Hatutan.com, (08 Marsu 2023), Díli—Klubu segunda divizaun DIT FC halakon Nagarjo FC ho skoree 4-0, hafóin Jogadór avansadu Xavier Sila Bait (29) marka golu rua no golu rua seluk marka hosi Serafim Brito (17) no Elvis Silva (9).

Liga Futeból Timorense, entre DIT FC ho Nagarjo FC, iha Estádiu Munisipál Díli, Kuarta (08/03/2023). Foto/Elio dos Santos da Costa.

DIT FC hatudu superioridade iha jogu ne’e desde minutu dahuluk hodi domina jogu no halo kedan atake ba adversáriu Nagarjo FC.

Lee Mós: AS Marca Kontinua Lidera Tabela Klasifikasaun Segunda Divizaun Hafoin Halakon Kablaki FC 2-1

Ekipa DIT FC ne’ebé komanda hosi Ervinho Soares (20) organiza jogu hahú hosi liña kotuk ba oin ho rapidu.

Maske nune’e, ekipa Nagarjo FC mantein ho nia ritmu jogu no taktika ne’ebé iha hodi halo balansu ba DIT FC nia jogu.

Ekipa rua mantein halo jogu tuir orientasaun tékniku ne’ebé fó hosi treinadór sira. Nagarjo FC lansa kontra atake liu hosi kombinasaun Jogadór sira iha médiu no avansadu maibé ekipa adversáriu sei bele antesipa ho di’ak.

Tama ba minutu 27, Jogadór DIT FC Serafim Brito (17) marka uluk golu ida hodi lori nia ekipa lidera jogu ne’e ho skoree 1-0.

Nagarjo FC mantein kalma no sempre halo jogu ida di’ak hodi buka oportunidade atu halo golu. DIT FC kontinua halo atake no kuaze Jogadór Nagarjo FC falla iha liña kotuk tanba komunikasaun entre Jogadór sira falla ho nune’e DIT FC kontinua halo atake liu hosi taktika ne’ebé iha.

Tama ba minutu 34, DIT FC hatama tan golu ida liu hosi Jogadór Elvis Silva (9) hodi muda skore ba 2-0.

Hafóin golu ne’e Nagarjo FC hahú halo mudansa ba taktika atu bele buka oportunidade ba halo golu.

Tama ba minutu 41, Nagarjo FC halo substituisaun hodi hasai Jogadór Leonizio da Cruz (7) no hatama João Sequeira (28) hodi hadi’a jogu iha liña klaran no lansa kontra atake ba adversáriu maibé laiha golu ruma akontese to’o primeira parte termina.

Tama ba segunda parte ekipa rua hasa’e tensi jogu no Nagarjo FC hahú halo mudansa iha kompozisaun Jogadór ne’ebé iha hodi halo substituisaun ba Jogadór iha liña klaran no avansadu, hodi hasai Yeremias da Costa (17) no Luis Soares (22) hodi hatama Bonifácio Cabral (9) no Nelson Freitas (10).

Ho substituisaun ne’ebé iha Nagarjo FC hahú halo jogu liu hosi pasajen bola as direita hosi kotuk ba oin no avansadu Bonifácio Cabral (9) sempre halo atake liu hosi lansa suta direita maibé sei nafatin falla.

DIT FC mantein halo jogu liu hosi bola kontra atake iha liña avansadu direita no esquerda hodi fó presaun ba adversáriu.

Nagarjo FC nafatin halo ameasa liu hosi kombinasaun entre Jogadór avansadu na’in-rua Bonifácio Cabral (9) no Nelson Freitas (10) maibé defeza adversáriu la fó biban atu Jogadór avansadu Nagarjo FC halo golu.

Jogadór DIT FC Ervinho Soares (20) simu kartaun kinur hafóin halo falta hasoru avansadu Nagarjo FC Bonifácio Cabral (9).

Liu de’it minutu rua, tama ba minutu 56 Jogadór Nagarjo FC Pedro Belo (4) simu kartaun kinur hafóin halo falta hasoru Jogadór adversáriu.

Tama ba minutu 67, DIT FC halo substituisaun ba Jogadór iha liña avansadu hodi hasai Elvis Silva (9) no Josin da Cunha Klau (10) no hatama Feliciano Gonçalves (19) no Xavier Sila Bait (29).

DIT FC hasae liután intensidade iha liña klaran no lansa atake barak liutan ba adversáriu. DIT FC kontinua halo substituisaun iha minutu 70 hodi hasai Edivaldo Castro (24) no hatama Anito Cesário (12) liu de’it minutu lima no tama ba minutu 75 DIT FC kontinua halo substituisaun hodi hasai Rui da Costa (11) no hatama Boaventura Seran Klau (44).

Tama ba minutu 76, Jogadór Xavier Sila Bait (29) marka golu ida tán ba ekipa DIT FC hodi muda skore ba 3-0 hafóin simu asisténsia hosi nia maluk Jogadór Boaventura Seran Klau (44).

Hafóin golu ne’e Nagarjo FC halo kedan substituisaun hodi hasai Jobelquim da Costa (77) no hatama Palomito Ribeiro (15).

Haree katak ekipa Nagarjo FC kontinua hasa’e tensi jogu maibé falla iha rezisténsia fíziku tanba kuaze lakon bola iha liña klaran no adversáriu aproveita halo kontra atake lais liu hosi estremu direita no esquerda.

Ekipa Nagarjo FC iha ambisaun atu marka golu ruma iha jogu ne’e liu hosi avansadu Bonifácio Cabral (9) ne’ebé sempre halo esfórsu maibé nafatin falla.

DIT FC aproveita oportunidade ne’ebé iha liu hosi kontra atake lais konsege marka tan golu ida iha minutu 90+2 liu hosi Jogadór Xavier Sila Bait (29) hodi muda skore ba 4-0.

Hafóin jogu, Jogadór Xavier Sila Bait (29) ne’ebé marka golu rua iha jogu ne’e hateten liu hosi treinu no taktika ne’ebé iha hamutuk ho ekipa halo nia iha konviksaun katak sei marka golu ruma iha jogu kontra Nagarjo FC.

“Molok jogu há’u fiar na ona katak há’u sei hatama golu no ida ne’e mak sai hanesan motivasaun ida hodi hau ohin marka golu rua,” Xavier Sila Bait hateten.

Jornalista: Vito Salvadór