : FRETILIN husu Prezidente Repúblika Tetu Fatór Hotu Molok Dekreta Loron ElPar 2023

Prezidente Repúblika (PR), José Ramos-Horta. Foto/Elio dos Santos da Costa

Iha sorumutuk ne’e partidu ASDT rekomenda bá Xefe Estadu atu tau atensaun boot liu bá interese nasionál no desizaun saida de’it tenke refleta bá Konstituisaun. Nune’e, evita situasaun sira ne’ebé bele periódika estabilidade polítika.

“ASDT buka apoiu tomak bá Xefe Estadu deside tuir lei de’it, tuir kompeténsia Xefe Estadu nian atu hala’o festa demokrasia iha ámbitu ida ne’ebé nakonu ho pás, dame, trankuilidade atu timoroan sira goza sira-nia liberdade,” Sekretáriu Jerál ASDT, Vicente dos Santos   hateten.

Advertisement

ASDT nu’udár partidu  istóriku no patrimóniu Estadu ne’ebé rejistu iha 1974, maibé depois restaura independénsia iha 20 fulan-Maiu 2002, no iha tinan 2018 sofre konsekuénsia labele partisipa eleisaun tanba Tribunál deside la bele halo atividade partidária nian tanba iha problema internal. Maibé hanesan partidu polítiku eziste 1974 to’o momentu ne’e eziste nafatin tanba ne’e mak hetan konsiderasaun husi Xefe Estadu.

Hosi sorin seluk, Prezidente PST Avelino Coelho da Silva informa, enkontru ne’e iha ámbitu Xefe Estadu atu deside marka data eleisaun parlamentár 2023.

Tuir Konstituisaun no lei dehan Xefe Estadu bainhira atu marka data eleisaun sei rona uluk  governu, partidu polítiku sira asentu parlamentár, mezmu PST rasik  laiha asentu parlamentár.

Avalino Coelho dehan loloos ne’e Xefe Estadu la presiza rona PST nia opiniaun, maibé pelu faktu Xefe Estadu nia vizaun luan haree kona-bá demokrasia, kona-bá partisipasaun sidadaun hotu nian, entaun Xefe Estadu hanoin katak iha mós relevánsia atu rona PST nia opiniaun kona-ba markasaun data eleisaun parlamentár.

Iha opiniaun oi-oin balun hanoin di’ak liu muda lai ba fulan-Setembru, maibé PST nia hanoin haktuir bá regularidade Konstitusionál haree bá kalendáriu eleitorál ne’ebé hahú iha 2018 mak loron to’o duni ona hakarak ka lakohi ne’e kompeténsia Xefe Estadu nian atu marka data eleisaun parlamentár.

Advertisement

“Ami nia hanoin di’ak liu marka iha fulan-Fevereiru laran, maibé depende ba Xefe Estadu nian depois eleisaun ne’e realiza iha fulan-Maiu 2023 katak iha meadu Juñu 2023 iha ona parlamentu foun, Juñu laran iha ona Governu foun,” Avelino Coelho hateten.

Nia hatutan PST haree ba interese nasionál, hadi’a mós peranti normativu balun konstituisaun estadu direitu demokrátiku mak hanoin eleisaun data ne’ebé Xefe Estadu deside atu marka ne’e partidu hotu-hotu sei simu inklui PST mós sei kompete eleisaun parlamentár.

Prezidente Repúblika, José Ramos-Horta rasik adianta ona informasaun katak iha  Segunda f (13/2/2023) sei dekreta data bá eleisaun parlamentár 2023.

“Eleisaun ne’e fulan-Maiu ka Juñu, ha’u labele hatetn  lai too loron anúnsiu mak sei fó sai. Segunda feira, ha’u hanoin sei anunsia duni data bá eleisaun,” Prezidente Repúblika José Ramos-Horta hateten.

Xefe Estadu subliña buat hotu-hotu la’o normál, laiha falta osan Nasaun Unidas garante tinta espesiál ne’e sei mai Timor-Leste fulan ida antes ne’e laiha problema. Problema lojístika laiha, resenseamentu problema laiha.

Advertisement

Jornalista: Vito Salvadór